ໃນສະໄໝນີ້ທຸກຄົນສາມາດຫຼີ້ນ “ເຟສບຸກ” ໄດ້ໝົດທຸກຄົນ ລວມທັງຢາກຈະໂພດ ຫຼື ສະແດງຄຳຄິດຄຳເຫັນກໍ່ສາມາດເຮັດໄດ້ ຈົນບາງເທື່ອບໍ່ສົນໃຈ ຫຼື ເບິ່ງຂ້າມສີ່ງທີ່ຄວນເຮັດ ແລະ ສິ່ງທີ່ບໍ່ຄວນເຮັດ ເພາະອາດຈະສ້າງຄວາມເສຍຫາຍໃຫ້ແກ່ຈິດໃຈຂອງຄົນອື່ນ ແຖມຍັງຈະເຮັດໃຫ້ທ່ານເບິ່ງບໍ່ດີໃນສາຍ ຕາຂອງຄົນອື່ນນຳອີກ. ມື້ນີ້ເຮົານຳເອົາ 9 ລັກສະນະໃນເຟສບຸກມາຝາກທຸກທ່ານ!

  • ຖາມ ແລະ ຫາຍຕົວໄປ: ເຊື່ອວ່າຫຼາຍຄົນເຄີຍພົບເຫັນເລື້ອຍໆ ມີບາງຄົນກຳລັງສົນທະນາ ຫຼື ສະແດງຄວາມເຫັນຕໍ່ໂພດ ເມື່ອໝູ່ຖາມນັ້ນຖາມນີ້ເວລາຕອບກັບພັດຫາຍໄປ, ຫາຍ ໄປແບບງົງໆ ແລະ ຫາຍໄປແບບງຽບໆ ເຊິ່ງບໍ່ເປັນຜົນດີຕໍ່ທ່ານເລີຍ ທ່ານຄວນຈະຕອບກັບຄືນ ຫຼື ກົດໄລໃຫ້ກໍ່ຍັງດີ.
  • ໂພດບ່ອນເຮັດວຽກໃນທາງລົບ: ການໂພດກ່ຽວກັບບ່ອນເຮັດວຽກບໍ່ຕ່າງຫຍັງກັບທຳລາຍພາບພົດຂອງອົງກອນ ແນ່ນອນຖ້າຄົນໃນບ່ອນເຮັດວຽກເອົາຂ່າວເພື່ອໄປລາຍງານຫົວ ໜ້າ ຮັບປະກັນວ່າເລື່ອງນີ້ຕ້ອງຍາວແນ່ນອນ ດີບໍ່ດີທ່ານອາດຈະຖືກໄລ່ອອກ ເພາະສະນັ້ນຖ້າທ່ານຍັງບໍ່ຕ້ອງການປ່ຽນວຽກຢ່າໂພດແນວທີ່ມີຄວາມສ່ຽງແບບນີ້ຈະດີກ່ວາ.
  • ຄຳເຫັນແບບສຸພາບອ່ອນໂຍນ: ຄຳເຫັນທີ່ບໍ່ມີຄວາມຄິດສ້າງສັນ ຫຼື ບໍ່ທັນໄດ້ຄິດອາດຈະສົ່ງຜົນກະທົບຕໍ່ຄົນອື່ນໄດ້ເຊັ່ນກັນ ແລະ ກໍ່ໃຫ້ ເກີດຄວາມເສຍຫາຍ ສ້າງຄວາມບໍ່ພໍໃຈ ຫຼື ເຮັດໃຫ້ເກີດຄວາມແຕກແຍກ ເຊິ່ງຖ້າຖືກກະແສຕີກັບ ອາດຈະຖືກຊາວເນັດລຸມໃສ່ກໍ່ເປັນໄດ້ ຖ້າມີຄຳເຫັນແບບສ້າງສັນບໍ່ໄດ້ກໍ່ຄວນຢູ່ເສີຍໆ  ແລະ ເປັນຜູ້ອ່ານທີ່ດີຈະດີກ່ອນ.
  • ໂພດກ່ຽວກັບຫົວຂໍ້ຂອງຜູ້ອື່ນ: ການທີ່ຜູ້ໃດຜູ້ໜຶ່ງໂພດຂໍ້ຄວາມລົງໃນເຟສບຸກ ແລະ ແບ່ງ ປັນເປັນສາທາລະນະ ແຕ່ກໍ່ບໍ່ແມ່ນວ່າທ່ານຈະເອົາເລື່ອງເຫຼົ່ານັ້ນມາປະກອບເປັນຄຳຄິດຄຳເຫັນເພື່ອແບ່ງປັນ ຫຼື ສົນທະນາກັນເພື່ອໃຫ້ມີຄວາມມ່ວນຊື່ນ ເພາະວ່າຜູ້ທີ່ຖືກກະ ທົບບໍ່ໄດ້ມ່ວນຄືກັນກັບທ່ານ ນອກຈາກນັ້ນອາດຈະຖືກເລີກຄົບໃນເຟສບຸກ ແລະ ໃນຊີວິດຕົວຈິງ.
