ສົກຮຽນໃໝ່ 2019-2020 ໄດ້ເລີ່ມເປີດເປັນທາງການ ແລະ ດຳເນີນການສິດສອນ-ຮ່ຳຮຽນ ເປັນປົກກະຕິໃນວັນທີ 2 ກັນຍາ 2019 ນີ້ ເປັນຕົ້ນໄປໃນຂອບເຂດທົ່ວປະເທດ ທ່າມກາງ ບັນຍາກາດທີ່ທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ຈັດຕັ້ງຜັນ ຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ຢ່າງຕັ້ງໜ້າ ແລະ ຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມ ປີ 2019 ຢ່າງມີຜົນສຳເລັດໃນຫຼາຍດ້ານ, ພ້ອມດຽວກັນກໍ ພວມອອກແຮງງານແຂ່ງຂັນກັນສ້າງຜົນງານເພື່ອຂ່ຳນັບຮັບຕ້ອນກອງປະຊຸມໃຫຍ່ 3 ຂັ້ນ ກະກຽມໃຫ້ແກ່ກອງປະຊຸມໃຫຍ່ ຄັ້ງທີ XI ຂອງພັກ, ພ້ອມກັບການສະເຫຼີມສະຫຼອງປີທ່ອງ ທ່ຽວ ລາວ-ຈີນ 2019 ຢ່າງເປັນຂະບວນຟົດຟື້ນ.

ການສຶກສາແມ່ນຂະແໜງການໜື່ງທີ່ລັດຖະບານ ໄດ້ໃຫ້ຄວາມສຳຄັນຍິ່ງໃນການປະຕິບັດ ນະໂຍບາຍຂອງພັກ ແລະ ຜັນຂະຫຍາຍແຜນພັດທະນາເສດຖະກິດ-ສັງຄົມຂອງລັດ ການ ພັດທະນາການສຶກສາເປັນການພັດທະນາໃຫ້ມີຄວາມຮູ້, ຄວາມສາມາດນັບມື້ນັບສູງ ເພື່ອ ຕອບສະໜອງຄວາມຮຽກຮ້ອງຕ້ອງການຂອງການພັດທະນາປະເທດຊາດ ໃນປະຈຸບັນ ແລະ ອະນາຄົດ. ໃນສົກຮຽນຜ່ານໆມາໄດ້ດຳເນີນໄປໃນບັນຍາກາດທີ່ດີ ແລະ ການພັດທະນາ ກໍຄື ການປະຕິຮູບການສຶກສາໄດ້ດຳເນີນໄປຕາມທິດທາງຂອງການພັດທະນາແບບຍືນຍົງ, ເຊິ່ງເຫັນວ່າໃນສົກປີຜ່ານມາ ພວກເຮົາໄດ້ມີຜົນສຳເລັດຫຼາຍດ້ານ ເປັນຕົ້ນດ້ານຄຸນນະ ພາບຂອງການສຶກສາ ໄດ້ຮັບການຍົກລະດັບຂຶ້ນຕື່ມ ແນ່ໃສ່ເພື່ອໃຫ້ເທົ່າທຽມກັບມາດຕະ ຖານຂອງບັນດາປະເທດໃນພາກພື້ນ ແລະ ສາກົນ ເທື່ອລະກ້າວ.

ສະແດງອອກແຈ້ງແລ້ວວ່າ ນັກຮຽນລາວເຮົາຈຳນວນໜຶ່ງສາມາດເຂົ້າຮ່ວມການແຂ່ງຂັນ ແລະ ໄດ້ຮັບລາງວັນໃນເວທີການແຂ່ງຂັນດ້ານການສຶກສາໃນລະດັບພາກພື້ນ ແລະ ສາກົນ. ຄຽງຄູ່ກັບຄຸນນະພາບທີ່ປັບປຸງໃຫ້ດີຂຶ້ນ, ດ້ານປະລິມານກໍມີການຂະຫຍາຍຕົວສາມາດບັນລຸ ບາງຕົວເລກຄາດໝາຍຈຳນວນໜຶ່ງ ໃນນັ້ນອັນພົ້ນເດັ່ນແມ່ນ ອັດຕາປະລະການຮຽນຂອງ ນັກຮຽນ ປ1 ຫຼຸດລົງ; ອັດຕາການເຂົ້າຮຽນຂອງເດັກ 5 ປີ ເພີ່ມຂຶ້ນ; ຈຳນວນນັກຮຽນທີ່ສະ ໝັກເຂົ້າສາຍອາຊີວະສຶກສາກໍເພີ່ມຂຶ້ນ.

