ແຂວງອັດຕະປຶ ເປັນອີກແຂວງໜຶ່ງທີ່ເອົາໃຈໃສ່ປະຕິບັດຕາມແຈ້ງການຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແພ່ລະບາດຂອງພະຍາດໂຄວິດ 19 ໃນແຕ່ລະໄລຍະໄດ້ດີພໍສົມຄວນ.

ທ່ານ ນາງ ທິດສະຫວັນ ກຸນນະສິດ ຜູ້ອຳນວຍການໂຮງຮຽນປະຖົມສົມບູນເຊກອງ ເມືອງສາມັກຄີໄຊ ແຂວງອັດຕະປື ໄດ້ລາຍງານຕໍ່ສື່ມວນຊົນ ໃນວັນທີ 7 ກໍລະກົດ 2020 ນີ້ວ່າ ຜ່ານມາໂຮງຮຽນປະຖົມສົມບູນເຊກອງໄດ້ປະຕິບັດຕາມມາດຕະການ ແລະ ແຈ້ງການໃນແຕ່ລະໄລຍະ ທີ່ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແພ່ລະບາດຂອງພະຍາດໂຄວິດ 19 ວາງອອກຢ່າງເຂັ້ມງວດ ເປັນຕົ້ນ ແມ່ນໄດ້ມີການປິດການຮຽນ-ການສອນ ໃນໄລຍະທີ່ມີການແຜ່ລະບາດ ຕັ້ງແຕ່ວັນທີ 22 ມີນາ 2020 ໃນການພັກຮຽນກໍ່ໄດ້ເນັ້ນໃຫ້ນັກຮຽນເຮັດວຽກບ້ານຢູ່ເຮືອນເປັນຈຳນວນຫຼາຍ ເນື່ອງຈາກວ່າການຮຽນຜ່ານສື່ອອນລາຍແມ່ຍັງພົບຄວາມຫຍຸ້ງຍາກ ຍ້ອນບໍ່ມີເຄື່ອງມືໃນການຮຽນອອນລາຍ. ຈົນມາເຖິງຕົ້ນເດືອນ ມິຖຸນາ ກໍ່ໄດ້ມີການທະຍອຍເປີດການຮຽນ-ການສອນຄືນ ໂດຍເລີ່ມຈາກຊັ້ນ ປ5 ແລະ ທະຍ່ອຍເປີດອີກຫຼາຍຊັ້ນຮຽນໃນໄລຍະຕໍ່ມາ.

ທ່ານ ຜູ້ອຳນວຍການໂຮງຮຽນປະຖົມສົມບູນເຊກອງ ກ່າວຕື່ມວ່າ: ໃນການເປີດຮຽນຄືນນີ້ ແມ່ນໄດ້ແຍກຈຳນວນນັກຮຽນຈາກຫ້ອງດຽວກັນອອກເປັນ 2 ຫ້ອງ ໂດຍໃຫ້ຄູປະຈຳຊັ້ນທຽວສອນທັງ 2 ຫ້ອງ ພ້ອມກັນ ແລະ ອາທິດໜຶ່ງສອນພຽງ 3 ວັນເທົ່ານັ້ນ ແຕ່ກໍ່ໄດ້ປະຕິບັດຕາມລະບຽບຢ່າງເຄັ່ງຄັດ ທັງຄູສອນ ແລະ ນັກຮຽນ ໂດຍສະເພາະແມ່ນການຮັກສາຄວາມສະອາດເຊັ່ນ: ການໃສ່ຜ້າປິດປາກ-ດັງ, ການລ້າງມືໃຫ້ສະອາດດ້ວຍເຈ່ວລ້າງມື ແລະ ການຮັກສາໄລຍະຫ່າງ ຂອງນັກຮຽນ ເພື່ອເປັນການປ້ອງກັນພະຍາດໂຄວິດ-19 ເຂົ້າສູ່ຕົນເອງ ແລະ ຄົນອ້ອມຂ້າງ. ພ້ອມດຽວກັນນີ້ ທາງໂຮງຮຽນກໍ່ໄດ້ເຮັດໜັງສືແຈ້ງເຖິງອຳນາດການປົກຄອງບ້ານ ບໍລິເວນໃກ້ຄຽງ ເຖິງພໍ່ແມ່ຜູ້ປົກຄອງ ໃຫ້ເອົາໃຈໃສ່ລູກຫຼານ ໃນໄລຍະທີ່ມີການແຜ່ລະບາດ ສັງເກດເຫັນວ່າ ທັງຜູ້ປົກຄອງ ແລະ ນັກຮຽນ ໃຫ້ການຮ່ວມມື ແລະ ເອົາໃຈໃສ່ປະຕິບັດຕາມເປັນຢ່າງດີ.

ໂຮງຮຽນປະຖົມສົມບູນເຊກອງ ມີນັກຮຽນທັງໝົດ 356 ຄົນ, ຍິງ 128 ຄົນ, ມີຄູທັງໝົດ 16 ຄົນ, ມີຫ້ອງຮຽນທັງໝົດ 15 ຫ້ອງຮຽນ.

ຜ່ານການສຳພາດນັກຮຽນແມ່ນໄດ້ຮູ້ວ່າ ນັກຮຽນສ່ວນຫຼາຍ ບໍລິໂພກຂໍ້ມູນຂ່າວສານຜ່ານສື່ສັງຄົມອອນລາຍ ແລະ ໂທລະພາບ ເຊິ່ງມີຄວາມຕື່ນຕົວໃນການຮັກສາອະນາໄມຕົນເອງ ໂດຍການໃສ່ຜ້າອັດປາກ-ດັງ, ການລ້າງມືໃຫ້ສະອາດດ້ວຍເຈ່ວລ້າງມືຫຼັງຈາກເຮັດກິດຈະກຳຕ່າງໆ, ການຮັກສາໄລຍະຫ່າງຈາກໝູ່ 2 ແມັດ.

ປະຈຸບັນໂຮງຮຽນປະຖົມສົມບູນເຊກອງ ຢູ່ໃນຂັ້ນຕອນການສອບເສັງລະຫວ່າງ ຊັ້ນ ປ1 ເຖິງ ປ4 ແລະ ຈະສຳເລັດການສອບເສັງຈົບຊັ້ນໃນວັນທີ 9 ກໍລະກົດ 2020 ນີ້. ສ່ວນຊັ້ນ ປ5 ແມ່ນຈະມີການສອບເສັງຕາມເວລາກຳນົດໝາຍໃນຂອບເຂດທົ່ວປະເທດ ໂດຍເລີ່ມແຕ່ວັນທີ 16 ກໍລະກົດ 2020 ເປັນຕົ້ນໄປແລະຈະສືບຕໍ່ປະຕິບັດມາດຕະການດັ່ງກ່າວໄປຈົນກວ່າຈະມີການປ່ຽນແປງໃນໄລຍະໃໝ່.

Medialaos MMD