ສານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ

0
120

(ເນື່ອງໃນໂອກາດ ວັນສາກົນຕ້ານຢາເສບຕິດ ຄົບຮອບ 33 ປີ )

ໃນ​ທ່າມກາງ​ທີ່​ທົ່ວ​ພັກ, ທົ່ວ​ລັດ ແລະ  ທົ່ວ​ປວງ​ຊົນ​ລາວ ພວມ​ໄດ້​ເອົາໃຈໃສ່​ໃນ​ການ​ປ້ອງ​ກັນ​ພະຍາດ​ປອດອັກເສບ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ (COVID-19)  ຢ່າງ​ເອົາ​ຈິງ​ເອົາ​ຈັງ, ພວກ​ເຮົາ​ ກໍ​ຍັງ​ໄດ້​ພ້ອມ​ກັນ​ກັບ​ປະຊາຊາດ​ໃນ​ທົ່ວ​ໂລກ ສະເຫຼີມສະຫຼອງ​ວັນ​ສາກົນ​ຕ້ານ​ຢາ​ເສບ​ຕິດ ຄົບຮອບ 33 ປີ, ວັນ​ທີ 26 ມິຖຸນາ 2020 (26/6/1987-26/6/2020) ຊຶ່ງ​ ຖື​ເປັນ​ໂອກາດ​ແຫ່ງ​ການ​ສະເໜີ​ຜົນງານ​ໃນ​ການ​ຕໍ່ສູ້ ເພື່ອ​ສະ    ກັດ​ກັ້ນ, ຕ້ານ ແລະ ແກ້​ໄຂ​ບັນຫາ​ຢາ​ເສບ​ຕິດ ທີ່ ພັກ​-​ລັດ ແລະ ປະຊາຊົນ​ລາວ​ບັນດາເຜົ່າ  ໄດ້​ດຳເນີນ​ໃນ​ປີ​ຜ່ານ​ມາ.ເປັນ​ທີ່​ຊາບ​ກັນ​ດີ​ແລ້ວ​ວ່າ ຢາ​ເສບ​ຕິດ ແມ່ນ​ບັນຫາ​ກວມ​ລວມ​ຂອງ​ໂລກ ທີ່​ເປັນ​ໄພ​ອັນຕະລາຍ​ຕໍ່​ມວນ​ມະນຸດ, ເປັນ​ບໍ່ເກີດ​ແຫ່ງ​ການ​ກໍ່​ອາ​ຊະ​ຍາ​ກຳ, ກົດ​ໜ່ວງ​ຖ່ວງດຶງ​ການ​ສ້າງສາ​ພັດທະນາ​ເສດ​ຖະກິດ​-​ສັງຄົມ​ຂອງ​ຊາດ ທັງ​ຍັງ​ສ້າງ​ຄວາມ​ເສຍ​ຫາຍ​ຢ່າງ​ໃຫຍ່​ຫຼວງ​ຕໍ່​ບຸກຄົນ ແລະ ຄອບຄົວ​ຜູ້​ຕົກ​ເປັນ​ທາດ​ຂອງ​ຢາ​ເສບ​ຕິດ. ປັດຈຸ​ບັນ ການ​ຜະລິດ ແລະ ການ​ຄ້າຂາຍ​ຢາ​ເສບ​ຕິດ ໄດ້​ກາຍເປັນ​ຂະບວນ​ການ​ຂ້າມ​ຊາດ ທີ່​ລັດຖະບານ ແລະ ປະຊາຊົນ ກໍ​ຄື ປະຊາຊາດ​ທົ່ວ​ໂລກ ພ້ອມ​ກັນ​ຕໍ່ຕ້ານ​ຢ່າງ​ແຂງ​ແຮງ. ເຖິງ​ແມ່ນ​ວ່າ ຫຼາຍ​ປະເທດ ໄດ້​ເພີ່ມ​ທະວີ​ມາດ​ຕະການ ແລະ ຄວາມ​ພະຍາຍາມ​ໃນ​ການ​ສະກັດ​ກັ້ນ, ປາບ​ປາມ ແລະ ແກ້​ໄຂ​ບັນຫາ​ດັ່ງກ່າວ ຢ່າງ​ຕໍ່​ເນື່ອງ​ປານໃດ​ກໍ​ຕາມ, ແຕ່​ການ​ຜະລິດ, ການ​ຊົມໃຊ້, ການ​ຄ້າ ຂາຍ ແລະ ການ​ລຳລຽງ​ຂົນສົ່ງ​ຢາ​ເສບ​ຕິດ​ຢູ່​ໃນ​ໂລກ ກໍ​ຄື​ຢູ່ ສປປ ລາວ ກໍ​ຍັງ​ບໍ່​ຫຼຸດ​ໜ້ອຍ​ຖອຍ​ລົງ ແລະ ມີ​ທ່າ​ອ່ຽງ​ຂະຫຍາຍຕົວ​ຂຶ້ນ​ຢ່າງ​ໜ້າ​ເປັນ​ຫ່ວງ. 

