ທ່ານ ບົວລິນ ວົງພະຈັນ ຮອງເຈົ້າແຂວງຈຳປາສັກ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 8 ກໍລະກົດ 2020 ທີ່ແຂວງຈໍາປາສັກ ກ່ຽວກັບວຽກງານຕ້ານ ແລະ ສະກັດກັ້ນພະຍາດໂຄວິດ-19 ວ່າ: ໃນນາມຕາງໜ້າຄະນະສະເພາະກິດຂອງແຂວງ ໃນໄລຍະຜ່ານມາແຂວງຈຳປາສັກ ສາມາດຜ່ານຜ່າໄພພິ ບັດຮ້າຍແຮງ ມາຮອດປັດຈຸບັນ. ສຳລັບການປະຕິບັດວຽກງານ ການຕ້ານສະກັດກັ້ນພະຍາດໂຄວິດ-19 ແມ່ນໄດ້ເອົາໃຈໃສ່ປະຕິບັດຕາມແຈ້ງການຂອງຂັ້ນເທິງ ກໍຄື ຄະນະສະເພາະກິດແຫ່ງຊາດ ໄດ້ເອົາໃຈໃສ່ເປັນພິເສດ, ມີຄວາມຮ້ອນໃຈ ແລະ ສະດຸ້ງໄວ ເພາະພະຍາດນີ້ ເປັນພະຍາດທີ່ມີຄວາມອັນຕະລາຍຕໍ່ຊີວິດ ແລະ ແຜ່ລະບາດຢ່າງໄວ.

ໃນນັ້ນພວກເຮົາໄດ້ປຶກ ສາຫາລື ແຕ່ງຕັ້ງຄະນະກຳມະການຄະນະສະເພາະກິດຂັ້ນແຂວງ ເພື່ອກະກຽມຄວາມພ້ອມໃນດ້ານຕ່າງໆ ເປັນຕົ້ນ ແມ່ນບຸກຄະລາກອນດ້ານສາທາລະນະສຸກ, ສະຖານທີ່, ອຸປະກອນຮັບໃຊ້, ຢາປົວພະຍາດ ແລະ ສິ່ງຈຳເປັນອື່ນໆ. ຈາກນັ້ນ, ກໍ່ໄດ້ມີການຝຶກອົບຮົມທີມງານແພດໝໍ ແລະ ໄດ້ແຕ່ງຕັ້ງປະຈຳຢູ່ແຕ່ລະຈຸດ, ກະກຽມກຳລັງ ປກສ-ປກຊ, ອົງການຈັດຕັ້ງມະຫາຊົນ ເພື່ອເປັນກຳລັງແຮງ ໃນການຕອບໂຕ້ວຽກງານດັ່ງກ່າວ. ຄຽງຄູ່ກັນນັ້ນຍັງໄດ້ລົງຕິດຕາມກວດກາສະຖານທີ່ ທີ່ເປັນປ່ອງປະຕູທາງເຂົ້າທຸກເບື້ອງ ໂດຍສະເພາະແມ່ນດ່ານປະເພນີ, ດ່ານສາກົນ ແລະ ໄດ້ມີການລົງເຄື່ອນໄຫວໂຄສະນາປຸກລະດົມ ຢູ່ທ້ອງຖິ່ນ ໃນຂອດການກັນພະຍາດຕ່າງໆ ທີ່ມາຈາກຕ່າງປະເທດ, ເຊິ່ງໃນໄລຍະດຽວກັນ ກໍໄດ້ມີແຮງງານລາວ ທີ່ໄປເຮັດວຽກຢູ່ຕ່າງປະເທດກັບມາລາວ ເປັນຈຳນວນຫລວງຫລາຍ, ສະນັ້ນພວກເຮົາກໍໄດ້ກະກຽມກຳລັງທະຫານ, ຕຳຫລວດ ເຂົ້າມາຊ່ວຍ ໂດຍມີການກວດວັດແທກອຸນນະ ພູມ ແລະ ໄດ້ມີການກັກຕົວເປັນເວລາ 14 ວັນ.

ສຳລັບວຽກງານກັກກັນແຮງງານລາວ ທີ່ເດີນທາງກັບຄືນມາປະເທດ ພວກເຮົາໄດ້ນຳໄປກັກໂຕ ຢູ່ສູນກັກກັນຂອງແຂວງ ເປັນເວລາ 14 ວັນ ຢູ່ສູນຫລັກ 21, ສູກຫລັກ 7, ສູນມະຫາວິທະຍາໄລຈຳປາສັກ ແລະ ວິທະຍາໄລການເງິນພາກໃຕ້, ໂດຍມີພະນັກງານແພດໝໍຕິດຕາມຢ່າງໃກ້ຊິດ. ມາຮອດປັດຈຸບັນ ແຂວງຈຳປາສັກ ບໍ່ມີຜູ້ຕິດເຊື້ອພະຍາດໂຄວິດ-19 ເຖິງຈະມີແຮງງານລາວ ຈາກຕ່າງປະເທດເຂົ້າມາເປັນຈຳນວນຫລາຍ ພວກເຮົາກໍ່ສາມາດຄວບຄຸມໄດ້ ຍ້ອນຄວາມເອົາໃຈໃສ່ຂອງການຈັດຕັ້ງພັກ-ລັດ ທຸກພາກສ່ວນ ບວກກັບການຮ່ວມມືຂອງທຸກກຳລັງ ເຮັດໃຫ້ມີຜົນສຳເລັດໄປດ້ວຍດີ.
ທ່ານ ບົວລິນ ວົງພະຈັນ ຍັງໃຫ້ຮູ້ຕື່ມວ່າ: ປັດຈຸບັນ ຍັງຕ້ອງສືບຕໍ່ປະຕິບັດຄໍາສັ່ງເລກທີ 06 ຂອງນາຍົກລັດຖະມົນຕີ ແລະ ມາດຕະການຜ່ອນຜັນ ຄວບຄູ່ກັບການປ້ອງກັນບັນດາກິດ ຈະກຳຕ່າງໆ ທາງປະເພນີ ບໍ່ໃຫ້ມີການຊຸມນຸມຄົນເປັນຈຳນວນຫລາຍ ແລະ ຍັງສືບຕໍ່ໂຄສະນາໃຫ້ຊຸມຊົນ, ສັງຄົມ, ອຳນາດການປົກຄອງ ເອົາໃຈໃສ່ປະຕິບັດຄຳສັ່ງນີ້ ໃຫ້ກວ້າງຂວາງອອກເລິກເຊິ່ງກວ່າເກົ່າ.