ໃນຕອນເຊົ້າວັນທີ 2 ກໍລະກົດ 2020 ນີ້ຢູ່ທີ່ຫ້ອງວ່າການແຂວງຈຳປາສັກ ສາສະດາຈານ ດ໋ອກເຕີ ກິແກ້ວ ໄຂຄຳພິທູນ, ຄະນະເລຂາ ທິການສູນກາງພັກ ລັດຖະມົນຕີກະຊວງຖະ ແຫຼງຂ່າວ ວັດທະນະທຳ ແລະ ທ່ອງທ່ຽວ ທັງແມ່ນຮອງຫົວໜ້າອະນຸກຳມະການເນື້ອໃນກະ ກຽມໃຫ້ແກ່ກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ພ້ອມດ້ວຍຄະນະໄດ້ເດີນທາງມາເຄື່ອນໄຫວຊີ້ນຳວຽກງານຢູ່ແຂວງຈຳປາສັກ ໂດຍໄດ້ຮັບກຽດຕ້ອນຮັບ ແລະ ຮ່ວມເຮັດວຽກກັບຄະນະບໍລິຫານງານພັກແຂວງ, ນຳໂດຍ ດ໋ອກເຕີ ວິໄລວົງ ບຸດດາຄຳ, ກຳມະການສູນກາງພັກ ເລຂາພັກແຂວງ ເຈົ້າແຂວງໆຈຳປາສັກ ພ້ອມ ດ້ວຍບັນດາທ່ານຮອງເຈົ້າແຂວງຄະນະປະຈຳພັກແຂວງ ຫົວ ໜ້າພະແນກການ, ຄະນະອະນຸກໍາມະການເນື້ອໃນກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງຈຳປາສັກ ເຂົ້າຮ່ວມ.

ໃນໂອກາດນີ້ ດ໋ອກເຕີ ວິໄລວົງ ບຸດດາຄຳ ເລຂາພັກແຂວງ, ເຈົ້າແຂວງໆຈຳປາສັກໄດ້ກ່າວຕ້ອນຮັບ ແລະ ລາຍງານສະພາບການຊີ້ນຳໆພາວຽກງານການພັດທະນາເສດ ຖະກິດສັງຄົມຮອບດ້ານ, ການແກ້ໄຂບັນຫາປະກົດການຫຍໍ້ທໍ້ເຊັ່ນ: ສະພາບການປ້ອງກັນສະ ກັດກັ້ນພະຍາດໂຄວິດ 19 ແລະ ການຫ້າງຫາກະກຽມແກ່ການດຳເນີນກອງປະຊຸມໃຫຍ່ຄັ້ງທີ VIIIຂອງອົງຄະນະພັກແຂວງຈຳປາສັກເຊິ່ງໂດຍພື້ນຖານເຫັນວ່າທົ່ວແຂວງຍັງສາມາດຮັກສາໄດ້ຄວາມສະຫງົບໂດຍພື້ນຖານ ສັງຄົມມີຄວາມເປັນລະບຽບຮຽບຮ້ອຍສະພາບເຝົ້າລະວັງປ້ອງກັນພະຍາດໂຄວິດ 19 ຍັງສືບຕໍ່ປະຕິບັດຢ່າງຕໍ່ເນື່ອງເຮັດໃຫ້ທົ່ວແຂວງຍັງບໍ່ພົບຜູ້ຕິດເຊື້ອ ຍ້ອນມີການປະຕິບັດມາດຕະການກັກກັ້ນຜູ້ເດີນທາງມາຈາກຕ່າງປະເທດ 14 ວັນ ຢ່າງເຂັ້ມງວດ.

ສຳລັບການກະກຽມເນື້ອໃນໃຫ້ແກ່ກອງປະຊຸມໃຫຍ່ຂອງອົງຄະນະພັກແຂວງ ໄດ້ສຳເລັດໃນຂັ້ນພື້ນຖານຄາດໝາຍຈະໃຫ້ໄດ້ໄຂກອງປະຊຸມໃນລະຫວ່າງເດືອນກັນຍາ ຫາ ເດືອນພະຈິກ ປີ 2020 ນີ້. ຈາກຮັບຟັງລາຍງານແລ້ວ ສາສະດາຈານ ດ໋ອກເຕີ ກິແກ້ວ ໄຂຄຳພິທູນ ກໍໄດ້ມີຄຳເຫັນໂດຍຕີລາຄາສູງຕໍ່ຄວາມເອົາໃຈໃສ່ນຳພາຂອງຄະນະບໍລິຫານງານພັກແຂວງ ທີສາມາດຍາດໄດ້ຜົນງານຫຼາຍດ້ານ ຈາກນີ້ກໍໄດ້ໃຫ້ທິດຊີ້ນຳຫຼາຍບັນຫາ ເປັນຕົ້ນດ້ານເນື້ອໃນກອງປະຊຸມໃຫຍ່ຕ້ອງເສີມຂະຫຍາຍຜົນງານການນໍາພາ 5 ປີທີ່ຜ່ານມາ, ບັນຫາທີຄົງຄ້າງຕ້ອງກໍານົດເຂົ້າໃນການປັບປຸງແກ້ໄຂ ແລະຖອດຖອນເອົາບົດຮຽນ ສ່ວນແຜນພັດທະນາເສດຖະກິດ-ສັງຄົມ 5 ປີຕໍ່ໜ້າຕ້ອງໄດ້ປັບປຸງໃຫ້ສອດຄ່ອງກັບສະພາບຈຸດພິເສດທ່າແຮງຂອງແຂວງ ໃນປະຈຸບັນ ແລະສະເພາະໜ້າ ພ້ອມທັງກຳນົດແຜນການຈຸດສຸມລະອຽດເພື່ອໃຫ້ໄປຕາມແນວທາງນະໂຍບາຍຂອງພັກໃນໄລຍະໃໝ່ເຮັດໃຫ້ແຜນງານການພັດທະນາເສດຖະກິດສັງຄົມທີ່ວາງອອກ ແລ້ວສາມາດຈັດຕັ້ງຜັນຂະຫຍາຍຢ່າງມີປະສິດທິຜົນຢ່າງແທ້ຈິງ.

ພາຍຫຼັງຊີ້ນຳດ້ານເນື້ອໃນແກ່ການກະກຽມກອງປະຊຸມໃຫຍ່ອົງຄະນະພັກແຂວງຈຳປາສັກແລ້ວ ສາສະດາຈານ ດ໋ອກເຕີ ກິແກ້ວ ໄຂຄຳພິທູນ ລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ຍັງໄດ້ເປັນກຽດຊີ້ນຳການຈັດຕັ້ງປະຕິບັດວຽກງານ ຖວທ ຢູ່ພະແນກຖະແຫຼງຂ່າວວັດທະນະທຳ ແລະ ທ່ອງທ່ຽວແຂວງຈຳປາສັກອີກດ້ວຍ.

ເກດສະໜາ ແກ້ວສຸວັນນະແສງ