ລັດຖະມົນຕີປະຈຳ ສນຍ ຊີ້ນຳການ ກະກຽມກອງປະຊຸມໃຫຍ່ 3 ຂັ້ນ ຢູ່ ຊຽງຂວາງ

0
126

ທ່ານ ຈະເລີນ ເຢຍປາວເຮີ ກຳມະການສູນກາງພັກ ລັດຖະມົນຕີ ປະຈຳສຳນັກງານນາຍົກ ລັດຖະມົນຕີ (ສນຍ), ຄະນະກະກຽມເນື້ອໃນກອງປະຊຸມໃຫຍ່ ຄັ້ງທີ XI ຂອງພັກ ພ້ອມດ້ວຍ ຄະນະໄດ້ລົງເຄື່ອນໄຫວຊີ້ນຳການກະກຽມດຳເນີນກອງປະຊຸມໃຫຍ່ 3 ຂັ້ນ ຢູ່ແຂວງຊຽງຂວາງ ໃນວັນທີ 2 ກັນຍາ 2019.

ໂອກາດດັ່ງກ່າວ, ທ່ານ ບຸນຕົ້ນ ຈັນທະພອນ ເລຂາພັກແຂວງ ເຈົ້າແຂວງຊຽງຂວາງ ກໍໄດ້ ລາຍງານການກະກຽມດຳເນີນກອງປະຊຸມໃຫຍ່ 3 ຂັ້ນ ເປັນຕົ້ນແມ່ນ ຂັ້ນແຂວງ ແລະ ຂັ້ນ ທ້ອງຖິ່ນ ເຊິ່ງຜ່ານມາແຂວງໄດ້ຈັດຕັ້ງເຊື່ອມຊືມຜັນຂະຫຍາຍຄຳສັ່ງ 04 ຂອງຄະນະເລຂາ ທິການສູນກາງພັກ ແລະ ຄຳແນະນຳຂອງຄະນະຈັດຕັ້ງສູນກາງພັກ, ຄະນະກວດກາສູນກາງ ພັກ, ຄະນະອົບຮົມສູນກາງພັກ ແລະ ຄຳແນະນຳແຈ້ງການຂອງບັນດາອະນຸກຳມະການ ຕ່າງໆ. ພ້ອມນັ້ນ ໄດ້ດຳເນີນກອງປະຊຸມໃຫຍ່ຂັ້ນບ້ານ, ບັນດາໜ່ວຍພັກທີ່ຂຶ້ນກັບອົງຄະນະ ພັກເມືອງ, ກອງບັນຊາການ ປກຊ-ປກສ, ການດຳເນີນກອງປະຊຸມໃຫຍ່ຂັ້ນເມືອງ ແລະ ສອງກອງບັນຊາການກຳລັງປະກອບອາວຸດຮາກຖານພັກອ້ອມຂ້າງແຂວງໃຫ້ສຳເລັດ ຊ້າ ສຸດໃຫ້ສຳເລັດໃນເດືອນກຸມພາ 2020 ເພາະເດືອນມີນາ ຈະຈັດງານມະຫາກຳກິລາແຫ່ງຊາດ ງານປະກາດທົ່ງໄຫຫີນ ເປັນມໍລະດົກໂລກ ແລະ ງານສະເຫຼີມສະຫຼອງວັນສ້າງຕັ້ງພັກ ປະຊາ ຊົນ ປະຕິວັດລາວ, ຄາດວ່າຈະດຳເນີນກອງປະຊຸມໃຫຍ່ຂັ້ນແຂວງໃນທ້າຍປີ 2020. ນອກນີ້ ຍັງໄດ້ລານງານເຖິງການກະກຽມ ແລະ ຄວາມພ້ອມຂອງອະນຸກຳມະການບຸກຄະລາກອນ, ອະນຸກຳມະການເນື້ອໃນກອງປະຊຸມໃຫຍ່ຂັ້ນແຂວງ.

ຈາກນັ້ນ, ທ່ານລັດຖະມົນຕີປະຈຳສຳນັກງານນາຍົກລັດຖະມົນຕີ ກໍໄດ້ມີຄຳຄິດຄຳເຫັນຊີ້ນຳ ຕໍ່ກັບການກະກຽມດຳເນີນກອງປະຊຸມໃຫຍ່ຂັ່ນແຂວງໃຫ້ຮັບປະກັນຫຼັກການປ່ຽນແປງໃໝ່ຂອງພັກ, ພັກນຳພາໄປສູ່ສັງຄົມນິຍົມ, ບົດລາຍງານການເມືອງ ແລະ ແຜນພັດທະນາໃຫ້ມີ ຄວາມຖືກຕ້ອງຊັດເຈນມີຄວາມເປັນຈິງ, ເປັນການລວມຫົວຄິດປັນຍາເຕົ້າໂຮມຄວາມຮູ້ ຄວາມສາມາດຂອງພະນັກງານແຕ່ລະຂະແໜງການ, ຕ້ອງຮັບປະກັນປະສານສົມທົບສະ ເພາະໜ້າ ແລະ ຍາວນານ, ຮັບປະກັນຄຸນນະພາບ, ຂະບວນການ ແລະ ບຸກຄະລາກອນ. ກອງປະຊຸມໃຫຍ່ແມ່ນສຳຄັນຫຼາຍ ເພາະແມ່ນການກຳນົດແຜນພັດທະນາເສດຖະກິດ-ສັງ ຄົມ, ການຊີ້ນຳ-ນຳພາ ເພື່ອເຮັດໃຫ້ການຈັດຕັ້ງປະຕິບັດຕາມແຜນໄດ້ຮັບຜົນສຳເລັດສູງ.

ແຫຼ່ງຂໍ້ມູນຈາກ: ໜັງສືພິມ ປະເທດລາວ