ຫ້ອງວ່າການສູນກາງພັກ ​ໄດ້​ຈັດ​ພິທີເຜີຍແຜ່, ​ເຊືອມ​ຊຶມມະ​ຕິກ​ອງປະຊຸມຄົບ​ຄະນະ​ຄັ້ງ​ທີ 10 ຂອງ​ຄະນະ​ບໍລິຫານ​ງານ​ສູນ​ກາງ​ພັກສະ​ໄໝທີ X, ຫວນ​ຄືນ​ວັນ​ຄ້າຍ​ວັນ​ເກີດ​ ປະທານ​ສຸພາ​ນຸວົງ ຄົບ ຮອບ 111 ປີ, ວັນ​ເຊັນ​ສັນ​ຍາ​ມິດຕະພາບ-​ການ​ຮ່ວມ​ມື​ ຄົບຮອບ 43 ປີ ​ແລະ ວັນ​ສ້າງ​ຕັ້ງ​ສາຍ​ພົວພັນ​ການ​ທູດ​ລາວ-​ຫວຽດນາມ ຄົບຮອບ 58 ປີ, ​ເຊິ່ງ​ໄດ້​ຈັດ​ຂຶ້ນ​ໃນ​ວັນ​ທີ 9 ກໍ​ລະ​ກົດ 2020 ​​ໃຫ້​ກຽດປະ ຖະກະຖາ​ ໂດຍ ສະຫາຍ ຈັນທະ​ບູນ ລັດຕະນະ​ວົງ ຄະນະ​ປະຈຳ​ພັກ, ຮອງ​ຫົວໜ້າຫ້ອງ​ວ່າການ​ ສູນ​ກາງ​ພັກ, ພ້ອມ​ດ້ວຍ​ພະ​ນັກງານ​ ພາຍ​ໃນ​ເຂົ້າ​ຮ່ວມ.

ສະຫາຍ ຈັນທະ​ບູນ ລັດ​ຕະນະ​ວົງ ​ໄດ້​ກ່າວ​ວ່າ: ​ໃນກອງ​ປະຊຸມຄົບ​ຄະນະ ຄັ້ງ​ທີ 10 ຂອງ​ຄະນະ​ບໍ ລິຫານ​ງານ​ສູນ​ກາງ​ພັກ ສະ​ໄໝທີ X ໄດ້​ຄົ້ນຄວ້າ, ປຶກສາ​ຫາລື​ຫລາຍ​ບັນຫາ​ສຳຄັນ​ ຄື: ການຜັນ​ຂະ​ຫຍາຍ​ມະຕິ​ກອງ​ປະຊຸມ ຄົບ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງ​ທີ 7,8,9 ສະ​ໄໝທີ X ຕິດ​ພັນກັບ​ການຈັດ​ຕັ້ງ​ປະຕິບັດແຜນ​ພັດທະນາ​ເສດຖະກິດ​-ສັງຄົມ, ​ແຜນ​ງົບ​ປະມານ, ​ເງິນຕາປະຈຳ​ໄຕ​ມາດ 1 ປີ 2020 ​ແລະ ທິດ​ທາງ​ໃນ​ຕໍ່ໜ້າ ​ໂດຍ​ສະ​ເພາະ ​ໄດ້​ຍົກ​​ໃຫ້​ເຫັນ​ເຖິງບັນຫາການ​ແກ້​ໄຂ ​ພະນັກງານ​ເຫລືອ​ບໍ່​ພໍ, ການ​ແກ້​ໄຂໜີ້ສິນ​ສາທາລະນະ, ການ​ຊູ​ກຍູ້​ການ​ຜະລິດ ​ແລະ ປຸງ​ແຕ່ງ​ເປັນ​ສິນຄ້າ​ຍັງ​ບໍ່​ທັນ​ໄດ້​ຮັບ​ການ​ປັບປຸງ​ໃຫ້​ສອດຄ່ອງ ​ແລະ ມີ​ຄວາມ​ສາມາດ​ໃນ​ການຈັດ​ຕັ້ງ​ປະຕິບັດ​ຕົວ​ຈິງບວກ​ກັບ​ການລະບາດຂອງ​ພະຍາດ​ໂຄ​ວິດ-19, ການ​ປ່ຽນ​ແປງ​ດິນ​ຟ້າ​ອາກາດ ​ແລະ ອື່ນໆ ​ເຮັດ​ໃຫ້​ຕົວ​ເລກ​ແຕ່​ລະ​ດ້ານ​ໃນ​ໄຕ​ມາດ​ທຳ​ອິດ​ຂອງ​ແຜນການ​ປີ 2020 ສ່ວນ​ຫລາຍ​ຫລຸດ​ຄາດໝາຍ. ສະຫາຍ ຈັນທະ​ບູນ ລັດ​ຕະນະ​ວົງ ​​ກ່າວ​ຕື່ມວ່າ: ກອງ​ປະຊຸມ​​ເຫັນ​ດີດ້ານ​ຫລັກການຮັບຮອງ​ເອົາ​ບາງ​ວຽກງານ​ຈຸດ​ສຸມຂອງ​ລັດຖະບານ​ແຕ່​ນີ້​ຮອດ​ທ້າຍ​ປີ 2020, ພ້ອມ​ທັງ​ໃຫ້​ທິດ​ຊີ້​ນຳ​ບາງ​ມາດ​ຕະການ ໃນ​ການ​ຜັນ​ຂະ​ຫຍາ​ຍ ​ແລະ ຈັດ​ຕັ້ງ​ປະຕິບັດ​ໃຫ້​ເຂົ້າ​ສູ່​ລວງ​ເລີກ ​ແລະ ມີ​ປະສິດທິ​ຜົນ.

ໃນ​ໂອກາດນີ້, ສະຫາຍ ຄຳ​ຜາ ພິມ​ມະ​ສອນ ຄະນະ​ປະຈຳພັກ, ຮອງ​ຫົວໜ້າຫ້ອງ​ວ່າການ​ ສູນ​ພັກ ​ໄດ້​ຍົກ​ໃຫ້​ເຫັນຜົນງານ, ຄຸນງາມຄວາມດີຂອງ ປະທານ​ສຸພາ​ນຸວົງ  ທີ່ເອົາໃຈໃສ່ປະຕິບັດພາລະໜ້າທີ່ປະຕິວັດອັນສູງສົ່ງເພື່ອຄວາມເປັນເອກະລາດ ແລະ ຄວາມຢູ່ດີກິນດີຂອງປະຊາຊົນ, ​ແນ​ໃສ່ເສີມຂະຫຍາຍມູນເຊື້ອອັນດີງາມໃຫ້ຄົນທີ່ເກີດໃໝ່ໃຫຍ່ລຸນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງເຖິງຄວາມອາດສາມາດ, ຄວາມອົງອາດກ້າຫານ, ຄວາມເດັດດ່ຽວໜຽວແໜ້ນ, ຄວາມສາມັກຄີ ແລ້ວນໍາເອົາບົດຮຽນດັ່ງກ່າວ​, ​ໄປຝຶກຝົນຫລໍ່ຫລອມຕົນເອງໃຫ້ກາຍເປັນພະນັກງານຮຸ່ນສືບທອດທີ່ມີຄວາມຈົງຮັກພັກດີຕໍ່ປະເທດຊາດ. ນອກຈາກ​ນີ້, ສະຫາຍ ຄໍາຜາ ພິມ​ມະ​ສອນ ຍັງ​ໄດ້ຍົ​ກ​ໃຫ້​ເຫັນ​ເຖິງຄວາມໝາຍ ​ແລະ ຄວາມ​ສຳຄັນຂອງ​ວັນ​ເຊັນ​ສັນ​ຍາ​ມິດຕະພາບ-​ການ​ຮ່ວມ​ມື​ ຄົບຮອບ 43 ປີ ​ແລະ ວັນ​ສ້າງ​ຕັ້ງ​ສາຍ​ພົວພັນ​ການ​ທູດ ​ລາວ-​ຫວຽດນາມ ຄົບຮອບ 58 ປີ ອີກ​ດ້ວຍ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດ)