ສູນຊ່ວຍເຫລືອຜູ້ດ້ອຍໂອກາດທາງສັງຄົມ ເປັນໜຶ່ງໃນ 4 ສູນ ທີ່ແຂວງຈຳປາສັກ, ຄັດເລືອກໃຫ້ເປັນຈຸດກັກກັນແຮງງານ ທີ່ກັບມາຈາກຕ່າງປະເທດ ແລະ ປັດຈຸບັນກໍຍັງສືບຕໍ່ປະຕິບັດຢູ່.

ທ່ານ ສີອຸຍ ສີລາລັດ ຫົວໜ້າສູນຊ່ວນເຫລືອ ຜູ້ດ້ອຍໂອກາດທາງສັງຄົມ ທັງເປັນຫົວໜ້າສູນກັກກັນຫລັກ 21, ໄດ້ໃຫ້ສຳພາດຕໍ່ສື່ມວນຊົນໃນວັນທີ 8 ກໍລະກົດ 2020 ນີ້ວ່າ: ສູນກັກກັນຫລັກ 21 ແຕ່ເດີມສູນດັ່ງກ່າວ, ເປັນສູນຊ່ວຍເຫລືອ ຜູ້ດ້ອຍໂອກາດທາງສັງຄົມ, ເຊິ່ງຕັ້ງຢູ່ບ້ານໝໍ້ພຸ ເມືອງປະທຸມພອນ ແຂວງຈຳປາສັກ. ປັດຈຸບັນອຳນາດການປົກຄອງແຂວງ ໄດ້ກຳນົດໃຫ້ເປັນສູນກັກກັນແຮງງານລາວ ທີ່ເຄື່ອນຍ້າຍມາແຕ່ຕ່າງປະເທດ, ເຊິ່ງພວກເຂົາແມ່ນ ໄດ້ຮັບຜົນກະທົບໂດຍກົງ ຈາກພະຍາດໂຄວິດ-19 ແລະ ໃນການມາກັກຕົວຢູ່ສູນແຫ່ງນີ້ ແຮງງານແມ່ນຈະໄດ້ປະຕິບັດ ຕາມລະບຽບຫລັກການ ໂດຍສະເພາະ ການເວັ້ນໄລຍະຫ່າງ, ການກິນ, ການນອນ ແລະ ມີການວັດແທກ ອຸນຫະພູມເຊົ້າ-ແລງ, ໃສ່ຜ້າອັດປາກ-ອັດດັງ, ລ້າງມືດ້ວຍເຈວ ແລະ ອື່ນໆ.

ສຳລັບການກັກກັນຢູ່ພາຍໃນສູນນີ້, ທ່ານ ສີອຸຍ ສີລາລັດ ຍັງໃຫ້ຮູ້ຕື່ມວ່າ: ມາຮອດດຽວນີ້ຍັງມີແຮງງານ ຖະຍອຍເຂົ້າມາເລື້ອຍໆ ສະເລ່ຍແຕ່ວັນທີ 27 ເມສາ ເຖິງປັດຈຸບັນ ມີແຮງງານເຂົ້າມາກັກຕົວທັງໝົດ 1.326 ຄົນ, ຍິງ 692 ຄົນ, ສະເພາະດຽວນີ້ ແມ່ນຍັງກັກຕົວຢູ່ 199 ຄົນ, ແຕ່ການກັບມາຂອງແຮງງານ ແລະ ຄວາມອາດສາມາດຂອງສູນ ແມ່ນເຫັນວ່າຍັງບໍ່ພຽງພໍ ເປັນຕົ້ນ ສະຖານທີ່ກັກກັນ, ເຊິ່ງສາມາດຮອງຮັບໄດ້ບໍໍ່ເກີນ 200 ຄົນ, ອາຫານການກິນ ແລະ ສິ່ງຂອງເຄື່ອງໃຊ້ທີ່ຈຳເປັນນັ້ນ ທາງສູນແມ່ນຍັງມີຄວາມ ຕ້ອງການຈຳນວນຫລາຍ ເພື່ອມາບໍລິຫານວຽກງານ ພາຍໃນສູນດັ່ງກ່າວ.