ເລີ່ມແຕ່ວັນທີ 10 ກໍລະກົດ 2020 ຈົນຮອດ ເດືອນກັນຍາ ນະຄອນຫລວງວຽງຈັນ ຄາດວ່າຈະປ່ອຍປາຄືນສູ່ທຳມະຊາດ ຫລາຍກວ່າ 1 ລ້ານໂຕ, ຜະລິດປານ້ອຍໃຫ້ໄດ້ 29-30 ລ້ານໂຕ, ປ່ອຍປາໃນໜອງ ແລະ ໃນກະຊັງປະມານ 150 ລ້ານໂຕ, ເພື່ອເປັນສະບຽງອາຫານ ແລະ ເປັນສິນຄ້າ. ສະເພາະຢູ່ຄອງນໍ້າວຽງຈັນ ບ້ານດອນກອຍ, ຈະປ່ອຍປາ 180.000 ໂຕ (ປາກິນຫຍ້າ, ປາປາກ, ປາທຳມະຊາດ, ເຕົ່າ 27 ໂຕ ແລະ ສັດອື່ນໆອີກ ຈຳນວນໜຶ່ງ.

ໃນວັນທີ 13 ກໍລະກົດ 2020, ທີ່ຄອງນໍ້າວຽງຈັນ ບ້ານດອນກອຍ ເມືອງສີສັດຕະນາກ ນະຄອນຫລວງວຽງຈັນ ໄດ້ມີພິທີສະເຫລີມສະຫລອງວັນປ່ອຍປາ ແລະ ສັດນໍ້າ-ສັດປ່າ ແຫ່ງຊາດ ວັນທີ 13 ກໍລະກົດ ຄົບຮອບ 23 ປີ, ໂດຍການເຂົ້າຮ່ວມຂອງ ທ່ານ ຄຳບຸນນັດ ໄຊຍະນົນ ຮອງລັດ ຖະມົນຕີກະຊວງກະສິກຳ ແລະ ປ່າໄມ້, ມີອຳນາດການປົກຄອງຂັ້ນນະຄອນຫລວງ, ຂັ້ນເມືອງສີສັດຕະນາກ ພ້ອມດ້ວຍປະຊາຊົນ ບ້ານດອນກອຍ ແລະ ບ້ານອ້ອມຂ້າງເຂົ້າຮ່ວມ.

ໃນໂອກາດດັ່ງກ່າວ, ທ່ານ ຫລ້າສາຍ ນວນທະສິງ ຫົວໜ້າພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ໄດ້ກ່າວວ່າ: ສຳລັບປີ 2020 ນີ້ ນະຄອນຫລວງວຽງຈັນ ຈະສືບຕໍ່ເປີດຂະບວນການ ສະເຫລີມສະຫລອງວັນປ່ອຍປາ ແລະ ອະນຸລັກສັດນໍ້າ-ສັດປ່າ ແຫ່ງຊາດ 13 ກໍລະກົດ, ຊຶ່ງທັງເປັນຄ້າຍ ວັນເກີດຂອງ ປະທານ ສຸພານຸວົງ ຄົບຮອບ 111 ປີ ໃຫ້ເປັນຂະບວນຟົດຟື້ນ, ປະ ກອບສວ່ນສ້າງຜົນງານຕ້ອນຮັບກອງປະຊຸມໃຫຍ່ ຂອງອົງຄະນະພັກ ນະຄອນຫລວງວຽງຈັນ ແລະ ວັນສຳຄັນຂອງຊາດ, ເຊິ່ງບັນດາເມືອງ ແລະ ອົງການປົກຄອງບ້ານ ຈະຈັດພິທີປ່ອຍປາຄືນສູ່ທຳມະຊາດ ຢູ່ 12 ແຫ່ງ, ເລີ່ມແຕ່ວັນທີ 10 ກໍລະກົດ 2020 ຈົນຮອດເດືອນກັນຍາ ຄາດວ່າຈະປ່ອຍປາຄືນສູ່ ທຳມະຊາດຫລາຍກວ່າ 1 ລ້ານໂຕ, ຜະລິດປານ້ອຍໃຫ້ໄດ້ 29-30 ລ້ານໂຕ, ປ່ອຍປາໃນໜອງ ແລະ ໃນກະຊັງປະມານ 150 ລ້ານໂຕ, ເພື່ອເປັນສະບຽງອາຫານ ແລະ ເປັນສິນຄ້າ.