ຍ້ອນ​ເຫັນ​ໄດ້​ເຖິງ​ພິດ​ໄພ​ອັນຕະລາຍ​ຄື​ດັ່ງກ່າວ, ໃນ​ຊຸມ​ປີຜ່ານມາ ພັກ ແລະ ລັດຖະບານ​ເຮົາ ຈຶ່ງ​ໄດ້​ຖື​ເອົາ​ການ​ສະກັດ​ກັ້ນ, ຕ້ານ ແລະ ແກ້​ໄຂ​ບັນຫາ​ຢາ​ເສບ​ຕິດ ເປັນ​ໜ້າທີ່​ສຳຄັນ ແລະ ໄດ້​ຊີ້​ນຳ​-​ນຳພາ ການຈັດຕັ້ງ​ປະຕິບັດ​ວຽກ​ງານ​ດັ່ງກ່າວ ຢ່າງ​ຈົດຈໍ່ ແລະ ຈິງ​ຈັງ​ຕະຫຼອດ​ມາ. ພວກ​ເຮົາ​ໄດ້​ເອົາໃຈໃສ່​ສຶກສາ​ອົບຮົມ​ໃຫ້​ປະຊາຊົນ​ບັນດາ​ຊັ້ນ​ຄົນ ເປັນຕົ້ນ​ແມ່ນ​ຊາວ​ໜຸ່ມ​-​ເຍົາວະ​ຊົນ ໄດ້​ຮັບ​ຮູ້​-​ເຂົ້າໃຈ​ຢ່າງ​ຖືກຕ້ອງ ກ່ຽວ​ກັບ​ພິດ​ໄພ ແລະ ຜົນ​ຮ້າຍ​ຂອງ​ຢາ​ເສບ​ຕິດ, ໂດຍ​ໄດ້​ໂຄສະນາ​ເຜີຍແຜ່​ແນວທາງ​ນະໂຍບາຍ, ກົດໝາຍ, ລະບຽບ​ການ ແລະ ມະຕິ​ຄຳ​ສັ່ງ​ຂອງ​ພັກ​-​ລັດ ກ່ຽວ​ກັບ​ບັນຫາ​ຢາ​ເສບ​ຕິດຢ່າງ​ຕໍ່​ເນື່ອງ ແລະ ເປັນ​ປົກ​ກະ​ຕິ. ພວກ​ເຮົາ ໄດ້​ຊ່ວຍເຫຼືອ ແລະ ສ້າງ​ເງື່ອນໄຂ​ໃຫ້​ບັນດາ​ຄອບຄົວ​ປະຊາຊົນ​ເຜົ່າ​ຕ່າງໆ​ຢູ່​ເຂດ​ພູ​ດອຍ ທາງ​ພາກ​ເໜືອ ຫັນ​ໄປ​ປະກອບ​ອາຊີບ​ອື່ນ​ທີ່​ໝັ້ນຄົງ ແລະ ຖືກ​ກົດໝາຍ ແທນ​ການ​ປູກ​ຝິ່ນ, ໄດ້​ດຳເນີນ​ການ​ບຳບັດ​ປິ່ນປົວ ແລະ ຟື້ນ​ຟູ​ສຸຂະພາບ​ຜູ້​ຕິດ​ຢາ​ເສບ​ຕິດ ເພື່ອ​ໃຫ້​ເຂົາເຈົ້າ ກັບ​ຄືນ​ເປັນ​ຄົນ​ດີ​ຂອງ​ສັງ​ຄົມ. ພ້ອມ​ນັ້ນ, ຍັງ​ໄດ້​ຕັ້ງໜ້າ​ເຂົ້າ​ຮ່ວມ​ໃນ​ການ​ປະຕິບັດ​ວຽກ​ງານ 3 ສ້າງ ທີ່​ຕິດ​ພັນ​ກັບ​ການ​ສ້າງ​ບ້ານ​ໃຫ້ ເປັນ​ຫົວໜ່ວຍ​ພັດທະນາ ໂດຍ​ໄດ້​ສ້າງ​ບ້ານ, ໂຮງຮຽນ, ກົມ​ກອງ, ຫົວໜ່ວຍ​ການ​ຜະລິດ ແລະ ບໍລິການ ທັງ​ພາກ​ລັດ ແລະ ເອກະ​ຊົນ ຢູ່​ຕາມ​ທ້ອງຖິ່ນ​ຕ່າງໆ ໃຫ້​ປອດ​ຈາກ​ຢາ​ເສບ​ຕິດ. ນອກ​ນັ້ນ ລັດຖະບານ ຍັງ​ໄດ້​ເອົາໃຈໃສ່ ແລະ ໃຫ້​ຄວາມ​ສຳຄັນ​ຕໍ່​ການ​ປະຕິບັດ​ມາດ​ຕະການ​ດ້ານ​ກົດ ໝາຍ ຕໍ່​ຜູ້​ກະທຳ​ຄວາມ​ຜິດ. ໃນ​ປີ​ນີ້, ເຈົ້າ​ໜ້າທີ່​ຕຳຫຼວດ, ໂດຍ​ໄດ້​ຮັບ​ຄວາມ​ຮ່ວມ​ມື​ຈາກ​ພາກສ່ວນ​ທີ່​ກ່ຽວຂ້ອງ ທັງ​ພາຍ​ໃນ ແລະ ຕ່າງປະເທດ ໄດ້​ມ້າງ​ຄະດີ, ຢຶດ​ຢາ​ເສບ​ຕິດ, ຢຶດ​ອາວຸດ​ເສິກ, ຢຶດ​ຊັບ​ສິນ, ວັດຖຸ​ມີຄ່າ, ສານ​ເຄ​ມີ​ຕ່າງໆ ທີ່​ນໍາ​ມາ​ຜະລິດ​ເປັນ​ຢາ​ເສບ​ຕິດ ແລະ ທີ່​ສຳຄັນ​ແມ່ນ​ໄດ້​ຈັບ​ກຸມ​ຜູ້​ກະ​ທໍາ​ຄວາມ​ຜິດ​ຈຳນວນ​ໜຶ່ງ ມາ​ດຳເນີນ​ຄະດີ​ຕາມ​ລະບຽບ​ກົດ​ໝາຍ. 

