ທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງ​ພິທີ​ມອບ-ຮັບ​ໜ້າ​ທີ່ປະທານສະພາບໍລິຫານ ທຫລ ຢ່າງ​ເປັນ​ທາງ​ການ​ລະຫວ່າງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ, ປະທານສະພາບໍລິຫານ ທຫລ (ຜູ້​ເກົ່າ) ​ແລະ ທ່ານ ສອນໄຊ ສິດພະໄຊ ຜູ້ວ່າການ ທຫລ,​ ປະທານສະພາບໍລິຫານ ທຫລ (ຜູ້​ໃໝ່)ຊຶ່ງຈັດຂຶ້ນໃນ​ວັນທີ 18ມິຖຸນາ2020​ທີ່ຫ້ອງປະຊຸມ ທຫລ ໂດຍມີກໍາມະການສະພາບໍລິຫານ ທຫລ, ຄະນະຜູ້ວ່າການ ທຫລ ແລະ ບັນດາກົມ-ທຽບເທົ່າກົມ ເຂົ້າ​ຮ່ວມ​.

ການຮັບໜ້າ​ທີ່ປະທານສະພາບໍລິຫານ ທຫລ ຜູ້​ໃໝ່ແລະກໍາມະການສະພາບໍລິຫານຊຸດໃໝ່ໃນຄັ້ງນີ້ ປະກອບດ້ວຍ ບັນດາຄະນະນໍາທີ່ມາຈາກຂະແໜງການກ່ຽວຂ້ອງກັບການເຄື່ອນໄຫວຂອງທະນາຄານ ແລະ ພ້ອມນັ້ນ, ກໍາມະການຊຸດນີ້ຍັງມາຈາກສະຖາບັນຄົ້ນຄ້ວາເສດຖະກິດແຫ່ງຊາດ ແລະ ຈາກມະຫາວິທະຍາໄລແຫ່ງຊາດ ໂດຍໄດ້ປະຕິບັດຕາມກົດໝາຍວ່າດ້ວຍ ທຫລ ສະບັບ​ເລກທີ 47/ສພຊ, ລົງ​ວັນ​ທີ 19/6/2018;ດຳລັດ​ຂອງນາຍົກລັດຖະມົນຕີ ສະບັບ​ເລກທີ 102/ນຍ, ລົງ​ວັນ​ທີ 31/1/2020 ວ່າ​ດ້ວຍ​ການ​ແຕ່ງ​ຕັ້ງສະພາບໍລິຫານ ທຫລ ຊຶ່ງເປັນການຈັດຕັ້ງ​ບໍ​ລິ​ຫານ​ສູງສຸດໃນ​ການ​ຕົກ​ລົງ​ ແລະ ​ຮັບ​ຮອງ​ເອົາ​ບັນ​ຫາ​ທີ່​ສຳ​ຄັນ​ຕ່າງໆທີ່ຕິດພັນກັບການເຄື່ອນໄຫວໜ້າທີ່ການເມືອງຂອງທຫລເປັນຕົ້ນແຜນເງິນຕາແຫ່ງ​ຊາດເພື່ອ​ສະ​ເໜີ​ລັດ​ຖະ​ບານ​ພິ​ຈາ​ລະ​ນາ​ສະ​ເໜີ​ຕໍ່​ສະ​ພາ​ແຫ່ງ​ຊາດ​ຮັບ​ຮອງ, ບົດ​ລາຍ​ງານ​ການ​ເຄື່ອນ​ໄຫວ​ວຽກ​ງານ​ປະ​ຈຳ​ປີ ແລະ​ ທິດ​ທາງ​ໃນ​ປີ​ຕໍ່​ໄປ, ການ​ຈັດ​ຕັ້ງ​ປະ​ຕິ​ບັດແຜນງົບປະມານລາຍຮັບ – ລາຍຈ່າຍປະຈໍາປີ ແລະ ທິດທາງໃນປີຕໍ່ໄປ ເພື່ອສະເໜີນາຍົກລັດຖະມົນຕີ ພິຈາລະນາ ອະ​ນຸ​ມັດ; ພ້ອມ​ນີ້, ຍັງ​ມີ​ໜ້າ​ທີ່​ຮັບ​ຮອງ​ເອົາ​ນະ​ໂຍ​ບາຍ ​ແລະ ​ລະ​ບຽບ​ການ​ທີ່​ສຳ​ຄັນພາຍ​ໃນ​ຂອງ ທ​ຫລ.

