ຕອນເຊົ້າຂອງວັນທີ 7 ກໍລະກົດ 2020, ທີ່ແຂວງຈຳປາສັກ ທ່ານ ວັນນະໄຊ ຊາດຕະກຸນ ຫົວໜ້າພະແນກສາທາລະນະສຸກ ແຂວງຈຳປາສັກ ໄດ້ໃຫ້ສຳພາດ ກ່ຽວກັບການຮັບມືພະຍາດໂຄວິດ-19 ໃນໄລຍະຜ່ານມາ ແລະ ແຜນໃນຕໍ່ໜ້າ ຕໍ່ສື່ມວນຊົນວ່າ: ມາດຕະການປ້ອງກັນພະຍາດໂຄວິດ-19 ໃນໄລຍະຜ່ານມາ ໄດ້ປະຕິບັດຕາມແຈ້ງການ ຂອງກະຊວງສາທາລະນະສຸກ ກໍຄື ກົມພະຍາດຕິດຕໍ່ ພະແນກສາທາລະນະສຸກ ເຊິ່ງເລີ່ມຈັດຕັ້ງປະຕິບັດມາດຕະການໃນຕົວຈິງ ໂດຍແຂວງຈຳປາສັກ ມີ 3 ດ່ານສາກົນ ຄື: ດ່ານໜອງນົກຂຽນ, ດ່ານວັງເຕົ່າ-ຊ່ອງເມັກ ແລະ ດ່ານສະໜາມບິນສາກົນປາກເຊ, ໂດຍແຕ່ລະດ່ານໄດ້ແຕ່ງຕັ້ງພະນັກງານແພດ ລົງໄປປະຈຳການ ເພື່ອໄປເກັບກຳຂໍ້ມູນການເຂົ້າ-ອອກ ຂອງປະຊາຊົນ.

ພາຍຫລັງມີການລະບາດຂອງພະຍາດໂຄວິດ-19 ທາງແຂວງໄດ້ມີການຈັດຕັ້ງປະຕິບັດວຽກງານໂຄວິດ-19 ໂດຍແບ່ງອອກເປັນ 3 ໄລຍະ ຄື: ໄລຍະທີ 1 ເປັນໄລຍະທີ່ບໍ່ທັນມີກໍລະນີລາຍງານ, ໄລຍະທີ 2 ເປັນໄລຍະທີ່ລັດຖະບານ ເລີ່ມອອກແຈ້ງການປິດດ່ານສາກົນ ແລະ ດ່ານປະເພນີຕ່າງໆ ແລະ ໄລຍະທີ 3 ເປັນໄລຍະທີ່ມີມາດຕະການ ພາຍຫລັງທີ່ພົບກໍລະນີຜູ້ຕິດເຊື້ອໃນ ສປປ ລາວ ຄືໃນນະຄອນຫລວງວຽງຈັນ ແລະ ນະຄອນຫລວງພະບາງ, ເຊິ່ງພາຍຫລັງລັດຖະບານແຈ້ງປິດດ່ານ ເລີ່ມແຕ່ກາງເດືອນມີນາ ເຫັນວ່າປະຊາຊົນລາວ ຜູ້ອອກແຮງງານຢູ່ຕ່າງປະເທດ ກັບເຂົ້າມາລາວຫລາຍຂຶ້ນ, ເຊິ່ງມີແຮງງານເຂົ້າມາ 1 ພັນກວ່າຄົນ, ທ້າຍເດືອນມີນາ ໄລຍະກ່ອນປິດດ່ານ 2-3 ວັນ ໄດ້ມີແຮງງານເຂົ້າມາມື້ລະ 4-5 ພັນຄົນ ແລະ ມື້ສຸດທ້າຍ ຂອງການປິດດ່ານມີແຮງງານເຂົ້າມາ 8 ພັນຄົນ ຜ່ານດ່ານຊ່ອງເມັກ ແຂວງຈຳປາສັກ. ໃນໄລຍະປ້ອງກັນທີ 2 ເຫັນວ່າມີຄວາມຫຍຸ້ງຍາກໃນການຮັບມື ແລະ ບໍ່ສາມາດ ເກັບກຳຂໍ້ມູນທາງການໄດ້ ຈຶ່ງໄດ້ຂໍກຳລັງປ້ອງກັນຊາດ-ປ້ອງກັນຄວາມສະຫງົບ ຊ່ວຍເກັບຂໍ້ມູນ ໃນໄລຍະປ້ອງກັນທີ 3 ເຊິ່ງມີສູນກັກກັນ 280 ກວ່າສູນ ໃນແຂວງຈຳປາສັກ. ໃນໄລຍະທີມີການລະບາດ ໄດ້ຮັບການເອົາໃຈໃສ່ຈາກຂັ້ນເທິງ ໂດຍສະເພາະການກັ່ນກອງແຮງງານທີ່ເຂົ້າມາ ແລະ ນຳພາໄປກັກກັນຢູ່ຕາມສູນຕ່າງໆ ທີ່ແຂວງໄດ້ຈັດໄວ້ ເຊິ່ງການເດີນທາງສັນຈອນ ທຸກຄົນແມ່ນມີເອກະສານຢັ້ງຢືນຈາກເຈົ້າໜ້າທີ່ກ່ຽວຂ້ອງ.