ນອກຈາກ​ນັ້ນ, ກໍ​ໄດ້​ມີ​ການ​ພົວພັນ​ຮ່ວມ​ມື​ຢ່າງ​ໃກ້ຊິດ, ເປັນ​ເຈົ້າ​ການ ໃນ​ການ​ຕິດຕາມ, ກວດກາ ແລະ ແກ້​ໄຂ​ບັນຫາ​ດັ່ງກ່າວ ຢ່າງ​ຕັ້ງໜ້າ ສະເໝີ​ຕົ້ນ​ສະເໝີ​ປາຍ ກັບ​ບັນດາ​ປະເທດ​ເພື່ອນ​ມິດ ໂດຍ​ສະເພາະ ກັບ​ປະເທດ​ບ້ານ​ໃກ້​ເຮືອນ​ຄຽງ ແລະ ອົງການ​ຈັດ​ຕັ້ງ​ສາກົນ​ຕ່າງໆ ຕະຫຼອດ​ມາ.
ເນື່ອງ​ໃນ​ວັນ​ສາກົນ​ຕ້ານ​ຢາ​ເສບ​ຕິດ ວັນ​ທີ 26 ມິຖຸນາ ຄົບຮອບ 33 ​ປີ​ນີ້, ຕາງໜ້າ ລັດຖະບານ ແຫ່ງ​ສາທາລະນະ​ລັດ ປະຊາທິປະໄຕ ປະຊາຊົນ​ລາວ. ຂ້າພະເຈົ້າ ຂໍ​ສະແດງ​ຄວາມ​ຍ້ອງຍໍ​ຊົມເຊີຍ ຕໍ່​ເຈົ້າ​ໜ້າທີ່​ປ້ອງ​ກັນ​ຊາດ, ປ້ອງ​ກັນ​ຄວາມ​ສະຫງົບ ແລະ  ທຸກ​ພາກສ່ວນ​ທີ່​ກ່ຽວຂ້ອງ ຢູ່​ຂັ້ນ​ສູນ​ກາງ ແລະ ທ້ອງຖິ່ນ ຕະຫຼອດ​ຮອດ​ພໍ່​ແມ່​ປະຊາຊົນ​ລາວ​ບັນດາເຜົ່າ ໃນ​ທົ່ວ​ປະເທດ ທີ່​ໄດ້​ໃຫ້ການ​ຮ່ວມ​ມື​ປະກອບສ່ວນ​ເຂົ້າ​ໃນ​ການ​ສະກັດ​ກັ້ນ, ຕ້ານ ແລະ ແກ້​ໄຂ​ບັນຫາ​ຢາ​ເສບ​ຕິດ. ນະ​ໂອກາດ​ນີ້, ຂໍ​ສະແດງ​ຄວາມ​ຂອບໃຈ ແລະ ຮູ້​ບຸນຄຸນ ມາ​ຍັງ​ບັນດາ​ປະເທດ​ເພື່ອນ​ມິດ, ອົງການ​ຈັດ​ຕັ້ງ​ສາກົນ, ອົງການ​ບໍ່​ສັງກັດ​ລັດຖະບານ ແລະ ພາກ​ທຸລະ​ກິດ ທັງ​ພາຍ​ໃນ ແລະ ຕ່າງປະເທດ ທີ່​ໄດ້​ໃຫ້ການ​ຮ່ວມ​ມື, ສະໜັບສະໜູນ, ອູ້ມຊູ​ຊ່ວຍເຫຼືອ​ໃຫ້​ແກ່​ລັດຖະບານ ແລະ ປະຊາຊົນ​ລາວ ໃນ​ການ​ສະກັດ​ກັ້ນ, ຕ້ານ ແລະ ແກ້​ໄຂ​ບັນຫາ​ຢາ​ເສບ​ຕິດ ໃຫ້​ໄດ້​ຮັບ​ຜົນ​ດີ​ຕະຫຼອດ​ມາ.