ສະພາບໍລິຫານ ທຫລ ຊຸດປະຈຸບັນ ໄດ້ເຄື່ອນໄຫວຕາມກົດ​ໝາຍ​ວ່າ​ດ້ວຍ​ ທຫລ ​ສະ​ບັບ​ເລກ​ທີ 05/ສ​ພ​ຊ ລົງ​ວັນ​ທີ 14 ຕຸ​ລາ 1999 ແລະ ດໍາລັດ​ແຕ່ງ​ຕັ້ງສະ​ພາ​ບໍ​ລິ​ຫານ​ ທ​ຫລ ສະບັບເລກທີ 376/ນຍ,ລົງວັນທີ 22 ຕຸລາ 2016 ຊຶ່ງປະກອບມີ ທັງໝົດ 9 ທ່ານ ແລະ ພາຍຫຼັງໄດ້ຮັບການແຕ່ງຕັ້ງນັບ​ແຕ່​ເດືອນຕຸ​ລາ ປີ2016, ສະພາບໍລິຫານ ທຫລ ໂດຍ​ພາຍ​ໃຕ້​ການ​ຊີ້​ນຳ​ຢ່າງ​ໃກ້​ຊິດ ແລະ ​ເປັນ​ປະ​ທານຂອງ​ທ່ານ ​ສົມ​ດີ ດວງ​ດີ ຮອງ​ນາ​ຍົກ​ລັດ​ຖະ​ມົນ​ຕີ,ລັດ​ຖະ​ມົນ​ຕີ​ກະ​ຊວງ​ການ​ເງິນ ​ໄດ້ເອົາໃຈໃສ່ປະຕິບັດ​ສິດ ​ແລະ ​ໜ້າ​ທີ່​ຂອງ​ຕົນຕາມກົດໝາຍກໍານົດໄດ້​ເປັນ​ຢ່າງ​ດີ ໂດຍໄດ້ມີການຈັດກອງປະຊຸມ ເພື່ອ​ຄົ້ນ​ຄວ້າ, ປຶກສາຫາລື, ຮັບ​ຮອງ ​ແລະ ​ຕົກ​ລົງບັນ​ຫາ​ທີ່​ສຳ​ຄັນ​ຕ່າງໆຕິດ​ພັນ​ກັບ​ການ​ຄຸ້ມ​ຄອງ​ມະ​ຫາ​ພາກ​ເງິນ​ຕາ, ພ້ອມທັງຮັບຮອງນະໂຍບາຍ ແລະ ​​ລະ​ບຽບ​ການ​ພາຍ​ໃນ​ຂອງ ທ​ຫລ ​ເພື່ອ​ຮັບ​ປະ​ກັນ​ໃຫ້​ແກ່​ການ​ເຄື່ອນ​ໄຫວ​ວຽກ​ງານມີ​ປະ​ສິ​ດ​ທິ​ຜົນ ແລະ​ມີ​ຜົນ​ສຳ​ເລັດ ຢ່າງບໍ່ຢຸດຢັ້ງ.
ໃນຜ່ານມາ ​ໄດ້ເອົາໃຈໃສ່ຊີ້ນຳວຽກງານທະນາຄານຕາມກົດໝາຍ ແລະ ລະບຽບການທີ່ກຳນົດໄວ້ຕາມມະຕິຂອງສະພາແຫ່ງຊາດ ແລະ ຕາມມະຕິກອງປະຊຸມສະພາບໍລິຫານ ທຫລ ຢ່າງເຂັ້ມງວດ ໂດຍລວມ ທຫລ ຍັງສືບຕໍ່ຮັກສາ​ສະຖຽນລະ​ພາບ​ເງິນຕາ​ແຫ່ງ​ຊາດ​ໄດ້ຢ່າງໝັ້ນທ່ຽງ,ອັດຕາ​ເງິນ​ເຟີ້ຕ່ຳ, ອັດຕາ​ແລກປ່ຽນມີ​ຄວາມ​ສະຫງົບໂດຍພື້ນຖານ,ຈຳນວນທະນາຄານ ແລະ ສະຖາບັນການເງິນທີ່ບໍ່ແມ່ນທະນາຄານມີການຂະຫຍາຍຕົວທາງດ້ານປະລິມານ ແລະ ຄຸນນະພາບ, ຮັກສາໄດ້ສະຖຽນລະພາບທາງການເງິນ ແລະຄຸ້ມ​ຄອງ​ການ​ເຄື່ອນໄຫວຕາມລະບຽບກົດໝາຍທີ່ກຳນົດ. ການບໍລິຫານ ແລະ ການບໍລິການຂອງລະບົບທະນາຄານໄດ້ຫັນໄປສູ່ຄວາມທັນສະໄໝ ແລະມີຫຼາຍຜະລິດຕະພັນອອກຮັບໃຊ້ບໍລິການແກ່ສັງຄົມ, ການເຄື່ອນໄຫວຂອງຕະຫຼາດຫຼັກຊັບມີຜົນສຳເລັດເປັນຢ່າງດີ ແລະ ການຮ່ວມມືກັບສາກົນກໍ່ໄດ້ຮັບການເສີມຂະຫຍາຍຢ່າງຕັ້ງໜ້າ.

Medialaos MMD (ແຫຼ່ງຂໍ້ມູນຈາກ: ຣັດສະໝີ ດວງສັດຈະ)