ເມື່ອບໍ່ດົນຜ່ານມານີ້, ທ່ານ ຄຳເຈນ ວົງໂພສີ  ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະໄດ້​ລົງ​ຊຸກຍູ້ ແລະ ຕິດຕາມ​ວຽກງານ​ສະພາບແນວຄິດ-ຫາງສຽງສັງຄົມ ຢູ່​ 5 ແຂວງພາກໃຕ້ ໂດຍການຕ້ອນຮັບຈາກ ທ່ານ ມະໄລທອງ ກົມມະສິດ ຄະນະປະຈຳພັກແຂວງ, ຮອງເຈົ້າແຂວງຈຳປາສັກ ແລະ ຮັບຟັງລາຍ​ງານ​ສະພາບ​ໂດຍຫຍໍ້ ການຈັດ​ຕັ້ງ​ປະຕິບັດ​ວຽກງານ​ພາຍໃນ ​ໄລຍະ​ຜ່ານ​ມາ ​ໂດຍສະເພາະແມ່ນຜົນຂອງການຊີ້ນຳ-ນຳພາວຽກງານ ຮອບດ້ານຂອງຄະນະ​ນຳແຂວງ ​ເປັນຕົ້ນ ​ສະພາບ​ລວມຂອງ​ແຂວງ​, ວຽກງານຕ້ານການລະບາດຂອງພະຍາດ ໂຄວິດ-19 ​ແລະ ກະກຽມດໍາເນີນກອງປະຊຸມໃຫຍ່ 3 ຂັ້ນ ຂອງແຂວງຈໍາປາສັກ.​

ຈາກນັ້ນ, ທ່ານ ​ຮອງ​ຫົວໜ້າຄະນະ​ໂຄສະນາ​ອົບຮົມ​ສູນ​ກາງ​ພັກ ກໍ​ໄດ້​ເຂົ້າຮ່ວມເປັນປະທານກອງປະຊຸມ ຮັບສ່ອງແສງສະພາບ ແນວຄິດ-ຫາງສຽງສັງຄົມ ປະຈຳພາກໃຕ້ ​ກັບທ່ານ ໜູຈັນ ຈັນທະພົງ ຄະນະປະຈຳພັກແຂວງ, ປະທານກວດກາພັກ-ລັດແຂວງ ໂດຍມີຫົວໜ້າຄະນະໂຄສະນາອົບຮົມ 5 ແຂວງພາກໃຕ້, ມີຜູ້ຕາງໜ້າແນວລາວ ສ້າງຊາດແຂວງ, ຜູ້ຕາງໜ້ານະຄອນປາກເຊ ແຂວງຈຳປາສັກ ເຂົ້າຮ່ວມ. ກອງປະຊຸມໄດ້ຮັບຟັງການລາຍງານ ໂດຍຫຍໍ້ກ່ຽວກັບສະພາບການເຄື່ອນໄຫວ ວຽກງານ ໂຄສະນາ-ອົບຮົມ ໂດຍລົງເລິກສະພາບແນວຄິດ ແລະ ຫາງສຽງສັງຄົມ ຈາກຜູ້ຕາງໜ້າຄະນະປະຈໍາພັກແຂວງ, ຄະນະໂຄສະນາອົບຮົມ 5 ແຂວງພາກໃຕ້ ລວມທັງ ແຂວງສະຫວັນນະເຂດ, ຕາງໜ້າແນວລາວ ສ້າງຊາດແຂວງ, ຕາງໜ້ານະຄອນປາກເຊ. ຜ່ານການສ່ອງແສງເຫັນໄດ້ຜົນງານດ້ານທີ່ຕັ້ງໜ້າ ແລະ ບາງວຽກງານທີ່ຈະຕ້ອງໄດ້ ເອົາໃຈໃສ່ປັບປຸງຕື່ມ ກ່ຽວກັບວຽກງານ ທີ່ພົວພັນເຖິງວຽກງານການເມືອງ-ແນວຄິດຂອງພະນັກງານສະມາຊິກພັກ, ນັກຮົບ ແລະ ປະຊາຊົນບັນດາເຜົ່າຢູ່ 5 ແຂວງພາກໃຕ້.

