ສິ່ງທີ່ຄວນຫຼີກເວັ້ນສຳລັບການເຮັດ ການຕະຫຼາດອອນລາຍ

0
140

ປັດຈຸບັນເຊື່ອວ່າຫຼາຍທ່ານ ຫຼື ຜູ້ປະກອບການຫຼາຍຄົນແມ່ນຫັນມາເຮັດການຕະຫຼາດອອນລາຍຂຶ້ນໂດຍໃຊ້ ແພຼັດຟອມ (Platform) ຕ່າງໆ ເຊັ່ນ: ເຟສບຸ໊ກ, ທະວິດເຕີ, ເວັບໄຊ, ແອັບພລິເຄຊັນ ແລະ ອື່ນໆ ຊ່ວຍຂັບເຄື່ອນທຸລະກິດ ຫຼື ສ້າງຍອດຂາຍໃນຍຸກດີຈີຕອລ. ແຕ່ບາງຄັ້ງການເຮັດການຕະຫຼາດກໍຍັງບໍ່ຖືກຈຸດເຮັດໃຫ້ເສຍງົບໄປ. ສະນັ້ນ, ຈຶ່ງສະເໜີຄໍລຳການຕະຫຼາດ 3 ຂໍ້ທີ່ຄວນຫຼີກເວັ້ນສຳລັບການເຮັດການຕະຫຼາດອອນລາຍ ດັ່ງລຸ່ມນີ້:

