ອັດຕະປື ຈະດຶງດູດນັກທ່ອງທ່ຽວໃຫ້ຫຼາຍຂຶ້ນ ພາຍຫຼັງໄດ້ຮັບຜົນກະທົບຈາກພະຍາດໂຄວິດ-19

0
316

ທ່ານ ນາງ ບຸນນານ ບຸນຍະແສງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງອັດຕະປື ລາຍງານຕໍ່ສື່ມວນຊົນ ໃນວັນທີ 8 ກໍລະກົດ 2020 ນີ້ວ່າ: ຈາກຜົນການສຳຫຼວດຂໍ້ມູນຕາມແບບສອບຖາມຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຕັ້ງແຕ່ເດືອນກຸມພາ ຫາ ເດືອນເມສາ 2020 ສາມາດສະຫຼຸບໄດ້ວ່າ ຕັ້ງແຕ່ເດືອນກຸມພາເປັນຕົ້ນມາຫົວໜ່ວຍທຸລະກິດການທ່ອງທ່ຽວເກືອບທັງໝົດທົ່ວແຂວງອັດຕະປື ໄດ້ຢຸດຕິການບໍລິການ ເນື່ອງຈາກບໍ່ມີແຂກມາໃຊ້ບໍລິການ ໃນນີ້ມີບັນດາບໍລິສັດທ່ອງທ່ຽວ 3 ບໍລິສັດ, ໂຮງແຮມ 21 ແຫ່ງ, ເຮືອນພັກ 26 ແຫ່ງ, ຮ້ານອາຫານ 51 ແຫ່ງ, ພັດຕະຄານ 1 ແຫ່ງ, ຮ້ານກິນດື່ມ 34 ຮ້ານ ແລະ ຮ້ານບັນເທີງ 1 ຮ້ານ, ສະຖານທີ່ທ່ອງທ່ຽວບໍລິການຈຳນວນ 15 ແຫ່ງ. ເຊິ່ງເປັນສາຍເຫດເຮັດໃຫ້ຈຳນວນນັກທ່ອງທ່ຽວ 3 ເດືອນຕັ້ນປີ 2020 ຫຼຸດລົງຫຼາຍ ຖ້າທຽບໃສ່ແຜນປີ 2020 ບັນລຸໄດ້ພຽງແຕ່ 13,84%.

ບັນດາແຂກນັກທ່ອງທ່ຽວທີ່ມາໃຊ້ບໍລິການໂຮງແຮມ, ຣີສອດ, ຮ້ານອາຫານ, ຮ້ານກິນດື່ມ, ຮ້ານບັນເທີງ, ບໍລິສັດທ່ອງທ່ຽວ ແລະ ສະຖານທີ່ທ່ອງທ່ຽວຕ່າງໆ ນັກທ່ອງທ່ຽວພາຍໃນປະເທດຫຼຸດລົງ 50% ແລະ ນັກທ່ອງທ່ຽວຕ່າງປະເທດຫຼຸດລົງ 90%.

ທ່ານຍັງໃຫ້ຮູ້ອີກວ່າ ບັນດາດ່ານສາກົນ, ດ່ານປະເພນີ, ດ່ານທ້ອງຖິ່ນ ໄດ້ຖືກປິດການເຂົ້າ-ອອກດ່ານ ນັບແຕ່ວັນທີ 21 ມີນາ 2020 ເປັນຕົ້ນມາ ຕໍ່ກັບບັນຫາດັ່ງກ່າວແມ່ນໄດ້ສົ່ງຜົນກະທົບຕໍ່ເສດຖະກິດ ໂດຍສະເພາະຂະແໜງອຸດສາຫະກຳການທ່ອງທ່ຽວ ພາຍໃນແຂວງ ເປັນຕົ້ນແມ່ນໂຮງແຮມ, ເຮືອນພັກ, ຣີສອດ, ຮ້ານອາຫານ, ຮ້ານກິນດື່ມ, ຮ້ານບັນເທີງ, ບໍລິສັດທ່ອງທ່ຽວ ແລະ ສະຖານທີ່ທ່ອງທ່ຽວຕ່າງໆພາຍໃນແຂວງ ລວມທັງການຄົມມະນາຄົມຂົນສົ່ງຕ່າງໆກໍ່ໄດ້ຮັບຜົນກະທົບ.