ໃນໂອກາດດັ່ງກ່າວ, ທ່ານ ຄຳເຈນ ວົງໂພສີ ກໍໄດ້ມີຄວາມເຫັນແລກປ່ຽນໃນກອງປະຊຸມ ໂດຍໄດ້ສະແດງຄວາມຍ້ອງຍໍຊົມເຊີຍ, ຂອບໃຈຕໍ່ການຕ້ອນຮັບອັນອົບອຸ່ນຂອງການນຳແຂວງຈຳປາສັກ, ທັງໄດ້ຕີລາຄາສູງຕໍ່ການປະຕິບັດໜ້າທີ່ຂອງຄະນະໂຄສະນາອົບຮົມແຕ່ລະແຂວງ ທີ່ໄດ້ປະກອບສ່ວນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາແຕ່ລະທ້ອງຖິ່ນໃນຕະຫລອດໄລຍະຜ່ານມາ ແລະ ສະເໜີໃຫ້ຄະນະໂຄສະນາອົບຮົມແຕ່ລະແຂວງສືບຕໍ່ຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນເພື່ອແນໃສ່ເຮັດໃຫ້ໜ້າທີ່ການເມືອງຂອງຕົນສືບຕໍ່ມີບາດກ້າວຫັນປ່ຽນໃໝ່ທີ່ຕັ້ງໜ້າ.

ສິ່ງສຳຄັນແມ່ນໃຫ້ຄະນະໂຄສະນາອົບຮົມແຕ່ລະແຂວງ ສືບຕໍ່ກຳແໜ້ນແນວທາງ, ນະໂຍບາຍຂອງ ພັກ-ລັດ, ແຜນການຂອງ ຄະນະພັກທ້ອງຖິ່ນ ຕິດພັນກັບການກຳແໜ້ນພາລະບົດບາດ, ສິດ, ໜ້າທີ່ຂອງ​ຕົນເພື່ອສືບຕໍ່ເປັນເສນາທິການທີ່ດີ ​ແລະ ມີຜົນສຳເລັດຫລາຍກວ່າເກົ່າໃນດ້ານວຽກງານ ການເມືອງ-ແນວຄິດ ໃຫ້ການນຳ​ແຂວງເອົາໃຈໃສ່ປັບປຸງແບບແຜນວິທີເຮັດວຽກ ລວມທັງການປະສານສົມທົບກັບອົງການເສນາທິການພາກສ່ວນອື່ນເຊັ່ນ: ຫ້ອງວ່າການ, ຄະນະຈັດຕັ້ງ, ຄະນະກວດກາເພື່ອໃຫ້ວຽກງານຕ່າງໆໄປລວງດຽວກັນ. ພ້ອມນີ້, ກໍສືບຕໍ່ອົດທົນຜ່ານຜ່າ​ຝຶກຝົນທາງດ້ານຄຸນທາດການເມືອງ, ແບບ​ແຜນການເຮັດວຽກ ​ແລະ ການດຳລົງຊີວິດໃຫ້ດີຂຶ້ນເລື້ອຍໆ​ເພື່ອ​ເປັນ​ຕົວ​ແບບ​ທີ່​ດີໃຫ້ພາກສ່ວນອື່ນໆ.

ພາຍຫລັງ ສຳເລັດກອງປະຊຸມແລ້ວ ທ່ານ ຄຳເຈນ ວົງໂພສີ ຍັງໄດ້ເດີ່ນທາງໄປຢ້ຽມຢາມທ່ານ ຄຳໄຕ ສີພັນດອນ ອະດີດປະທານ ພັກປະຊາຊົນປະຕິວັດລາວ, ອະດີດປະທານປະເທດ ແຫ່ງ ສປປ ລາວ ເພື່ອຢ້ຽມຄຳນັບ ແລະ ຂໍທິດຊີ້ນຳກ່ຽວກັບ ການເຄື່ອນໄຫວເຮັດວຽກງານໂຄສະນາອົບຮົມ ໃນໄລຍະໃໝ່ເພື່ອກະກຽມທຸກເງື່ອນໄຂກ້າວເຂົ້າສູ່ກອງປະຊຸມໃຫຍ່ ຄັ້ງທີ XI  ພັກໃນຕໍ່ໜ້າ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)