ສະເພາະຢູ່ສະຖານທີ່ແຫ່ງນີ້ ມື້ນີ້ຈະປ່ອຍປາ 180.000 ໂຕ (ປາກິນຫຍ້າ, ປາປາກ, ປາທຳມະຊາດ, ເຕົ່າ 27 ໂຕ ແລະ ສັດອື່ນໆ ອີກຈຳນວນໜຶ່ງ. ພ້ອມກັນນີ້, ຈະສືບຕໍ່ເຜີຍແຜ່ ຄໍາສັງເລກທີ 0682/ກປ, ລົງວັນທີ 10 ມິຖຸນາ 2020 ໃຫ້ປະຕິບັດ ຄື: ຫ້າມຈັບ, ຊື້-ຂາຍ, ບໍ່ລ້າ ສັດນໍ້າ-ສັດປ່າ ໂດຍສະເພາະປະເພດຫວງຫ້າມ ແລະ ປະເພດຄຸ້ມຄອງ, ບໍ່ຫາປາໃນໄລຍະລະດູວາງໄຂ່ ຫລື ໄລຍະເຂົ້າ ພັນສາ,  ບໍ່ຕັນທາງເດີນຂອງປາຂຶ້ນວາງໄຂ່ ດ້ວຍວິທີເຮັດຕ້ອນ, ເຮັດລີ່ ແລະ ອື່ນໆ ທີ່ເປັນການລະເມີດກົດ ໝາຍວ່າດ້ວຍສັດນໍ້າ ແລະ ສັດປ່າ ແລະ ກົດໝາຍວ່າດວ້ຍການປະມົງ.

ທ່ານ ຫລ້າສາຍ ນວນທະສິງ ຍັງໃຫ້ຮູ້ອີກວ່າ: ນະຄອນຫລວງວຽງຈັນ ໄດ້ສົມທົບກັບພາກສ່ວນຕ່າງໆ ແລະ ອົງການປົກຄອງບ້ານລຽບຕາມສາຍແມ່ນໍ້າຂອງ, ນໍ້າງື່ມ, ນໍ້າສັງ, ນໍ້າຕອນ ແລະ ໝອງນໍ້າທຳມະຊາດ ຄຸ້ມຄອງວັງສະຫງວນຈຳນວນທັງໝົດ 35 ແຫ່ງ ກວມເນື້ອທີ່ຫລາຍກວ່າ 339 ຮຕ ຢູ່ເມືອງສັງທອງ, ສີໂຄດຕະບອງ, ນາຊາຍທອງ, ໄຊທານີ, ຫາດຊາຍຟອງ ແລະ ເມືອງປາກງື່ມ. ນອກນັ້ນ, ຍັງໄດ້ກໍານົດເຂດອະນຸລັກຊ້າງຢູ່ເຂດພູພະນັງ-ເມືອງສັງທອງ ແລະ ໂຄງການອະນຸລັກນົກຍຸງປ່າ ຢູຕາດພັກຊອຍວອຍ ພູເຂົາຄວາຍ ບ້ານນາຄັນທຸງ ເມືອງໄຊທານີ ແລະ ສົ່ງເສີມການລ້ຽງປາ ແລະ ສັດນໍ້າ ເພື່ອຄໍ້າປະກັນສະບຽງອາຫານ ແລະ ເປັນສິນຄ້າ ໃຫ້ໄດ້ 25-26 ພັນໂຕນ/ປີ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)