ກອງ​ປະຊຸມ​ຄະນະ​ກຳ ມະການ​ຮ່ວມ​ມື​ລາວ​-​ຈີນ​ ປະ ຈຳ​ປີ 2019-2020 ໄດ້​ຈັດ​ຂຶ້ນ​ແຕ່​ວັນ​ທີ 7-8 ກໍລະກົດ 2020 ທີ່​ຫ້ອງ​ປະຊຸມ​ຂອງ​ກະ ຊວງ​ແຜນການ ແລະ ການ​ລົງທຶນ ໂດຍ​ຜ່ານ​ຮູບ​ແບບ​ກອງປະຊຸມ​ທາງໄກ (Video conference) ໂດຍ​ການ​ເປັນ​ປະທານ​ຂອງ​ທ່ານ ນາງ ເຂັມ​ມະນີ ພົນ​ເສນາ ລັດຖະມົນຕີ​ກະຊວງ​ອຸດສາຫະກຳ ແລະ ການ​ຄ້າ ປະທານ​ຄະນະ​ກຳມະການ​ຮ່ວມ​ມື​ລາວ​-​ຈີນ, ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ​ແຜນການ ແລະ ການ​ລົງທຶນ, ມີ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ. ກອງ​ປະຊຸມ​ຄັ້ງ​ນີ້ ເພື່ອ​ພ້ອມ​ກັນ​ສະ​ຫຼຸບ​ຕີ​ລາຄາຖອດ​ຖອນ​ບົດຮຽນ​ການຈັດຕັ້ງ​ປະຕິບັດ​​ວຽກ​ງານ​ການ​ຮ່ວມ​ມື​ທາງ​ດ້ານ​ເສດ​ຖະ​ກິດ​-​ການ​ຄ້າ ແລະ ເຕັກນິກ​ລະຫວ່າງ​ລາວ​-​ຈີນ​ໃນ​ໄລຍະ​ທີ່​ຜ່ານ​ມາ ແລະ ພ້ອມ​ກັນ​ວາງ​ທິດ​ທາງ​ໃນ​ຕໍ່​ໜ້າ. 

ກອງ​ປະຊຸມ​ໄດ້​ແບ່ງອອກ​ ເປັນ 2 ລະດັບ, ຄື​ກອງ​ປະຊຸມ​ລະດັບ​ວິຊາ​ການ ໄດ້​ລົງ​ເລິກ​ແນະ​ນໍາ ແລະ ປະ​ກອບ​ຄໍາ​ຄິດ​ຄໍາ​ເຫັນ​ກ່ຽວ​ກັບ​ການ​ປະຕິບັດ​ຂັ້ນ​ຕອນ​ການ​ຂໍ​ການ​ຊ່ວຍເຫຼືອ​ ແລະ ກູ້​ຢືມ​ຈາກ ສປ ຈີນ, ກົນ​ໄກ​ການ​ປະສານ​ງານ​ແບບແຜນ​ວິທີ​ເຮັດ​ວຽກ​ລະຫວ່າງ​ຫ້ອງການ​ຄະນະ​ກຳມະການ​ຮ່ວມ​ມື​ລາວ​-​ຈີນ ກັບ ຈຸດ​ປະສານ​ງານ​ຂອງ​ຕົນ​ທີ່​ມີ​ຢູ່​ກົມ​ແຜນການ ຫຼື ກົມ​ຮ່ວມ​ມື​ສາກົນ​ຂອງ​ແຕ່​ລະ​ກະ​ຊວງ​-​ອົງການ​ຢູ່​ຂັ້ນ​ສູນ​ກາງ ແລະ ສັງກັດ​ຢູ່​ຂະແໜງ​ຮ່ວມ​ມືຂອງ​ພະ​ແນ​ກ​ແຜນການ ແລະ ການ​ລົງທຶນຂອງ​ນະຄອນຫຼວງ ແລະ ບັນດາ​ແຂວງ​ໃນ​ທົ່ວ​ປະ​ເທດ. 

ສຳລັບ​ກອງ​ປະຊຸມ​ຂັ້ນ​ສູງ​ວຽກ​ງານ​ການ​ຮ່ວມ​ມື​ລາວ​-​ຈີນ ປະ​ຈໍາ​ປີ 2019-2020 ໄດ້​ລົງ​ເລິກ​ທົບ​ທວນ ຜົນງານ​ການ​ຮ່ວມ​ມື​ດ້ານ​ເສດຖະກິດ, ການ​ຄ້າ ແລະ ເຕັກນິກ​ລະຫວ່າງ ລາວ​-​ຈີນ ໃນ​ໄລຍະ 1 ປີ ກວ່າ​ທີ່​ຜ່ານ​ມາ ແລະ ວາງ​ທິດ​ທາງ​ແຜນການ​ຮ່ວມ​ມື​ໃນ​ຕໍ່​ໜ້າ. ນອກຈາກ​ນີ້​ ຍັງ​​ໄດ້​ຮັບ​ຟັງ​ການ​ສະເໜີ​ໂດຍ​ສັງເຂບ​ກ່ຽວ​ກັບ​ການ​ສ້າງ​ຄູ່​ຮ່ວມ​ຊະ​ຕາ​ກຳ​ລາວ​-​ຈີນ ແລະ ການ​ສ້າງ​ແລວ​ທາງ​ເສດຖະກິດ​ລາວ​-​ຈີນ ແລະ ການ​ພັດທະນາ​ເສດຖະກິດ​ຕາມ​ແລວ​ທາງ​ລົດໄຟ​ລາວ​-​ຈີນ ທີ່​ເປັນ​ຂອບ​ການ​ຮ່ວມ​ມື​ທີ່​ສໍາ​ຄັນ​ຂອງ​ສອງ​ປະ​ເທດ.

ທ່ານ ສອນ​ໄຊ ສີ​ພັນ​ດອນ ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ຜົນງານ​ການ​ຮ່ວມ​ມື​ດ້ານ​ເສດຖະກິດ, ການ​ຄ້າ ແລະ ເຕັກນິກ​ລະຫວ່າງ ລາວ​-​ຈີນ ໃນ​ໜຶ່ງ​ປີກ​ວ່າ​ທີ່​ຜ່ານ​ມາ ໂດຍ​ພາຍ​ໃຕ້​ການ​ຊີ້​ນຳ​ນໍາ​ພາ​ຂອງ​ສູນ​ກາງ​ພັກ ແລະ ລັດຖະບານ ແລະ ການ​ຮ່ວມ​ມື​ສະໜັບສະໜູນ​ຈາກ​ທຸກ​ພາກສ່ວນ ນັບ​ທັງ​ສູນ​ກາງ ແລະ ທ້ອງ​ຖິ່ນ. ໃນ​ນີ້​ມີ​ຄະນະ​ກຳມະການ​ຮ່ວມ​ມື​ລາວ​-​ຈີນ​ໃນ​ນາມ​ທີ່​ເປັນ​ເສນາ​ທິ​ການ​ໃຫ້​ແກ່​ສູນ​ກາງ​ພັກ ແລະ ລັດຖະບານ​ໄດ້​ເປັນ​ກຳລັງ​ຫຼັກ​ໃນ​ການ​ຊຸກຍູ້, ປະສານ​ງານ ແລະ ຂັບ​ເຄື່ອນ​ການຈັດຕັ້ງ​ປະຕິບັດ​ການເຄື່ອນໄຫວ​ວຽກ​ງານ​ຮ່ວມ​ມື​ລາວ​-​ຈີນ​ໂດຍ​ສະເພາະ​ການ​ຮ່ວມ​ມື​ດ້ານ​ເສດ​ຖະ ກິດ​-​ການ​ຄ້າ ແລະ ເຕັກນິກ​ໄດ້​ສືບຕໍ່​ຂະຫຍາຍຕົວ ແລະ ຮັບ​ຜົນສຳເລັດ​ຢ່າງ​ດີ. ຜົນງານ​ອັນ​ພົ້ນ​ເດັ່ນ​ໃນ​ປີ​ທີ່​ຜ່ານ​ມາ​ແມ່ນ​ການ​ພົວພັນ​ຮ່ວມ​ມື​ຂອງ​ສອງ​ປະເທດ​ໄດ້​ຮັບ​ການ​ຍົກ​ລະດັບ​ຂຶ້ນ​ອີກ​ບາດກ້າວ​ໜຶ່ງ​ຄື ບົນ​ພື້ນຖານ​ການ​ເປັນ​ຄູ່​ຮ່ວມ​ມື​ຍຸດທະສາດ​ຮອບດ້ານ​ບົນ​ຈິດໃຈ 4 ດີ (ບ້ານ​ໃກ້​ເຮືອນ​ຄຽງ​ທີ່​ດີ, ເພື່ອນ​ມິດ​ທີ່​ດີ, ສະຫາຍ​ທີ່​ດີ ແລະ ຄູ່​ຮ່ວມ​ມື​ທີ່​ດີ) ມາ​ເປັນ​ຄູ່​ຮ່ວມ​ຊາຕາກຳ​ລາວ​-​ຈີນ. 

