ບັນຫາອຸບັດຕິເຫດຕາມທ້ອງຖະໜົນ ໂດຍສະເພາະຢູ່ນະຄອນຫຼວງວຽງຈັນ ເກີດຂຶ້ນຢ່າງຕໍ່ເນື່ອງ, ລຽນຕິດ; ໃນຂະນະທີ່ເຈົ້າໜ້າທີ່ຕຳຫຼວດຈະລາຈອນ ໄດ້ເອົາໃຈໃສ່ຈັດຕັ້ງປະຕິບັດໜ້າວຽກຕ່າງໆ ເພື່ອຫຼຸດຜ່ອນ ແລະ ແກ້ໄຂບັນຫາອຸບັດຕິເຫດທີ່ເກີດຂຶ້ນ.

ພັທ ສັງຄົມ ພົມມະລາດ ຮອງຫົວໜ້າພະແນກຕຳຫຼວດຈະລາຈອນ ປກສ ນະຄອນຫຼວງວຽງຈັນ ໃຫ້ຮູ້ວ່າ: ໃນໄລຍະທີ່ຜ່ານມາ ພະແນກຕຳຫຼວດຈະລາຈອນ ປກສ ນະຄອນຫຼວງວຽງຈັນ ກໍໄດ້ສຸມໃສ່ຫຼາຍວຽກງານ ເພື່ອຫຼຸດຜ່ອນອຸບັດຕິເຫດ ແລະ ແກ້ໄຂສະພາບການຈະລາຈອນແອອັດ ໂດຍສຸມໃສ່ວຽກງານດັ່ງນີ້:

(ຮູບພາບປະກອບ)
  • ຈັດລະບຽບຕົວເມືອງ: ເອົາໃຈໃສ່ລົງລະບາຍການສັນຈອນຕາມ 3 ແຍກ 4 ແຍກ ຈັດລະບຽບການສັນຈອນຕາມສາຍທາງຕ່າງໆທີ່ມີຄວາມສັບສົນ, ຈັດຄວາມເປັນລະບຽບຮຽບຮ້ອຍຕາມຕະຫຼາດຄິວລົດ, ສະຖານທີ່ຊຸມນຸມຊົນ, ເອົາໃຈໃສ່ສຶກສາອົບຮົມກ່າວເຕືອນຜູ້ລ່ວງລະເມີດກົດລະບຽບການສັນຈອນ ເພື່ອໃຫ້ຫັນເຂົ້າສູ່ລະບຽບຫຼັກການ, ຕາມກົດໝາຍ, ແຈ້ງການ ແລະ ລະບຽບການຕ່າງໆ, ຫັນເຂົ້າສູ່ຄວາມເປັນລະບຽບຮຽບຮ້ອຍຂອງສັງຄົມ ໂດຍປະສານສົມທົບກັບພາກສ່ວນ ຍທຂ ແລະ ຄບຕ.
  • ວຽກງານຈັດການ-ປະຈຳປ້ອມ: ພະນັກງານນັກຮົບແຕ່ລະສະຫາຍໄດ້ເອົາໃນໃສ່ຕາມໜ້າທີ່ ທີ່ໄດ້ຮັບການມອບໝາຍປະຈຳຈຸດ-ປະຈຳປ້ອມຊົ່ວຄາວ ແລະ ຖາວອນ ເພື່ອຕິດຕາມການກວດກາພາຫະນະຂອງຜູ້ໃຊ້ລົດ-ໃຊ້ຖະໜົນ, ອອກລະບາຍລົດໃນໂມງເຂົ້າການ-ເລີກການ ເພື່ອເຮັດໃຫ້ການສັນຈອນສະດວກຄ່ອງຕົວ, ເຮັດໃຫ້ມີຄວາມປອດໄພ, ຄວາມເປັນລະບຽບຮຽບຮ້ອຍ. ສາມາດກັກເອກະສານລົດທີ່ລ່ວງລະເມີດລະບຽບການສັນຈອນ.
  • ວຽກງານຄຸ້ມຄອງພາຫະນະ ແລະ ການຂັບຂີ່: ສົມທົບກັບພາກສ່ວນກວດກາເຕັກນິກຢູ່ 3 ຈຸດ, ສູນກວດກາເຕັກນິກທົ່ງສ້າງນາງ, ກວດກາເຕັກນິກທົ່ງປົ່ງ ແລະ ກວດກາເຕັກນິກປານມໍເຕີ້. ນອກນັ້ນ, ຍັງໄດ້ສົ່ງພະນັກງານເຂົ້າຮ່ວມເປັນຄະນະກຳມະການສອບເສັງໃບຂັບຂີ່ຢູ່ກອງຄຸ້ມຄອງພາຫະນະຢູ່ທົ່ງປົ່ງ, ເຂົ້າຮ່ວມເປັນຄະນະກຳມະການແກ້ໄຂຄະດີ.
  • ວຽກງານໂຄສະນາ: ຖືວ່າເປັນປາຍແຫຼມຂອງວຽກງານຈະລາຈອນເພື່ອໂຄສະນາ, ສຶກສາອົບຮົມ ແລະ ກ່າວເຕືອນຜູ້ໃຊ້ລົດ-ໃຊ້ຖະໜົນ ຮັບຮູ້ເຖິງລະບຽບການຈະລາຈອນ, ກົດໝາຍຂົນສົ່ງ ແລະ ແຈ້ງການຕ່າງໆ ໂດຍມີການເຄື່ອນໄຫວໂຄສະນາຕາມໄຟອຳນາດ, 3 ແຍກ 4 ແຍກ, ກຸ່ມບ້ານ ສຳນັກງານ ອົງການ, ໂຮງຮຽນ, ໂຮງຈັກ, ໂຮງງານ ເພື່ອຍົກໃຫ້ເຫັນແຈ້ງເຖິງ ຜົນເສຍຫານຈາກການເກີດອຸບັດຕິເຫດ, ນອກນັ້ນ ຍັງໄດ້ໂຄສະນາຜ່ານສື່ມວນຊົນ, ໜັງສືພິມ, ວິທະຍຸ ແລະ ໂທລະພາບ ເພື່ອແຊກຊ້ອນໄປໃນທຸກພື້ນທີ່.
  • ວຽກງານທາງຫຼວງ: ໄດ້ລົງເຮັດໜ້າທີ່ ລົງລະບາຍການສັນຈອນຕາມສາຍທາງທີ່ມີຄວາມສັບສົນຕາມສາຍທາງຕ່າງໆ, ອອກກວດກາພາຫະນະຕາມຈຸດສຳຄັນ, ອອກທິດຈະລາຈອນ, ອອກກວດກາຄວາມໄວ, ທາດເຫຼົ້າ, ການຮັດສາຍນິລະໄພ, ປ້ອງກັນເປີດທາງໃຫ້ແຂກພາຍໃນ ແລະ ຕ່າງປະເທດ, ສຶກສາອົບຮົມຜູ້ທີ່ໃຊ້ລົດ-ໃຊ້ຖະໜົນທີ່ຮູ້ເທົ່າບໍ່ເຖິງການ.
  • ວຽກງານແກ້ໄຂຄະດີອຸບັດຕິເຫດ: ເປັນວຽກງານທີ່ມີຄວາມຫຍຸ້ງຍາກສັບສົນ; ດັ່ງນັ້ນ, ຈຶ່ງໄດ້ເນັ້ນໃຫ້ພະນັກງານ-ນັກຮົບແຕ່ລະສະຫາຍຕ້ອງເອົາໃຈໃສ່ຕໍ່ໜ້າທີ່ວິຊາສະເພາະຢ່າງເຂັ້ມງວດ, ໂດຍສະເພາະແມ່ນປະຈຳການຄອຍເຫດ 24 ຊົ່ວໂມງ, ເພື່ອແກ້ໄຂອຸບັດຕິເຫດທີ່ເກີດຂຶ້ນໃຫ້ທັນເວລາ, ສະພາບການລົງວັດແທກສະຖານທີ່ເກີດເຫດວ່ອງໄວ ແລະ ຊັດເຈນ, ການດຳເນີນຄະດີອຸບັດຕິເຫດແມ່ນດຳເນີນໄປຕາມຂັ້ນຕອນຂອງກົດໝາຍ ຖືກຕ້ອງຕາມຫຼັກການວິຊາສະເພາະເພື່ອຫຼີກລ້ຽງຫາງສຽງ.

ເຖິງແມ່ນເຈົ້າໜ້າທີ່ຕຳຫຼວດຈະລາຈອນ ສຸມໃສ່ຈັດຕັ້ງປະຕິບັດໜ້າທີ່ວິຊາສະເພາະຢ່າງຕັ້ງໜ້າ ເພື່ອຫຼຸດຜ່ອນອຸບັດຕິເຫດ ແລະ ຈະລາຈອນແອອັດ, ແຕ່ກໍບໍ່ສາມາດແກ້ໄຂໄດ້ຢ່າງຂາດຕົວ. ສະນັ້ນ, ຈຶ່ງຮຽກຮ້ອງໃຫ້ຜູ້ໃຊ້ລົດ-ໃຊ້ຖະໜົນ ຕ້ອງເປັນເຈົ້າການປະຕິບັດກົດລະບຽບທີ່ວາງອອກຈາກເຂັ້ມງວດ ໂດຍສະເພາະເມົາບໍ່ຂັບຂີ່.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປ້ອງກັນຄວາມສະຫງົບ)