​ໂຄງ​ການ​ກໍ່ສ້າງ ສະຖານີນະຄອນຫລວງວຽງຈັນ (ສະຖານີ​ລົດໄຟລາວ-ຈີນ) ​ໄດ້​ເລີ່​ມລົງມື​ກໍ່ສ້າງ​ແລ້ວ ຢູ່ບ້ານໄຊ ເມືອງໄຊທານີ ນະຄອນຫລວງວຽງຈັນ, ຄາດ​ວ່າການ​ກໍ່ສ້າງຈະ​ໃຫ້​ສຳ​ເລັດ 100% ​ໃນ​ທ້າຍ​ປີ 2021. ງານ​ເປີດ​​ໂຄງການ​ກໍ່ສ້າງ​ດັ່ງກ່າວ, ​ໄດ້​ມີຂຶ້ນ​ໃນວັນທີ 3 ກໍລະກົດ 2020.

​ໂອກາດ​ດັ່ງກ່າວ, ທ່ານ ຈັນຕຸລາ ພະນະລາສີ ຫົວໜ້າຄະນະຄຸ້ມຄອງໂຄງການກໍ່ສ້າງທາງລົດໄຟລາວ-ຈີນ ໄດ້ລາຍ​ງານ​ໃຫ້​ຮູ້​ວ່າ: ໂຄງການກໍ່ສ້າງສະຖານີ ນະຄອນຫລວງວຽງຈັນ, ມີເນື້ອທີ່ທັງ​ໝົດ 150 ເຮັກຕາ, ສະເພາະອາຄານສະຖານີ ມີ 14.500 ກວ່າຕາແມັດ, ສາມາດຮັບຮອງຜູ້ສານ​ໄດ້ 2.500 ຄົນ, ເປັນສະຖານີໃຫຍ່ແຫ່ງໜຶ່ງ ຂອງໂຄງການທາງລົດໄຟລາວ-ຈີນ ແລະ ມີການເຊື່ອມຕໍ່ກັບສະຖານີຂົນ-ສົ່ງສິນຄ້າ ທີ່ຈະກໍ່ສ້າງຂຶ້ນຢູ່ທາງລົດໄຟທ່ານາແລ້ງ ແລະ ໃນແຜນຕໍ່ໜ້າຍັງຈະສ້າງສະຖານີ ກັບເສັ້ນທາງລົດໄຟອື່ນໆຕື່ມອີກ.

ໂຄງການກໍ່ສ້າງທາງລົດໄຟ ລາວ-ຈີນ ມາຮອດທ້າຍ ​ເດືອນພຶດສະພາ 2020 ການ​ກໍ່ສ້າງປະຕິບັດ​ສໍາເລັດ 89,43% ຂອງວຽກງານກໍ່ສ້າງພື້ນຖານໂຄງລ່າງທາງລົດໄຟ, ໃນນັ້ນ ຊີເຈາະອຸໂມງທັງໝົດ 75 ອຸໂມງ, ໃນນີ້ ເຈາະທະລຸແລ້ວ 65 ອຸໂມງ, ລົງມືກໍ່ສ້າງຂົວ 164 ແຫ່ງ, ໃນຈໍານວນທັງໝົດ 164 ແຫ່ງ, ໃນນີ້ສ້າງເສົາຂົວສໍາເລັດ 1.959 ເສົາ, ສໍາເລັດການວາງຂາງຂົວ 746 ຊ່ວງເສົາ. ສໍາລັບວຽກງານການວາງລາງລົດໄຟ ແມ່ນເລີ່ມແຕ່ບ້ານຫ້ວຍນໍ້າເຢັນ ເມືອງນາຊາຍທອງ ນະຄອນ ຫລວງວຽງຈັນ ຫາ ແຂວງຫລວງພະບາງ ສໍາເລັດ​ແລ້ວ 49,7 ກິໂລແມັດ ຂອງຄວາມຍາວທັງໝົດ 409 ກິໂລແມັດ.

​ໂອກາດ​ດຽວ​ກັນ, ທ່ານ ສ້ຽວຊຽນເຫວິນ ຜູ້ອໍານວຍການໃຫຍ່ ບໍລິສັດທາງລົດໄຟ ລາວ-ຈີນ ໄດ້ຮຽກຮ້ອງໃຫ້ທຸກພາກສ່ວນທີ່ຮັບຜິດຊອບຈົ່ງຢຶດໝັ້ນຄຸນນະພາບເປັນຫລັກ, ຊຸກຍູ້ການດໍາເນີນການຄຸ້ມຄອງແບບມາດຕະຖານ ແລະ ບັນລຸຕາມຄວາມຕ້ອງ ການແຕ່ລະໜ້າວຽກ, ພ້ອມທັງເພີ່ມທະວີຄຸ້ມຄອງຄວາມປອດໄພ, ຮັບປະກັນການກໍ່ສ້າງດ້ວຍຄວາມປອດໄພ ແລະ ເປັນໄປຕາມຂັ້ນຕອນ, ເອົາໃຈໃສ່ຕໍ່ວຽກງານປະດັບ ແລະ ​ເອົາ​ໃຈ​ໃສ່,​​ ໃຫ້​ຄວາມ​ສຳຄັນຕໍ່​ວຽກງານ​ປະດັບ, ຕົບແຕ່ງສະຖານນີໃຫ້ສະແດງເຖິງວັດທະນະທໍາ ລາວ-ຈີນ ແລະ ກາຍເປັນໂຄງການມິດຕະພາບ ລາວ-ຈີນ ຢ່າງແທ້ຈິງ ​ແລະ ເພີ່ມທະວີຈັດຕັ້ງປະ​ຕິ​ບັດ​ວຽກງານການກໍ່ສ້າງໃຫ້ສຳ​ເລັດຕາມເປົ້າໝາຍທີ່ໄດ້ກຳນົດໄວ້.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)