ໃນຕອນບ່າຍວັນທີ 7 ກໍລະກົດ 2020, ທີ່ແຂວງຈຳປາສັກ ທ່ານ ບຸນຈັນ ບຸດຊາວດອນ ຮອງຫົວໜ້າພະແນກສຶກສາທິການ ແລະ ກິລາ ແຂວງຈຳປາສັກ ໄດ້ໃຫ້ສຳພາດຜ່ານສື່ມວນຊົນ ກ່ຽວກັບການຈັດ ຕັ້ງປະຕິບັດວຽກງານຕ້ານ ແລະ ສະກັດກັ້ນພະຍາດໂຄວິດ-19 ວ່າ: ໃນໄລຍະຜ່ານມາ ການນໍາຂັ້ນແຂວງ ກໍ່ຄື ການນໍາກະຊວງສຶກສາທິການ ແລະ ກິລາ ໄດ້ແຕ່ງຕັ້ງຄະນະສະເພາະກິດຂັ້ນຕ່າງໆ ໂດຍໄດ້ແບ່ງຈຸ ໜ່ວຍເວນຍາມຕະຫລອດ 24 ຊົ່ວໂມງ, ໃນນັ້ນໄດ້ອອກແຈ້ງການ ໃຫ້ຫ້ອງການສຶກສາທິການ ແລະ ກິລາເມືອງ ກໍ່ຄື ໂຮງຮຽນອ້ອມຂ້າງພາຍໃນ 9 ຕົວເມືອງ 1 ນະຄອນ ໃຫ້ພ້ອມກັນເອົາໃຈໃສ່ຈັດຕັ້ງປະຕິບັດມາດຕະການ ຕ້ານສະກັດກັ້ນພະຍາດໂຄວິດ-19 ຢ່າງເຂັ້ມງວດ, ໄດ້ມີການເຊື້ອເຊີນເອົາຫ້ອງການສຶກສາທິການ ແລະ ກິລາເມືອງ, ຜູ້ອຳນວຍການ ແຕ່ລະໂຮງຮຽນ ມາຮ່ວມຮັບຟັງການເຜີຍແຜ່ຄວາມຮູ້ ກ່ຽວກັບໄພອັນຕະລາຍຂອງພະຍາດໂຄວິດ-19, ວິທີການປ້ອງກັນຕ່າງໆ ເພື່ອນໍາໄປເຜີຍແຜ່ໃຫ້ຄູ-ອາຈານ, ຜູ້ປົກຄອງ ກໍ່ຄື ນັກຮຽນໄດ້ຮັບຮູ້ເຂົ້າໃຈ ນໍາໄປປະຕິບັດຢ່າງມີຜົນສຳເລັດ.

ທ່ານ ບຸນຈັນ ບຸດຊາວດອນ ໄດ້ໃຫ້ຮູ້ຕື່ມວ່າ: ພະແນກສຶກສາທິການ ແລະ ກິລາ ແຂວງຈຳປາສັກ ໄດ້ມີຜົນງານທີ່ພົ້ນເດັ່ນຫລາຍດ້ານ ໃນການຈັດຕັ້ງປະຕິບັດ ໄດ້ມີການຕິດຕາມປະເມີນຜົນແຕ່ລະໂຮງຮຽນໃນໄລຍະໂຄວິດ-19 ມີການລະບາດ, ຜ່ານມາພວກເຮົາກໍ່ໄດ້ມີການປະຕິບັດນະໂຍບາຍ ຕໍ່ພະນັກງານ-ລັດຖະກອນ ທີ່ມາປະຈຳການເຮັດວຽກໃນໄລຍະໂຄວິດ-19, ເມື່ອມີການລະບາດຂອງພະຍາດດັ່ງກ່າວ ທາງໂຮງຮຽນ ກໍ່ໄດ້ມີການປະຕິບັດຕາມຄຳສັ່ງຂອງຂັ້ນເທິງຢ່າງເຂັ້ມງວດ ດ້ວຍການເວັ້ນໄລຍະຫ່າງ ໃຫ້ຢູ່ເຮືອນ, ບໍ່ໃຫ້ອອກຈາກບ້ານ-ເຮືອນ ຖ້າບໍ່ມີຄວາມຈຳເປັນ, ສຳລັບໃນໄລຍະທີ່ຂັ້ນເທິງໃຫ້ໂຈະການຮຽນຊົ່ວຄາວ, ທາງໂຮງຮຽນໄດ້ແນະນໍາໃຫ້ແຕ່ລະໂຮງຮຽນ ສ້າງສື່ການຮຽນ-ການສອນ ຕາມຄວາມສາມາດຂອງຄູ-ອາຈານ ໂດຍການໃຫ້ຄຳຖາມຄົ້ນຄວ້າແກ່ນັກຮຽນ, ຮຽນຜ່ານສື່ອອນລາຍ ເດັ່ນກວ່າໝູ່ແມ່ນ ພວກເຮົາໄດ້ປະສານສົມທົບກັບສູນໄອຊີທີ ຂອງພະແນກສຶກສາທິການ ແລະ ກິລາແຂວງ ຈັດຕັ້ງການຮຽນ-ການສອນ ຜ່ານສື່ອອນລາຍ ກໍ່ຄື ເຟດບຸກ ມີສື່ການຮຽນທັງໝົດ 9 ວິຊາ, 60 ບົດ ເຫັນວ່າມີນັກຮຽນໃຫ້ຄວາມສົນໃຈເຂົ້າເບິ່ງ, ຮຽນຜ່ານສື່ດັ່ງກ່າວເປັນຈຳນວນຫລວງຫລາຍ ຖືເປັນຜົນງານທີ່ພົ້ນເດັ່ນຂອງໂຮງຮຽນໃນການສ້າງສື່ການຮຽນ-ການສອນ. ຄຽງຄູ່ກັນນັ້ນ, ພວກເຮົາກໍ່ໄດ້ຈັດກອງປະຊຸມທາງໄກແຕ່ລະເມືອງ ເພື່ອລາຍງານຄວາມພ້ອມ ໃນໄລຍະໂຈະການຮຽນຊົ່ວຄາວ ແລະ ກະກຽມຄວາມພ້ອມກ່ອນເຂົ້າສູ່ການເປີດໂຮງຮຽນຄືນໃໝ່ ໂດຍການສະໜັບສະໜູນກອງປະຊຸມ ຂອງບໍລິສັດຢູນີເທວ.

ທ່ານ ບຸນຈັນ ບຸດຊາວດອນ ກ່າວເນັ້ນອີກວ່າ: ພາຍຫລັງທີ່ໄດ້ມີຄຳສັ່ງ ໃຫ້ເປີດການຮຽນຄືນໃໝ່ທາງໂຮງຮຽນ ກໍ່ໄດ້ມີການທົບທວນບົດຮຽນຄືນ ເຖິງຈະມີການສອນອອນລາຍກໍ່ຕາມ, ທັງນີ້ເພື່ຶອຮັບປະກັນໃຫ້ຄົບຈົບຕາມຫລັກສູດ ທີ່ກະຊວງສຶກສາທິການ ແລະ ກິລາ ວາງອອກ. ພ້ອມນັ້ນ, ກ່ອນເຂົ້າຮຽນໃນແຕ່ລະວັນ ນັກຮຽນໄດ້ມີການກວດວັດອຸນຫະພູມ, ໃສ່ຜ້າອັດປາກ-ດັງ, ເວັ້ນໄລຍະຫ່າງກັນ 1 ແມັດ, ໝັ່ນລ້າງມືດ້ວຍສະບູ ຫລື ເຈວລ້າງມື, ປັດຈຸບັນ ທົ່ວແຂວງ ມີໂຮງຮຽນທັງໝົດ 1.188 ແຫ່ງ, ໂຮງຮຽນ ລ້ຽງເດັກອະນຸບານ 273 ແຫ່ງ, ໂຮງຮຽນປະຖົມ 748 ແຫ່ງ, ໂຮງຮຽນມັດທະຍົມຕົ້ນ-ປາຍ 167 ແຫ່ງ, ຈຳນວນນັກຮຽນທັງໝົດ 147.501 ຄົນ.