ສູນກາງແນວລາວສ້າງຊາດ ຮ່ວມກັບອົງການຢູນີເຊັບ ປະຈໍາ ສປປ ລາວ ແລະ ອົງການແນວລາວສ້າງຊາດແຂວງເຊກອງ ໄດ້ຈັດກອງປະຊຸມປຶກສາຫາລື ກ່ຽວກັບການມີສ່ວນ ຮ່ວມໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຂອງແນວລາວສ້າງຊາດ, ວຽກງານສຶກສາ ແລະ ວຽກງານສັກຢາກັນພະຍາດ, ວຽກງານໂພສະນາການ ໄດ້ຈັດຂຶ້ນໃນວັນທີ 6 ກໍລະ ກົດ ຫ້ອງວ່າການແຂວງເຊກອງ ໂດຍການເຂົ້າຮ່ວມ ຂອງທ່ານ ນາງ ບຸນຮຽງ ບຸນຈິດ ກຳມະການສູນກາງແນວລາວສ້າງຊາດ, ປະທານແນວລາວສ້າງຊາດແຂວງ, ທ່ານ ວັນດີ ຈັນສົມບັດ ຮອງຫົວ ໜ້າກົມຊົນເຜົ່າສູນກາງແນວລາວສ້າງຊາດ, ທ່ານ ຕະບອງເພັດ ພຸດທະວົງ ຊ່ຽວຊານວຽກງານໂຄ ສະນາຈາກອົງການອຸຍນິເຊັບປະຈໍາລາວ ພ້ອມນີ້ມີບັນດາຄະນະກຳມະການສະເພາະກິດຂັ້ນແຂວງ, ມີຂະແໜງການທີ່ກ່ຽວຂ້ອງຂັນແຂວງ-ຂັ້ນເມືອງເຂົ້າຮ່ວມ.

ທ່ານ ວັນດີ ຈັນສົມບັດ ຮອງຫົວໜ້າກົມຊົນເຜົ່າສູນກາງແນວລາວສ້າງຊາດ ກ່າວວ່າ: ກອງປະຊຸມຄັ້ງນີ້ບັນດາຂະແໜງການທີ່ກ່ຽວຂ້ອງ ໄດ້ປຶກສາຫາລືບາງບັນຫາກ່ຽວກັບເດັກ ເປັນຕົ້ນແມ່ນການຕອບໂຕ້ການແຜ່ລະບາດຂອງພະຍາດໂຄວິດ-19 ຜົນກະທົບ ແລະ ທິດທາງໃນຕໍ່ໜ້າໃນການຄວບຄຸມ ເພື່ອບໍ່ໃຫ້ກັບມາເກີດໃນຮອບ2ອີກ, ການເຜີຍແຜ່ຂໍ້ມູນ-ຂ່າວສານ, ອຸປະກອນການໂຄສະນາ, ວຽກງານການຮັກສາສຸຂະອະນາໄມ, ໂພສະນາການ, ພ້ອມນີ້ຍັງໄດ້ປຶກສາຫາລືກ່ຽວກັບວຽກງານສຶກສາໃນການກັບຄືນສູ່ໂຮງຮຽນ ໂດຍຄໍາຂວັນທີ່ວ່າ: ປອດໄພກັບໄປໂຮງຮຽນ, ຊຶ່ງການປຶກສາຫາລືໃນຄັ້ງນີ້ເພື່ອເປັນບົດຮຽນທີ່ສໍາຄັນໃນການປ້ອງກັນພະຍາດໂຄວິດ-19 ໃນຕໍ່ໜ້າ. ຫຼັງຈາກນັ້ນທີມງານພ້ອມດ້ວຍແນວລາວສ້າງຊາດແຂວງ ກໍຈະໄດ້ຈັດກອງປະຊຸມປຶກສາຫາລືວຽກງານດັ່ງກ່າວນີ້ ຢູ່ເມືອງກະລຶມ ແລະ ເມືອງດາກຈຶງ ແຂວງເຊກອງຕື່ມອີກ.

ແຫຼ່ງຂ່າວມາຈາກ: ມີເດຍລາວແຂວງເຊກອງ