ໃນວັນທີ 8 ກໍລະກົດ 2020, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ພ້ອມດ້ວຍຄະນະ ໄດ້ລົງຕິດຕາມຂະບວນການຜະລິດຜ້າອັດປາກ-ດັງ ຢູ່ 2 ໂຮງງານ ຄື: ໂຮງງານຜະລິດ ຜ້າອັດປາກ-ດັງ ໄອໂຊລອຍ ແລະ ໂຮງງານຜະລິດຜ້າອັດປາກ-ດັງ ນານາຊິນ ຢູ່ບ້ານດົງນາທອງ ເມືອງສີໂຄດຕະບອງ ນະຄອນຫລວງວຽງຈັນ. ໃຫ້ກຽດຕ້ອນຮັບຄະນະດັ່ງກ່າວ, ໂດຍ ທ່ານ ໂສວັນ ນຸພາບພາວົງສີ ຮອງຫົວໜ້າພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ, ພ້ອມດ້ວຍ ແລະ ຄະນະອໍານວຍການຂອງທັງສອງໂຮງງານ.

ໃນໂອກາດນີ້, ທ່ານ ນາງ ລັດຕະນາ ຈັນທະວີໄຊ ຜູ້ອຳນວຍການໂຮງງານ ຜະລິດຜ້າອັດປາກ-ດັງ ໄອໂຊລອຍ ໄດ້ລາຍງານໃຫ້ຮູ້ວ່າ: ໂຮງງານດັ່ງກ່າວ, ໄດ້ເລີ່ມສ້າງຕັ້ງຂຶ້ນ ໃນຕົ້ນປີ 2020 ໂດຍໄດ້ນຳເຂົ້າເຄື່ອງຈັກທີ່ທັນສະໄໝ ແລະ ມີມາດຕະຖານສູງ ຈາກ ສປ ຈີນ, ໃນນັ້ນປະກອບມີເຄື່ອງຈັກຜະລິດຜ້າອັດປາກ-ດັງສາມຊັ້ນ ຈຳນວນ 2 ເຄື່ອງ ແລະ ເຄື່ອງຈັກອື່ນໆ ມີທັງແບບອັດຕະໂນມັດ ແລະ ແບບໃຊ້ແຮງງານຄົນ, ໂດຍເນັ້ນການຜະລິດຜ້າອັດປາກ-ອັດດັງ ເພື່ອການຈຳໜ່າຍພາຍຢູ່ໃນເປັນສ່ວນໃຫຍ່, ເຊິ່ງປັດຈຸບັນ ແມ່ນໄດ້ເປີດລົດທອງການຜະລິດ ແລະ ໄດ້ນຳໃຊ້ແຮງງານຜະລິດພຽງ 8 ຄົນ, ເຊິ່ງຄວາມອາດສາມາດ ໃນການຜະລິດແມ່ນ 300.000-400.000 ອັນຕໍ່ມື້.

ພ້ອມດຽວກັນນີ້, ທ່ານ ນາງ ນັນທະໄລ ໄຊເສນາ ຜູ້ອຳນວຍການໂຮງງານ ຜະລິດຜ້າອັດປາກ-ດັງ ນານາຊິນ ກ່າວວ່າ: ປັດຈຸບັນ ແມ່ນໄດ້ສຳເລັດການຕິດຕັ້ງເຄື່ອງຜະລິດ ແລະ ພວມຢູ່ໃນຂັ້ນຕອນທົດລອງການຜະລິດ ໂດຍໄດ້ນຳໃຊ້ວັດຖຸໃນການຜະລິດທີ່ນຳເຂົ້າຈາກປະເທດໄທ ແລະ ຄາດວ່າຈະເລີ່ມເປີດການຜະລິດຜ້າ ອັດປາກ-ດັງ ຍີ່ຫໍ່ NNUP ຢ່າງເປັນທາງໃນທ້າຍເດືອນກໍລະກົດນີ້, ເຊິ່ງຄວາມອາດສາມາດໃນການຜະລິດແມ່ນ 80 ອັນຕໍ່ 1 ນາທີ, ໃນນັ້ນ 30% ຂອງຜະລິດຕະພັນທີ່ຜະລິດໄດ້ຈະຈໍາໜ່າຍຢູ່ພາຍໃນປະເທດ ແລະ ອີກ 70% ແມ່ນຈະສົ່ງອອກໄປຕ່າງປະເທດ.

ໃນໂອກາດນີ້, ທ່ານ ສອນໄຊ ສີພັນດອນ ໄດ້ເນັ້ນໃຫ້ສອງໂຮງງານດັ່ງກ່າວ, ເອົາໃຈໃສ່ສືບຕໍ່ປັບປຸງລະບົບ ການຜະລິດໃຫ້ມີຄວາມເປັນລະບຽບ, ພ້ອມທັງຕ້ອງມີວິຊາການ ຊ່ຽວຊານມາໃຫ້ການແນະ ນຳໃນການຜະລິດ ເພື່ອໃຫ້ໄດ້ຜະລິດຕະພັນທີ່ມີຄຸນນະພາບແນໃສ່ຮັບປະກັນໃຫ້ສາມາດນຳໃຊ້ເຂົ້າໃນການປ້ອງກັນເຊື້ອພະຍາດຕ່າງໆໃຫ້ມີປະສິດທິພາບສູງ. ພ້ອມກັນນັ້ນ, ກໍໃຫ້ປະສານງານກັບກະຊວງສາທາລະນະສຸກເພື່ອກວດກາມາດຕະຖານຄຸນນະພາບຂອງຜະລິດຕະພັນທຸກຂັ້ນຕອນຈົນໄປເຖິງການນຳອອກຈຳໜ່າຍ ແລະ ກໍຕ້ອງໄດ້ເອົາໃຈໃສ່ຄວບຄຸມລາຄາຈໍາໜ່າຍໃຫ້ມີລາຄາທີ່ສົມເຫດສົມຜົນເພື່ອໃຫ້ປະຊາຊົນລາວໄດ້ຊົມໃຊ້ຜະລິດຕະພັນຜ້າອັດປາກ-ດັງ ທີ່ຜະລິດຢູ່ພາຍໃນຢ່າງທົ່ວເຖິງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)