  • ການໃຊ້ງົບປະມານທີ່ຫຼາຍເກີນໄປ: ຈາກຄວາມເຂົ້າໃຈຜິດຂອງຜູ້ປະກອບການ ວ່າການໃຊ້ເງິນໂຄສະນາຫຼາຍເທົ່າໃດຈະຍິ່ງມີລາຍໄດ້ກັບມາຫຼາຍຂື້ນເທົ່ານັ້ນ ແຕ່ຄວາມເປັນຈິງແລ້ວ ການໃຊ້ງົບປະມານໃນການໂຄສະນາຄວນຄຳນຶງ ແລະ ວິເຄາະໃຫ້ຖືກຕ້ອງ ເຮົາຄວນຈະໃຊ້ການໂຄສະນາຜ່ານຊ່ອງທາງໃດຫຼາຍທີ່ສຸດ ແລະ ໃຫ້ຜົນຕອບຮັບທີ່ດີທີ່ສຸດ ແລະ ຄວນກຳນົດງົບປະມານໃນອັດຕາສ່ວນຕ່າງໆໃຫ້ເໝາະສົມກັບແຕ່ລະຊ່ອງທາງທີ່ທ່ານເລືອກລົງທຶນ.
  • ການຜະລິດເນື້ອໃນທີ່ເກີນຄວາມຈຳເປັນ: ເມື່ອເວົ້າເຖິງການຕະຫຼາດຜ່ານເນື້ອໃນ (ຄອນເທັນ) ແລ້ວທຸກຄົນອາດຈະຄິດວ່າຕ້ອງຜະລິດຈຳນວນຫຼາຍໆອອກມາເພື່ອເຮັດໃຫ້ກະຈາຍສູ່ວົງກວ້າງ ແລະ ມີຄົນເຫັນຫຼາຍທີ່ສຸດ ເພື່ອຈະເຮັດໃຫ້ເກີດຄວາມສຳພັນທີ່ດີ ລະຫວ່າງ ຍີ່ຫໍ້ກັບລູກຄ້າ, ແຕ່ໃນຄວາມເປັນຈິງແລ້ວແມ່ນເຮົາຈະຜະລິດຄອນເທັນຂຶ້ນມາເປັນຈຳນວນຫຼາຍ ແຕ່ຫາກປາສະຈາກຄຸນນະພາບທີ່ດີ ກໍບໍ່ສາມາດທີ່ຈະເຈາະເຂົ້າເຖິງກຸ່ມຜູ້ບໍລິໂພກໄດ້ ເພາະສະນັ້ນແລ້ວສິ່ງທີ່ທ່ານຄວນເຮັດກ່ອນຜະລິດຄອນເທັນ ຄວນຄຳນຶງເຖິງຄວາມຕ້ອງການຂອງລູກຄ້າທີ່ແທ້ຈິງວ່າມີບັນຫາຫຍັງ, ຕ້ອງການວິທີແກ້ໄຂ ຫຼື ຄວາມຫວັງວ່າຢາກຈະແກ້ໄຂບັນຫາແນວໃດ, ຄອນເທັນມີໜ້າທີ່ຊ່ວຍແກ້ໄຂບັນຫາເທົ່ານັ້ນ ທ່ານຈຶ່ງຕ້ອງກັບມາຄຳນວນ ແລະ ຄຳນຶງເຖິງຄຸນຄ່າທີ່ສາມາດມອບໃຫ້ລູກຄ້າຜ່ານຄອນເທັນໃຫ້ຫຼາຍກວ່າເນັ້ນຈຳນວນຂອງຄອນເທັນພຽງຢ່າງດຽວ, ຫາກຈຳນວນຂອງຄອນເທັນມີຫຼາຍ ແຕ່ຄຸນນະພາບມີໜ້ອຍກໍບໍ່ໄດ້ເຮັດໃຫ້ເປັນທີ່ຮູ້ຈັກ ປຽບດັ່ງຮ້ານອາຫານທີ່ມີອາຫານຫຼາຍຢ່າງ ແຕ່ບໍ່ມີເມນູເດັດໃຫ້ຈົດຈຳກໍຈະກາຍເປັນພຽງຕົວເລືອກ ແຕ່ບໍ່ມີວັນເປັນອັນດັບໜຶ່ງໃນໃຈຂອງລູກຄ້າ ແຕ່ຫາກຜະລິດໃນຈຳນວນທີ່ພໍດີ ແລະ ຄຸນນະພາບທີ່ເໝາະກັບຄວາມຄວາມຕ້ອງການຂອງລູກຄ້າ ກໍປຽບເໝືອນການປຸງແຕ່ງອາຫານຈານແຊບ ແລະ ເດັດໃຫ້ກັບລູກຄ້າ.
  • ການເຮັດຄືຄົນອື່ນ: ສິ່ງທີ່ເກີດຂຶ້ນໃນໂລກອອນລາຍນັ້ນມັນຄືຄວາມສຳເລັດທີ່ເກີດຂຶ້ນວ່ອງໄວສຳລັບທຸລະກິດຕ່າງໆ ແລະ ຫາກໃຜທີ່ຕ້ອງການເລີ່ມຕົ້ນໃໝ່ອີກຄັ້ງໃນໂລກດີຈີຕອລ ທ່ານຈະເຄີຍໄດ້ຍິນຄຳທີ່ຫຼາຍໆຄົນເວົ້າວ່າ ໃຫ້ໄປເບິ່ງຂອງຄົນນັ້ນຄົນນີ້ ແລ້ວລອງເຮັດຕາມເບິ່ງ ຈະເປັນທາງລັດທີ່ງ່າຍທີ່ສຸດ, ແຕ່ຄວາມເປັນຈິງແລ້ວ ແຕ່ລະທຸລະກິດຈະມີແຜນ ແລະ ກົນລະຍຸດທີ່ບໍ່ຄືກັນ ແລ້ວແຕ່ເປົ້າໝາຍ ແລະ ຊັບພະຍາກອນ ຕ້ອງເບິ່ງ 8 ສ່ວນປະກອບການຕະຫຼາດຍຸກດີຈີຕອລ ພ້ອມທັງລະບົບທີ່ມີຢູ່ ແລະ ສິ່ງທີ່ທ່ານຄວນເຮັດຄື ກັບມາເບິ່ງ 8 ສ່ວນອົງປະກອບຂອງກົນລະຍຸດການຕະຫຼາດດີຈີຕອລ ທີ່ຕ້ອງມີຄື: 1). ເປົົ້າໝາຍ, 2). ລາຍລະອຽດຂອງລູກຄ້າ, 3). ຈຸດຢືນ, 4). ຄອນເທັນການຕະຫຼາດ, 5). ຊ່ອງທາງການຕະຫຼາດ, 6). ວິທີການລົງໂຄສະນາ, 7). ການປະເມີນຄວາມສົນໃຈຂອງລູກຄ້າຕໍ່ຍີ່ຫໍ້ ແລະ 8). ທີມການຕະຫຼາດອອນລາຍ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ເສດຖະກິດ-ການຄ້າ)