ກ້າວເຂົ້າສູ່ການໄຂສົກຮຽນໃໝ່ຂອງປີ 2019-2020 ນີ້ ເຖິງວ່າພວກເຮົາຍັງຈະມີອຸປະສັກ ນາໆປະການ, ທັງເລື້ອງໄພທຳມະຊາດຢູ່ໃນບາງເຂດແຂວງ ແລະ ມີຄວາມຫຍຸ້ງຍາກຊົ່ວ ຄາວທາງດ້ານເສດຖະກິດ-ການເງິນກໍຕາມ, ເພື່ອຮັບປະກັນໃຫ້ການຮຽນ-ການສອນໃນສົກ ປີ 2019-2020 ດຳເນີນໄປຢ່າງມີປະສິດທິຜົນ ແລະ ເພື່ອສືບຕໍ່ພັດທະນາລະບົບການສຶກສາ ຂອງປະເທດເຮົາໃຫ້ຂະຫຍາຍຕົວເປັນພື້ນຖານໃຫ້ແກ່ການພັດທະນາເສດຖະກິດ ແລະ ສັງ ຄົມຂອງປະເທດເຮົາ, ທຸກພາກສ່ວນທົ່ວສັງຄົມຈະຕ້ອງໄດ້ພ້ອມກັນເອົາໃຈໃສ່ ປະຕິບັດ ໜ້າທີ່ຂອງຕົນໃຫ້ມີຜົນສຳເລັດດ້ວຍຄຸນນະພາບອັນໃໝ່ຂຶ້ນຊັກໄຊ້ ເປັນຕົ້ນ: ຜູ້ບໍລິຫານ ການສຶກສາສືບຕໍ່ເພິ່ມທະວີຄວາມຮັບຜິດຊອບຕໍ່ໜ້າທີ່ວຽກງານຂອງຕົນໃຫ້ສູງຂຶ້ນ ແລະ ປະຕິບັດກົດໝາຍ ແລະ ລະບຽບການດ້ານການສຶກສາຢ່າງເຂັ້ມງວດ, ພັດທະນາສະຖາບັນ ການສຶກສາຂອງຕົນໃຫ້ມີຄຸນນະພາບ ແລະ ໄດ້ມາດຕະຖານ, ສ້າງໂຮງຮຽນໃຫ້ມີບາດກ້າວ ໃໝ່ ທີ່ນັບມື້ນັບມີຄຸນນະພາບ, ປອດໃສ ແລະ ກ້າວໜ້າທັນສະໄໝ. ບັນດາຄູອາຈານ ສືບຕໍ່ ເພິ່ມທະວີຄວາມຮັບຜິດຊອບຕໍ່ໜ້າທີ່ວຽກງານຂອງຕົນໃນການປະຕິບັດໜ້າທີ່ ເປັນແມ່ ພິມທີ່ດີຂອງຊາດ ດ້ວຍຄວາມຊື່ສັດບໍລິສຸດ ແລະ ມີຈັນຍາບັນ, ເຝິກຝົນ ແລະ ພັດທະນາ ຕົນເອງດ້ານວິຊາສະເພາະ, ເຕັກນິກວິທີການສອນທີ່ສ້າງສັນ, ໃຫ້ທັນກັບສະພາບການ ແລະ ເຕັກໂນໂລຊີໃໝ່ ເພື່ອສົ່ງຄວາມຮູ້ໃຫ້ແກ່ນັກຮຽນ-ນັກສຶກສາຢ່າມີປະສິດທິຜົນ.

ແຫຼ່ງຂໍ້ມູນຈາກ: ໜັງສືພິມ ປະເທດລາວ