ພ້ອມນີ້, ໃນການຈັດຕັ້ງປະຕິບັດການຄວບຄຸມເບື້ອງຕົ້ນ ຍ້ອນການຊີ້ນຳ-ນຳພາ ຈາກຂັ້ນເທິງທີ່ກ່ຽວຂ້ອງ ຈຶ່ງເຮັດໃຫ້ການຄວບຄຸມການປ້ອງກັນ ແລະ ມາດຕະການທີ່ສູນກາງວາງອອກ ຢູ່ແຂວງຈຳປາສັກ ມີປະສິດທີພາບ-ປະສິດທິຜົນ ໂດຍສົມທົບກັບຫລາຍພາກສ່ວນທີ່ມີຢູ່ພາຍໃນແຂວງ ບວກກັບປະຊາຊົນມີຄວາມຕື່ນຕົວ, ຢ້ານກົວຕໍ່ການແພ່ລະບາດຂອງພະຍາດດັ່ງກ່າວ ເປັນສ່ວນໜຶ່ງເຮັດໃຫ້ການຈັດຕັ້ງປະຕິບັດມາດຕະການຢູ່ພາຍໃນແຂວງ ຍັງບໍ່ທັນພົບຜູ້ຕິດເຊື້ອ.
ສຳລັບສິ່ງທ້າທາຍໃນການຈັດຕັ້ງປະຕິບັດໃນໄລຍະຜ່ານມາ ແລະ ຕໍ່ໜ້າ ເບື້ອງຕົ້ນແມ່ນຄວາມພ້ອມຂອງສະຖານທີ່ບໍລິການຈຸດກັ່ນກອງ, ສະຖານທີ່ແຍກປ່ຽວ, ເຄື່ອງມີືອຸປະກອນການແພດຍັງຈຳກັດ. ພາຍຫລັງເກີດມີການລະບາດຂອງພະຍາດໂຄວິດ-19 ຢູ່ນະຄອນຫລວງວຽງຈັນ ທາງກະຊວງສາທາລະນະສຸກ ໄດ້ສົ່ງເຄື່ອງກວດຫາເຊື້ອພະຍາດໂຄວິດ-19 ມາໃຫ້ແຂວງຈຳປາສັກ ໃນເບື້ອງຕົ້ນໄດ້ສົ່ງເຄື່ອງນ້ອຍ ທີ່ສາມາດກວດໄດ້ 20 ກໍລະນີ ແຕ່ເນື່ອງຈາກວ່າແຮງງານລາວເຂົ້າມາເປັນຈຳນວນຫລາຍ ທາງກະຊວງສາທາລະນະສຸກ ຈຶ່ງໄດ້ສົ່ງເຄື່ອງມາໃຫ້ທີ່ສາມາດກວດໄດ້ 200 ກໍລະນີ/ວັນ ເພື່ອຮັບຮອງການກວດຫາເຊື້ອພະຍາດໂຄວິດ-19.
ໃນຕໍ່ໜ້າແຂວງຈຳປາສັກ ມີແຜນຮອງຮັບຫລາຍມາດຕະການ ທີ່ລັດຖະບານໄດ້ມີການຜ່ອນຜັນ, ເຊິ່ງຂະແໜງສາທາ ແລະ ຄະນະສະເພາະກິດຂັ້ນແຂວງ ກໍ່ໄດ້ມີແຜນຮອງຮັບຫາກເກີດມີການລະບາດຮອບ 2 ໂດຍທາງແຂວງ ໄດ້ມີແຜນປັບປຸງສູນກວດກັ່ນກອງ ເພື່ອຮັບປະກັນໃຫ້ໄດ້ຕາມມາດຕະຖານ ທີ່ອົງການອະນາໄມໂລກວາງອອກ.
ທ່ານ ວັນນະໄຊ ຊາດຕະກຸນ ຍັງໃຫ້ຮູ້ຕື່ມວ່າ: ໃນໄລຍະຜ່ານມາອົງການຈັດຕັ້ງສາກົນ ກໍຄືອົງການຢູນີເຊບ ໄດ້ໃຫ້ການຊ່ວຍເຫລືອໃນການຜະລິດສື່ໂຄສະນາຜ່ານສື່ຕ່າງໆ ເຮັດໃຫ້ປະຊາຊົນໄດ້ຮັບຮູ້ສະພາບການຕ່າງໆໃນສັງຄົມໄດ້ທັນເວລາ ແລະ ມີສະຕິໃນການປ້ອງກັນ ແລະ ການບໍລິໂພກຂໍ້ມູນຂ່າວສານທີ່ບໍ່ມີມູນຄວາມຈິງ.