ໃນໜ້າອອນລາຍພວກເຮົາໄດ້ເວົ້າເຖີງຈຸດດີ-ຈຸດອ່ອນ ແລະ ໄພອັນຕະລາຍຈາກສື່ອອນລາຍມາຫຼາຍເທື່ອແລ້ວ ທັງຍົກໃຫ້ເຫັນວ່າມີບາງກໍລະນີກໍ່ສ່ຽງຕໍ່ການລະເມີດກົດໝາຍ.. ໄປຄຽງຄູ່ກັນນັ້ນກໍ່ຮຽກຮ້ອງໃຫ້ພາກສ່ວນທີ່ສື່ດັ່ງກ່າວພາດພິງເຖີງອອກມາອະທິບາຍຊີ້ແຈງບັນຫາທີ່ເກີດຂື້ນວ່າມັນເປັນຈິງສໍ່າໃດ໋? ເຊັ່ນໃນກໍລະນີການສອບເສັງຫວ່າງມໍ່ໆ ມານີ້ ຂອງນ້ອງນັກຮຽນຊັ້ນມໍ 1 ທີ່ຖືກຄູ່ໄລ່ອອກຈາກຫ້ອງເສັງຍ້ອນຊົງຜົມ.

ທີ່ຍົກບັນຫານີ້ຂື້ນກໍ່ເພາະວ່າໃນໄລຍະມໍ່ໆ ມານີ້ສື່ອອນລາຍ ຫຼື ສັບພະສື່-ສື່ແບບໃໝ່, ນັ້ນເຮັດໜ້າທີ່ຫຼາຍຂື້ນໃນນັ້ນກໍ່ມີຫຼາຍເຫດການທີ່ດີມີເຫດຜົນໜ້າຊົມເຊີຍແຕ່ໃນຂະນະດຽວກັນກໍ່ມີປະເພດອ່ອນຫຼາຍ ເພາະຂໍ້ມູນບໍ່ຊັດເຈນມີລັກສະນະປັ່ນປ່ວນສ້າງຄວາມແຕກແຍກໃນສັງຄົມ.

ສະນັ້ນ ຈື່ງຢາກເວົ້າວ່່າທຸກບັນຫາທີ່ເກີດຂື້ນພວກເຮົາຕ້ອງຊ່ວຍກັນອະທິບາຍຊີ້ແຈງບໍ່ຖີ້ມພຸ້ນຖີ້ມພີ້; ຖືກພາກສ່ວນໃດ? ໜ່ວຍງານໃດ? ກໍ່ອອກມາຊີ້ແຈງເຖິງຄວາມເປັນຈິງຂອງບັນຫາທີ່ເກີດຂື້ນ.. ຍອມຮັບຖ້າວ່າເປັນຄວາມຈິງແລ້ວຊອກຫາທາງອອກ ແລະ ແກ້ໄຂ.. ຄວາມຜິດພາດບໍ່ແມ່ນຄວາມຊົ່ວຮ້າຍການ ບໍ່ຮັບຜິດ ແລະ ບໍ່ຍອມປ່ຽນແປງຈີ່ງແມ່ນຄວາມຊົ່ວຮ້າຍ..

ສຳລັບມັກໂພສ.. ມັກມີຄຳເຫັນໃນບັນຫາຕ່າງໆ ທີ່ເກີດຂື້ນນັ້ນກໍ່ຄວນຮີ່ນຕອງເຖິງຄວາມເໝາະສົມວ່າສີ່ງນັ້ນຄວາມເປັນຈິງແມ່ນແນວໃດກັນແທ້? ຕ້ອງໃຊ້ເວລາສຶກສາເຖິງຜົນໄດ້ຜົນເສຍຫາກບໍ່ແມ່ນ ເຫັນແກ່ຄວາມສະໃຈແລ້ວໂພສຂື້ນໜ້າສື່ອອນລາຍ.. ໃນກໍລະນີໂພສຂື້ນແລ້ວມີຜູ້ຕໍາໜິສົ່ງຂ່າວກໍ່ຄວນຮັບເອົາແກ້ໄຂຫາກບໍ່ແມ່ນຫຼົງໂຕສ້າງກະແສຕອບໂຕ້ແບບຂາດເຫດຜົນສ້າງຄວາມແບ່ງແຍກ ແລະ ສັບສົນໃນສັງຄົມ.

ແຕ່ໃດມາສັງຄົມລາວເຮົາແມ່ນສັງຄົມແຫ່ງຄວາມສາມັກຄີປອງດອງ.. ຄົນລາວເຮົາເປັນຄົນມີຈິດໃຈໂອບເອື້ອອາລີ ຮູ້ໃຫ້ອະໄພເຊີ່ງກັນ ແລະ ກັນ.. ບໍ່ໂຄນລົ້ມໂຈມຕີກັນແກ້ໄຂບັນຫາດ້ວຍການເວົ້າຈາ.. ຊີ້ແຈງເຖິງເຫດ ແລະ ຜົນ ຫາກບໍ່ແມ່ນການກະແທກແດກດັນກັນ; ສ້າງຄວາມໂດດເດັ່ນໂດຍບໍ່ເຫັນແກ່ສັງຄົມສ່ວນລວມຖືຕົນເອງເປັນເອກໃນສັງຄົມທັງໆ ທີ່ມີຫຼາຍຄົນຫຼາຍທ່ານໂດດເດັ່ນກ່ວາຕົນເອງຢ່າລືມວ່າມະຫາຊົນຄືຜູ້ສ້າງປະຫັວດສາດ.

ພວກເຮົາຕ້ອງຍອມຮັບວ່າໃນສັງຄົມໜື່ງຍ່ອມປາສະຈາກບໍ່ໄດ້ຂໍ້ຂັດແຍ່ງ ຫຼື ຄວາມບໍ່ເຂົ້າໃຈໃນບັນຫາໃດໜື່ງແຕ່ຜ່ານການອະທິບາຍຊີ້ແຈງຈະເຫັນໄດ້ວ່າເກີດຄວາມເຂົ້າໃຈ.. ເກີດການໃຫ້ອະໄພເຊີ່ງກັນ ແລະ ກັນແລ້ວສັງຄົມກໍ່ມີຄວາມສະຫົງບ ແລະ ສາມັກຄີປອງດອງ.

ຄວາມມິດງຽບ ເສີຍເມີຍບໍ່ແແມ່ນທາງອອກ; ການອອກມາຊີ້ແຈງອະທິບາຍແມ່ນເລື່ອງທີ່ໜ້າສັນລະ ເສີນ.

ໂດຍ: ທິດດີ