ໃນວັນທີ 1 ກໍລະກົດ 2020, ຢູ່ທີ່ສໍານັກງານນາຍົກລັດຖະມົນຕີ, ທ່ານ ນາງ ອາຊິງ ສີລາຊາ ຮອງປະທານບໍລິສັດ ກຸ່ມດວງຈະເລີນພັດທະນາກໍ່ສ້າງຈໍາກັດ ແລະ ບໍລິສັດຄູ່ຮ່ວມທຸລະກິດປະ ກອບມີ ບໍລິສັດໄຊນາເຣດ ເວບອິນເຕີເນຊັນນອລ ຊີຄິວຣີຕີກຣຸບ (China Red Wave International Security Group) ແລະ ບໍລິສັດເສິນເຈິນຊົງຢີເທຣດດິງຄອມປານີ (Shenzhen Zhongyi Trading Co.Ltd) ໄດ້ນໍາຜ້າອັດປາກ-ດັງປະເພດ KN95 ຈໍານວນ 1 ແສນອັນ ລວມມີມູນຄ່າກວ່າ 3 ແສນໂດລາສະຫະລັດ ມາມອບໃຫ້ລັດຖະບານ ເພື່ອນໍາໃຊ້ເຂົ້າໃນ ວຽກງານປ້ອງກັນການລະບາດຂອງພະຍາດອັກເສບປອດຈາກເຊື້ອຈຸລາໂລກສາຍພັນໃໝ່ COVID-19.

ໃຫ້ກຽດຮັບການຊ່ວຍເຫລືອດັ່ງກ່າວ, ໂດຍ ທ່ານ ນາງ ທິບພະກອນ ຈັນທະວົງສາ ຮອງລັດຖະ ມົນຕີ, ຮອງຫົວໜ້າຫ້ອງວ່າການ ສໍານັກງານນາຍົກລັດຖະມົນຕີ, ພ້ອມໄດ້ຕາງໜ້າໃຫ້ລັດຖະບານ ສະແດງ ຄວາມຂອບ ອົກຂອບໃຈ ຕໍ່ກຸ່ມບໍລິສັດດັ່ງກ່າວ ທີ່ໄດ້ນໍາເອົາອຸປະກອນການແພດທີ່ຈໍາເປັນມາມອບໃຫ້ຄັ້ງນີ້, ເຊິ່ງເປັນການປະກອບສ່ວນອັນສໍາຄັນເພື່ອຊ່ວຍລັດຖະບານ ໃນວຽກງານປ້ອງກັນການລະບາດຂອງພະຍາດດັ່ງກ່າວ ແລະ ມາຮອດປັດຈຸບັນ, ລັດຖະບານໄດ້ຫລຸດຜ່ອນຫລາຍມາດຕະການເຄື່ອນໄຫວຂອງສັງຄົມ, ພາຍຫລັງບໍ່ພົບຜູ້ຕິດເຊື້ອພະຍາດດັ່ງກ່າວ ຢູ່ປະເທດເຮົາມາເປັນເວລາ 70 ກວ່າມື້ແລ້ວ, ແຕ່ລັດຖະບານ ຍັງສືບຕໍ່ເຝົ້າລະວັງ ແລະ ປ້ອງກັນພະຍາດ ດັ່ງກ່າວຢ່າງເຂັ້ມງວດ ຈົນກວ່າພະຍາດຮ້າຍແຮງນີ້ຈະໝົດໄປ ແລະ ເຄື່ອງທີ່ໄດ້ຮັບຄັ້ງນີ້ຈະສາມາດຊ່ວຍປ້ອງກັນພະຍາດດັ່ງກ່າວໄດ້ໃນລະດັບດີ.

ໃນໂອກາດນີ້, ທ່ານ ນາງ ອາຊິງ ສີລາຊາ ໄດ້ກ່າວສະແດງຄວາມດີໃຈ ທີ່ບໍລິສັດກຸ່ມດວງຈະເລີນ ແລະ ຄູ່ຮ່ວມທຸລະກິດ ໄດ້ມີສ່ວນຮ່ວມກັບລັດຖະບານ ໃນການປ້ອງກັນພະຍາດດັ່ງກ່າວ, ພ້ອມຫວັງວ່າ ພາຍໃຕ້ມາດຕະການຕ່າງໆ ຂອງລັດຖະບານວາງອອກນັ້ນ ຈະສາມາດຢັບຢັ້ງພະຍາດດັ່ງກ່າວບໍ່ໃຫ້ກັບມາລະບາດໃນປະເທດເຮົາອີກ.

ປັດຈຸບັນ, ກຸ່ມບໍລິສັດດັ່ງກ່າວ ແລະ ຄູ່ຮ່ວມທຸລະກິດ ພວມສ້າງຕັ້ງໂຮງງານຜະລິດຜ້າອັດປາກ-ດັງ ແລະ ອຸປະກອນເຄື່ອງກວດພະຍາດໂຄວິດ-19, ເຊິ່ງຄາດວ່າຜະລິດຕະພັນການແພດດັ່ງກ່າວ ຈະນໍາອອກມາຈໍາໜ່າຍໃຫ້ແກ່ສັງຄົມ ໄດ້ຊົມໃຊ້ໃນລາຄາທີ່ເໝາະສົມໃນໄວໆນີ້.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)