ການພົວພັນຮ່ວມມື ລະຫວ່າງ ສປປ ລາວ-ສ.ເກົາຫຼີ

0
183
Laos flag with South Korea flag, 3D rendering

ສາທາລະນະລັດ ເກົາຫຼີ (ສ.ເກົາຫຼີ) ຕັ້ງຢູ່ທິດຕາເວັນອອກສ່ຽງເຫນືອຂອງທະວີບອາຊີ, ມີພົນ ລະເມືອງປະມານ 51,41 ລ້ານຄົນ, ເປັນປະເທດຫນຶ່ງທີ່ມີຄວາມເຂັ້ມແຂງທາງດ້ານເສດຖະ ກິດຢູ່ໃນໂລກ ແລະ ກໍເປັນສະມາຊິກຂອງກຸ່ມປະເທດ G-20. ສປປ ລາວ ແລະ ສ.ເກົາຫຼີ ໄດ້ ສ້າງຕັ້ງສາຍພົວພັນການທູດນໍາກັນໃນປີ 1995. ຕະຫຼອດໄລຍະຫຼາຍກວ່າ 2ທົດສະວັດຜ່ານ ມາ, ສອງປະເທດໄດ້ເພີ່ມທະວີ ແລະ ເສີມຂະຫຍາຍການພົວພັນຮ່ວມມື 2 ຝ່າຍ, ໃນຫຼາຍ ດ້ານຊຶ່ງສະແດງອອກໃນການແລກປ່ຽນການຢ້ຽມຢາມສອງຝ່າຍລະຫວ່າງການນໍາສອງປະ ເທດ ເປັນຕົ້ນແມ່ນລະດັບປະມຸກລັດ, ຫົວຫນ້າລັດຖະບານ, ຄະນະລັດຖະບານຕະຫຼອດ ຮອດການໄປມາຫາສູ່ກັນ ລະຫວ່າງປະຊາຊົນລາວ ແລະ ປະຊາຊົນ ສ.ເກົາຫຼີ. ການພົວພັນທີ່ ດີດ້ານການເມືອງລະຫວ່າງສອງປະເທດໄດ້ສ້າງເງື່ອນໄຂ ແລະ ສະພາບແວດລ້ອມທີ່ດີໃຫ້ ແກ່ການຂະຫຍາຍການຮ່ວມມືໃນຂົງເຂດເສດຖະກິດ, ການຄ້າ, ການຮ່ວມມືດ້ານການພັດ ທະນາເຊັ່ນ: ໃນປີ 2018 ມູນຄ່າການຄ້າສອງຝ່າຍສາມາດບັນລຸ 69,5 ລ້ານໂດລາ ຊຶ່ງເພີ່ມ ຂຶ້ນເກືອບ 10% ເມື່ອທຽບກັບປີທີ່ຜ່ານມາ, ໃນນີ້ສິນຄ້າສົ່ງອອກໄປ ສ.ເກົາຫຼີ ປະກອບດ້ວຍ ສິ່ງປຸງແຕ່ງຈາກພືດຜັກ, ຫມາກໄມ້ ແລະ ຫມາກໄມ້ເປືອກແຂງ, ກາເຟ, ເບຍ ແລະ ອື່ນໆ. ສ່ວນສິນຄ້ານໍາເຂົ້າຈາກ ສ.ເກົາຫຼີ ກໍມີພາຫະນະທາງບົກ, ສິ້ນສ່ວນອາໄຫຼ່ລົດ, ອຸປະກອນກົນ ຈັກເຄື່ອງໄຟຟ້າ,ອຸປະກອນໄຟຟ້າ ແລະ ອື່ນໆ.

ດ້ານການລົງທຶນ, ສ.ເກົາຫຼີ ຈັດຢູ່ໃນອັນດັບ 5 ຂອງການລົງທຶນຕ່າງປະເທດທັງຫມົດຢູ່ ສປປ ລາວ ລວມມູນຄ່າ 750 ລ້ານກວ່າໂດລາ , ໃນ ນັ້ນ ໂຄງການໃຫຍ່ທີ່ພົ້ນເດັ່ນ ຄື: ໂຄງ ການເຂື່ອນໄຟຟ້າເຊປຽນ-ເຊນໍ້ານ້ອຍ, ໂຄງການປູກ ໄມ້ວິກ ແລະ ສ້າງຕັ້ງໂຮງງານປຸງແຕ່ງ ໄມ້ ແລະ ອື່ນໆ. ສ.ເກົາຫຼີ ເປັນປະເທດຫນຶ່ງທີ່ໃຫ້ການ ສະຫນັບສະຫນູນ, ຮ່ວມມື ແລະ ຊ່ວຍ ເຫຼືອ ສປປ ລາວ ໃນການຈັດຕັ້ງຜັນຂະຫຍາຍແຜນ ພັດທະນາເສດຖະກິດ-ສັງຄົມແຫ່ງ ຊາດ 5 ປີ ຄັ້ງທີ VIII ໃນຫຼາຍດ້ານ ເຊັ່ນ: ການຮ່ວມມື ດ້ານສາທາລະນະສຸກ, ສ.ເກົາຫຼີ ໄດ້ໃຫ້ ການຊ່ວຍເຫຼືອທາງດ້ານວິຊາການ ແລະ ເຕັກນິກການ ແພດແກ່ ສປປ ລາວ ຕໍ່ເນື່ອງ ໂດຍ ໄດ້ມີການຍົກລະດັບວິຊາການຂອງ ໂຮງຫມໍຕ່າງໆຂອງ ສປປ ລາວ ທັງໄລຍະສັ້ນ ແລະ ໄລຍະ ຍາວຊ່ວຍສ້າງໂຮງຫມໍເດັກ, ຊ່ວຍເຫຼືອຜ່າຕັດເດັກ ນ້ອຍລາວ ຜູ້ທຸກຍາກທີ່ເປັນພະຍາດ ຫົວໃຈ ແລະ ພະຍາດອື່ນໆໂດຍບໍ່ເສຍຄ່າ. ໃນຂົງເຂດການຮ່ວມມືດ້ານການສຶກສາ ແລະ ກິ ລາ, ສອງຝ່າຍໄດ້ມີການແລກປ່ຽນນັກສຶກສາ, ຄູ-ອາຈານ, ຄູຝຶກ ແລະ ສ.ເກົາຫຼີ ກໍໄດ້ຊ່ວຍ ສະຫນອງທຶນການສຶກສາ ໃນລະດັບຕ່າງໆທັງໃນໄລຍະສັ້ນ ແລະ ໄລຍະຍາວໃຫ້ແກ່ນັກສຶກສາ ລາວໄປຮຽນ-ສຶກສາ ທີ່ ສ.ເກົາຫຼີ ໃນແຕ່ລະປີຫຼາຍ ສົມຄວນ.

