ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ

ເພື່ອຫຼຸດຜ່ອນຜົນກະທົບຕໍ່ເສດຖະກິດລາວ ໂດຍສະເພາະ ຂະແໜງການທ່ອງທ່ຽວ ລັດຖະບານໄດ້ອອກຂໍ້ແນະນຳໃຫ້ບັນດາຫົວໜ່ວຍທຸລະກິດທ່ອງທ່ຽວກ່ຽວກັບມາດຕະການຮອງຮັບນັກທ່ອງທ່ຽວເພື່ອຟື້ນຟູການທ່ອງທ່ຽວພາຍຫຼັງ ໂຄວິດ -19 ໂດຍສົມທົບກັບຂະແໜງສາທາລະນະສຸກຂັ້ນສູນກາງ ແລະ ທ້ອງຖິ່ນ ຊຸກຍູ້ພາກທຸລະກິດສ້າງລາຍການທ່ອງທ່ຽວໃຫ້ຫຼາກຫຼາຍ ແນໃສ່ສົ່ງເສີມການທ່ອງທ່ຽວແບບ “ລາວ ທ່ຽວ ລາວ”.

ຫໍພະແກ້ວ

ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ລາຍງານເມື່ອວັນທີ 1 ກໍລະກົດ 2020 ທີ່ຜ່ານມາ ວ່າເພື່ອຊຸກຍູ້ສົ່ງເສີມການທ່ອງທ່ຽວລາວໃຫ້ກັບຄືນສູ່ສະພາບປົກກະຕິໂດຍໄວ ແລະ ກະຕຸ້ນການທ່ອງທ່ຽວແບບ “ລາວ ທ່ຽວ ລາວ” ທັງນີ້, ກະຊວງ ຖວທ ກໍຄື ລັດຖະບານ ໄດ້ມີການຊຸກຍູ້ພາກທຸລະກິດຮ່ວມກັນສ້າງລາຍການທ່ອງທ່ຽວໃຫ້ຫຼາກຫຼາຍ ແລະ ມີສ່ວນຫຼຸດຫຼາຍຮູບແບບ ເປັນຕົ້ນແມ່ນ ສ່ວນຫຼຸດລາຍການທ່ອງທ່ຽວ ສ່ວນຫຼຸດໂຮງແຮມ, ເຮືອນພັກ, ຮ້ານອາຫານ-ເຄື່ອງດື່ມ ແລະ ອື່ນໆ ພ້ອມຊຸກຍູ້ໃຫ້ແຕ່ລະແຂວງ ຫຼື ຕົວເມືອງທ່ອງທ່ຽວ ສ້າງກິດຈະກຳການທ່ອງທ່ຽວທີ່ຕິດພັນກັບວັດທະນະທຳ ຮີດຄອງປະເພນີຂອງທ້ອງຖິ່ນ ວິຖີຊີວິດຂອງທ້ອງຖິ່ນ ຫັດຖະກຳທ້ອງຖິ່ນ ອາຫານທ້ອງຖິ່ນ ແລະ ການທ່ຽວຊົມທຳມະຊາດ ເພື່ອຟື້ນຟູຄວາມເຊື່ອໝັ້ນຂອງນັກທ່ອງທ່ຽວທັງພາຍໃນ ແລະ ຕ່າງປະເທດ, ເນັ້ນໃສ່ປະຕິບັດມາດຕະການດ້ານຄວາມປອດໄພ ວິທີການຮັກສາສຸຂະອະນາໄມ ການກະກຽມການປ້ອງກັນຕົນເອງກ່ອນການເດິນທາງ ກ່ຽວກັບບັນຫາດ້ານສຸຂະອະນາໄມ ແລະ ຄວາມປອດໄພຂອງນັກທ່ອງທ່ຽວ ຜູ້ໃຫ້ບໍລິການຂອງພາກລັດ ແລະ ພາກທຸລະກິດໃນຂະແໜງການທ່ອງທ່ຽວ ຄຽງຄູ່ກັບການສົ່ງເສີມຜະລິດຕະພັນການທ່ອງທ່ຽວທີ່ໂດດເດັ່ນຂອງລາວ ເພື່ອໃຫ້ຄົນລາວພ້ອມພຽງໃຈກັນອອກເດີນທາງທ່ອງທ່ຽວ ພາຍໃນ ຫຼື “ລາວ ທ່ຽວ ລາວ”.

ວັດພູ ຈຳປາສັກ

ພ້ອມດຽວກັນນັ້ນ ຍັງຈະຊຸກຍູ້ ແລະ ສົ່ງເສີມບັນດາແຂວງໃນທົ່ວປະເທດ ຈັດກິດຈະກຳ ເພື່ອສົ່ງເສີມການທ່ອງທ່ຽວລາວ ເຊັ່ນ: ງານບຸນປະເພນີຂອງແຕ່ລະທ້ອງຖິ່ນ, ງານເທດສະການອາຫານແຕ່ລະພາກ, ເທດສະການດຶ່ມນ້ຳຊາ 400 ປີ, ເທດສະການກາເຟລາວ, ເທດສະການອາຫານພື້ນບ້ານ, ງານວາງສະແດງ ແລະ ຂາຍສິນຄ້າເຄື່ອງຫັດຖະກຳ ພ້ອມນັ້ນ, ຍັງຈະສ້າງວິດີໂອສັ້ນ ເພື່ອໂຄສະນາການທ່ອງທ່ຽວພາຍຫຼັງສິ້ນສຸດການລະບາດຂອງພະຍາດ ໂຄວິດ -19 ແລ້ວໂພສຕາມສື່ອອນລາຍຕ່າງໆ ເຊັ່ນ: FB, Twitter, IG, TikTok, Wechat ແລະ Youtube, ພ້ອມນັ້ນ ກໍຈະຈັດກິດຈະກຳຮ່ວມກັບປະເທດໃກ້ຄຽງ ເພື່ອກະຕຸ້ນການທ່ອງທ່ຽວ ເຊັ່ນ: ຂີ່ລົດຖີບ, ງານວາງສະແດງຜະລິດຕະພັນການທ່ອງທ່ຽວ ແລະ ອື່ນໆ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ວັນອາທິດ)