ການ​ຮ່ວມ​ມື​ລະຫວ່າງ​ລາວ​-​ຈີນ ໄດ້​ນໍາ​ເອົາ​ຜົນ​ປະ ໂຫຍດ​ຕົວ​ຈິງ​ມາ​ໃຫ້​ປະເທດ​ຊາດ ແລະ ປະຊາຊົນ​ສອງ​ຊາດ​ຢ່າງ​ຫຼວງຫຼາຍ ໂດຍ​ສະເພາະ​ການ​ລົງ​ທຶນ​ຂອງ ສປ ຈີນ ຍັງ​ສືບຕໍ່​ຮັກສາ​ການ​ຂະຫຍາຍຕົວ​ຢ່າງ​ຕໍ່​ເນື່ອງ, ມາ​ຮອດ​ທ້າຍ​ປີ 2019 ມີ​ໂຄງການ​ລົງ​ທຶນ​ໃນ​ກິດຈະການ​ຕ່າງໆ​ຢູ່ ສປປ ລາວ ມີ​ມູນ​ຄ່າ​ການ​ລົງ​ທືນ​ຫຼາຍ​ກວ່າ 12 ຕື້ ໂດ​ລາ​ ເຂົ້າ​ໃນ​ຂະແໜງການ​ຕ່າງໆ​ເຊັ່ນ: ຂະແໜງການ​ພະລັງງານ​ໄຟ​ຟ້າ​ນໍ້າ​ຕົກ, ບໍ່​ແຮ່, ການ​ກໍ່ສ້າງ​ພື້ນຖານ​ໂຄງ​ລ​່າງ ແລະ ອື່ນໆ.  ສຳລັບ​ໂຄງການ​ກໍ່ສ້າງ​ທາງ​ລົດໄຟ​ລາວ​-​ຈີນ​ຮອດ​ເດືອນ 6ປີ 2020 ສໍາ​ເລັດ​ແລ້ວ 89,45% ຕາມ​ແຜນ​ຄາດ​ວ່າ​ຈະ​ໃຫ້​ສໍາ​ເລັດ ໃນ​ເດືອນ ທັນວາ 2021 ແລະ ໂຄງການ​ກໍ່ສ້າງ​ທາງ​ດ່ວນ​ວຽງ​ຈັນ​-​ວັງ​ວຽງ​ຮອດ​ເດືອນ​ທັນວາ 2020 ຈະ​ໃຫ້​ສຳເລັດ​ຕາມ​ແຜນ​ການ.

ດ້ານ​ການ​ຄ້າ​ໃນ​ປີ 2019 ການ​ຄ້າ​ສອງ​ຝ່າຍ​ລາວ​-​ຈີນ​ບັນລຸ​ໄດ້ 3,92 ຕື້​ໂດ​ລາ​ ​ເພີ່ມ​ຂຶ້ນ 22,12%, ໃນ​ນັ້ນ ມູນ​ຄ່າ​ສິນຄ້າ​ລາວ​ສົ່ງ​ອອກ​ໄປ​ຈີນ​ບັນລຸ 2,1 ຕື້​ກວ່າ​ໂດ​ລາ ແລະ ສິນຄ້າ​ຈາກ​ຈີນ​ເຂົ້າ​ມາ​ລາວ​ລວມ​ມູນ​ຄ່າ 1,76 ຕື້​ກວ່າ​ໂດ​ລາ ຊຶ່ງ​ເຮັດ​ໃຫ້ ສປ ຈີນ ເປັນ​ຄູ່​ຮ່ວມ​ການ​ຄ້າ​ໃຫຍ່​ອັນ​ດັບ​ສອງ​ຂອງ​ລາວ. ພິເສດ​ໃນ​ປີ 2019-2020 ລັດຖະບານ​ຈີນ​ຍັງ​ໄດ້​ອະນຸມັດ​ໂກ​ຕ້າ​ການ​ສົ່ງ​ອອກ​ເຂົ້າສານ​ຂອງ​ລາວ​ໄປ​ຈີນ​ຈຳນວນ 50.000 ໂຕນ, ນອກ​ນັ້ນ​ແຂວງ​ຢຸນ​ນານ ສປ ຈີນ ຍັງ​ໄດ້​ໃຫ້​ໂກ​ຕ້າ​ສົ່ງ​ອອກ​ງົວ​-​ຄວາຍ ຂອງ​ລາວ​ໄປ​ຈີນ​ຕາມ​ເງື່ອນໄຂ​ທີ່​ກຳນົດ​ໄວ້. ນອກຈາກ​ນີ້ ແຕ່​ລະ​ປີ​ລັດຖະບານ​ຈີນ ຍັງ​ໄດ້​ໃຫ້​ທຶນ​ການ​ສຶກສາ ແລະ ໃຫ້​ທຶນ​ຝຶກ​ອົບ​ຮົມ​ຈໍາ​ນວນ​ຫຼວງ​ຫຼາຍ. 

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)