ພ້ອມນີ້ ກໍໄດ້ຊ່ວຍສ້າງສະ ຫນາມກິລາເບັສບອນແຫ່ງທໍາອິດຂອງ ສປປ ລາວ. ການຮ່ວມມື ດ້ານແຮງງານ, ນັບແຕ່ປີ 2016 ເປັນຕົ້ນມາທີ່ສອງຝ່າຍໄດ້ມີການລົງນາມບົດບັນທຶກ ຄວາມເຂົ້າໃຈວ່າດ້ວຍການຈັດສົ່ງແຮງງານໄປເຮັດ ວຽກຢູ່ ສ.ເກົາຫຼີ ຮ່ວມກັນມາເຖິງປັດຈຸ ບັນກໍໄດ້ມີແຮງງານລາວ ຈໍານວນ 200 ກວ່າຄົນ ທີ່ເດີນທາງໄປເຮັດວຽກຢູ່ ສ.ເກົາຫຼີ. ການ ຮ່ວມມືດ້ານການທ່ອງທ່ຽວ ແຕ່ປີ 2012 ເປັນຕົ້ນມາສອງປະເທດໄດ້ເປີດສາຍການບິນໂດຍ ກົງຊຶ່ງເຮັດໃຫ້ການໄປມາຫາສູ່ລະຫວ່າງປະຊາຊົນສອງຊາດມີຄວາມສະດວກຫຼາຍຂຶ້ນ. ພ້ອມນີ້ ສປປ ລາວ ກໍໄດ້ຍົກເວັ້ນວີຊາໃຫ້ແກ່ພົນລະເມືອງ ສ.ເກົາຫຼີ ແລະ ສາມາດພັກເຊົາຢູ່ ສປປ ລາວ ໄດ້ 30 ວັນຕໍ່ຄັ້ງ. ໃນປີ 2018 ໄດ້ມີນັກທ່ອງທ່ຽວຈາກ ສ.ເກົາຫຼີ ເດີນທາງເຂົ້າ ລາວຫຼາຍກວ່າຫນຶ່ງແສນເຈັດສິບພັນເທື່ອຄົນ. ການຮ່ວມມືດ້ານພະລັງງານ, ສອງຝ່າຍໄດ້ ມີບົດບັນທຶກຄວາມເຂົ້າໃຈວ່າດ້ວຍການຮ່ວມມືໃນການພັດທະນາໂຄງການຕົວແບບຫມູ່ບ້ານເປັນມິດຕໍ່ສິ່ງແວດລ້ອມດ້ານພະລັງງານ ແລະ ບົດບັນທຶກຄວາມເຂົ້າໃຈວ່າດ້ວຍການ ເພີ່ມທະວີການຮ່ວມມືທາງດ້ານຊັບພະຍາກອນພະລັງງານ ແລະດ້ານແຮ່ທາດ. ປັດຈຸບັນ ແມ່ນມີຫຼາຍໂຄງການ ເຊັ່ນ: ໂຄງການສາທິດການນໍາໃຊ້ນ້ໍາມັນກາຊວນຊີວະພາບ; ໂຄງ ການສຶກສາຄວາມເປັນໄປໄດ້ໃນການສະຫນອງພະລັງງານໄຟຟ້າແສງຕາເວັນ ແລະ ໂຄງ ການອື່ນໆ. ນອກຈາກນັ້ນ, ຍັງມີການຮ່ວມມືທາງດ້ານວິທະຍາສາດ-ເຕັກໂນໂລຊີ, ຂ່າວສານ, ສິລະປະ – ວັດທະນະທໍາ, ກົດຫມາຍ, ການເກັບກູ້ລະເບີດທີ່ບໍ່ ທັງແຕກໃນປາງສົງຄາມ ແລະ ການຮ່ວມມືດ້ານອື່ນໆອີກ. ໃນໂອກາດການຢ້ຽມຢາມ ສປປ ລາວ ຂອງປະທານາທິບໍດີມູນ ແຈອິນແຫ່ງ ສ.ເກົາຫຼີ ໃນວັນທີ 5-6 ກັນຍາ ທີ່ຈະມາເຖິງນີ້ຄາດວ່າສອງປະເທດຈະໄດ້ລົງ ນາມເອກະສານຮ່ວມມືອີກ 4 ສະບັບ.

ແຫຼ່ງຂໍ້ມູນຈາກ: ໜັງສືພິມ ປະຊາຊົນ