ຢາ​ເສບ​ຕິດ ເປັນ​ບັນຫາ​ຂອງ​ຊາດ ແລະ ຂອງ​ສາກົນ ທີ່​ກຳລັງ​ເປັນ​ໄພ​ຂົ່ມຂູ່ ຕໍ່​ຄວາມ​ສະຫງົບ​ສຸກ, ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ ແລະ ຄວາມ​ໝັ້ນຄົງ​ຂອງ​ຊາດ​ລາວ​ເຮົາ. ດັ່ງນັ້ນ, ອີກ​ເທື່ອ​ໜຶ່ງ, ຂ້າພະເຈົ້າ ຂໍ​ຮຽກຮ້ອງ​ມາ​ຍັງ​ພະນັກງານ, ທະຫານ, ຕຳຫຼວດ ແລະ ປະຊາຊົນ​ລາວ​ບັນດາເຜົ່າ ທຸກ​ຊັ້ນ​ຄົນ, ທຸກ​ເພດ​ໄວ ໃນ​ທົ່ວ​ສັງຄົມ ຕະຫຼອດ​ຮອດ​ບັນດາ​ອົງການ​ຈັດ​ຕັ້ງ​ພັກ​-​ລັດ, ອົງການ​ປົກຄອງ​ທ້ອງຖິ່ນ, ສະ​ຖາ​ບັນ​ການ​ສຶກສາ, ອົງການ​ພຸດ​ທະ​ສາສະໜາ ແລະ ສະ​ຖາ​ບັນ​ຄອບຄົວ ຈົ່ງ​ໄດ້​ ພ້ອມ​ກັນ​ເປັນ​ເຈົ້າ​ການ ເຂົ້າ​ຮ່ວມ​ໃນ​ການ​ສະກັດ​ກັ້ນ, ຕ້ານ ແລະ  ແກ້​ໄຂ​ບັນຫາ​ຢາ​ເສບ​ຕິດ ໃຫ້​ຫຼຸດ​ໜ້ອຍ​ຖອຍ​ລົງ ແລະ ໝົດ​ສິ້ນ​ ໄປ​ຈາກ​ສັງຄົມ​ລາວ.

ຂ້າພະເຈົ້າ ຫວັງ​ເປັນ​ຢ່າງ​ຍິ່ງ​ວ່າ ບັນດາ​ປະເທດ​ເພື່ອນ​ມິດ ແລະ ອົງການ​ຈັດ​ຕັ້ງ​ສາກົນ ຈະ​ສືບຕໍ່​ໃຫ້ການ​ສະໜັບສະໜູນ, ຮ່ວມ​ມື​ຊ່ວຍເຫຼືອ​ດ້ານ​ທຶນຮອນ, ບົດຮຽນ ແລະ ປະສົບ​ການ ແກ່​ລັດຖະບານ ແລະ ປະຊາຊົນ​ລາວ ກໍ​ຄື​ອົງການ​ທີ່​ເຮັດ​ໜ້າທີ່​ສະກັດ​ກັ້ນ, ຕ້ານ ແລະ ແກ້​ໄຂ​ບັນຫາ​ຢາ​ເສບ​ຕິດ ເພື່ອ​ເຮັດ​ໃຫ້​ພາກ​ພື້ນ ແລະ ໂລກ​ຂອງ​ພວກ​ເຮົາ ປອດ​ຈາກ​ຢາ​ເສບ​ຕິດ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)