  • ຖ້າບໍ່ຢາກເບິ່ງບໍ່ດີກໍ່ຢ່າໂພດແນວບໍ່ດີ: ການໂພດທຸກສີ່ງທຸກຢ່າງລົງໃນໜ້າທຳອິດໃນເຟສບຸກຂອງທ່ານ ກໍ່ຄືກັບການສະແດງວ່າເຈົ້າເປັນຄົນແບບໃດ ຫຼື ສົນໃຈຫຍັງ ເພາະສະນັ້ນຖ້າທ່ານບໍ່ຕ້ອງການໃຫ້ໃຜເບິ່ງໃນທາງທີ່ບໍ່ດີກໍ່ບໍ່ຄວນໂພດ ຫຼື ແບ່ງປັນສີ່ງທີ່ບໍ່ດີ ຍົກຕົວ ຢ່າງ: ບໍ່ຕ້ອງການຖືກເບີ່ງວ່າເປັນຄົນໂງ່ກໍ່ບໍ່ຄວນໂພດສີ່ງທີ່ມີຄວາມສ່ຽງ ຫຼື ສີ່ງທີ່ຊັກຊວນຄົນອື່ນໃຫ້ຄິດແບບນັ້ນ.
  • ຖ່າຍຮູບຄົນອື່ນໂດຍບໍ່ໄດ້ຮັບອະນຸຍາດ: ບາງຄົນເຫັນຄົນອື່ນແລ້ວຄິດຢາກມີຄວາມມ່ວນເອົາມາໂພດ ຍົກຕົວຢ່າງ: ຂ່າວທີ່ມັກເກີດຂື້ນເລື້ອຍໆຄົນທີ່ຖ່າຍຮູບເພື່ອວິພາກວິຈານ ແລະ ເພື່ອຄວາມມ່ວນຊື່ນ ເຊີ່ງມັນບໍ່ຕ່າງຫຍັງກັບການເວົ້າເຍາະເຍີ້ຍ ດັ່ງນັ້ນພະຍາຍາມຄິດເຖິງໃຈເຂົາໃຈເຮົາ ຖ້າທ່ານບໍ່ມັກເຂົາເຂົາກໍ່ບໍ່ມັກຄືກັນ ນອກຈາກນັ້ນທ່ານອາດຈະຖືກຟ້ອງຮ້ອງເຊັ່ນກັນ.
  • ຢ່າລືມໃຫ້ຄວາມໄວ້ວາງໃຈ: ແທ້ຈິງແລ້ວກໍ່ບໍ່ແມ່ນເລື່ອງດີປານໃດກ່ຽວກັບການນຳໃຊ້ສີ່ງທີ່ຄົນອື່ນສ້າງໂພດໃນພື້ນທີ່ຂອງຕົນເອງ ຫຼື ເວົ້າງ່າຍໆ ຄ້າຍຄືກັບກ໊ອບປີ້ນັ້ນເອງ ແຕ່ຖ້າທ່ານຈະເອົາມາໃຊ້ກໍ່ຄວນໃຫ້ກຽດເຈົ້າຂອງດ້ວຍ ແຕ່ວິທີທີ່ດີທີ່ສຸດແມ່ນການແບ່ງປັນຈາກໂພດຕົ້ນສະບັບ.
  • ຢ່າຝາກຮ້ານໂລເລ: ເຂົ້າໃຈວ່າການເຮັດທຸລະກິດຕ້ອງມີການພົວພັນ ແລະ ປະສານງານກັນ ແຕ່ຖ້າໄປຝາກຮ້ານໂລເລໃນຂົງເຂດຂອງຄົນອື່ນມັນບໍ່ແມ່ນສິ່ງທີ່ດີເລີຍ ອາດຈະເປັນການລົບກວນ ແລະ ເຮັດໃຫ້ຄົນອື່ນລຳຄານ ຖ້າທ່ານຕ້ອງການຢາກຝາກຈາກຮ້ານແທ້ໆ ຄວນກວດເບິ່ງຄວາມເໝາະສົມຂອງໂພດນັ້ນວ່າສາມາດຝາກໄດ້ ຫຼື ບໍ່?
  • ຢ່ານຳເອົາເລື່ອງໃນເຟສບຸກມາເວົ້າໃນຊີວິດຕົວຈິງ: ບາງຄົນທີ່ມັກໂພດອາດຈະຕ້ອງການຢາກລະບາຍອາລົມ ເມື່ອໂພດລົງແລ້ວທຸກຢ່າງກໍ່ຈົບ ດັ່ງນັ້ນທ່ານບໍ່ຈຳເປັນຕ້ອງເວົ້າ ຫຼື ຂຸດຂື້ນມາເວົ້າຕໍ່ໜ້າເພາະມັນອາດຈະເຮັດໃຫ້ຄົນອື່ນຮູ້ສຶກບໍ່ດີ ແລະ ສີ່ງທີ່ສຳຄັນທີ່ສຸດນັ້ນບໍ່ແມ່ນເລື່ອງຂອງທ່ານ!

ຈາກທັງໝົດ 9 ຂໍ້ຂ້າງເທິງທີ່ກ່າວມານັ້ນ ທ່ານພໍຈະຄິດເຫັນພາບອອກ ຫຼື ບໍ່? ວ່າສີ່ງຄວນເຮັດ ແລະ ບໍ່ຄວນເຮັດໃນ Facebook ຫາກຮູ້ເຊັ່ນນີ້ແລ້ວທ່ານຄວນປະຕິບັດຕໍ່ຄົນອື່ນດ້ວຍຄວາມສຸພາບ, ມີມາລະຍາດ, ເອົາໃຈເຂົາມາໃສ່ໃຈເຮົາ ຖ້າໃຜຍັງມີນິໄສເຫຼົ່ານີ້ຢູ່ແນະນໍາວ່າຄວນເຊົາດີກ່ວາ.