ຈາກການສຳຫຼວດຂໍ້ມູນ ສາມາດຄາດຄະເນຄວາມເສຍໂອກາດທາງທຸລະກິດຜູ້ປະກອບການດ້ານການທ່ອງທ່ຽວ ກໍ່ຄືການກະຈາຍລາຍໄດ້ ຈາກນັກທ່ອງທ່ຽວທີ່ຈະເຂົ້າມາແຂວງເຖິງ 15,461 ຕື້ກີບ.

ທ່ານຍັງກ່າວຕື່ມອີກວ່າ ໃນປີ 2020 ນີ້ ອັດຕະປືມີແຜນການດຶງດູດນັກທ່ອງທ່ຽວ ເຂົ້າມາແຂວງທັງໝົດ 170,000 ຄົນ, ຄາດຄະເນການກະຈາຍລາຍໄດ້ທີ່ຈພເຂົ້າມາແຂວງເຖິງ 63,252 ຕື້ກີບ. ແຕ່ເມື່ອຕ້ອງປະເຊີນກັບການລະບາດຂອງພະຍາດໂຄວິດ-19 ມາຮອດ 6 ເດືອນຕົ້ນປີ 2020 ມີນັກທ່ອງທ່ຽວເຂົ້າມາພາຍໃນແຂວງພຽງແຕ່ 35,819 ຄົນ ຖ້າທຽບໃສ່ແຜນປີ 2020 ບັນລຸໄດ້ພຽງແຕ່ 21,07%.

ເພື່ອແກ້ໄຂຜົນກະທົບດັ່ງກ່າວ ທາງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ມີແຜນແກ້ໄຂ ໂດຍອີງໃສ່ມາດຕະການຜ່ອນຜັນຂອງລັດຖະບານໃນແຕ່ລະໄລຍະ ມີການປະສານສົມທົບກັບພະແນກສາທາລະນະສຸກແຂວງອັດຕະປື ລົງຊຸກຍູ້ແຕ່ລະຫົວໜ່ວຍທຸລະກິດທ່ອງທ່ຽວ ຫຼື ກິດຈະການດ້ານທ່ອງທ່ຽວ ທີ່ຢູ່ໃນບັນຊີ ທີ່ລັດຖະບານອະນຸຍາດເປີດ ໂດຍການອະນຸຍາດໃຫ້ເປີດບໍລິການ ແຕ່ຕ້ອງຮັບປະກັນບໍ່ໃຫ້ມີຄວາມສ່ຽງໃນການຕິດເຊື້ອ ເປັນຕົ້ນແມ່ນການຮັກສາໄລຍະຫ່າງ 1 ແມັດຂຶ້ນໄປ, ມີບ່ອນລ້າງມືດ້ວຍນຳສະອາດ ໃສ່ສະບູ ຫຼື ເຈວລ້າງມື, ໃສ່ຜ້າອັດປາກ-ດັງ, ວັດແທກອຸນຫະພູມ ແລະ ອະນາໄມສະຖານທີ່ຕາມຄຳແນະນຳຂອງຄະນະສະເພາະກິດທີ່ວາງອອກ.

ການຊຸກຍູ້ພາກທຸລະກິດສະມາຄົມທ່ອງທ່ຽວ ແລະ ບໍລິສັດທ່ອງທ່ຽວພາຍໃນແຂວງ ຮ່ວມກັບການສ້າງລາຍໄດ້ຈາກການທ່ອງທ່ຽວໃຫ້ຫຼາກຫຼາຍ, ມີສ່ວນຫຼຸດຫຼາຍຮູບແບບເປັນຕົ້ນແມ່ນ ສ່ວນຫຼຸດລາຍການທ່ອງທ່ຽວ, ສ່ວນຫຼຸດຄ່າບ້ານພັກ, ໂຮງແຮມ, ເຮືອນພັກ, ສາວນຫຼຸດຄ່າບໍລິການ, ອາຫານ ເຄື່ອງດື່ມ ແລະ ອື່ນໆ.

ຊຸກຍູ້ໃຫ້ບັນດາເມືອງມີກິດຈະກຳການທ່ອງທ່ຽວຕິດພັນກັບວັດທະນະທຳ, ຮີດຄອງປະເພນີຂອງທ້ອງຖິ່ນ, ວິຖີຊີວິດ, ຫັດຖະກຳ ແລະ ອາຫານທີ່ເປັນເກກະລັກຂອງທ້ອງຖິ່ນ ຫຼື ແຕ່ລະເມືຶອງ ໂດຍອີງໃສ່ສະພາບຈຸດພິເສດ ແລະ ທ່າແຮງຂອງແຕ່ລະເມືອງ ເຊິ່ງພະແນກຖະແຫຼງຂ່າວ, ວັດທະນະທະທຳ ແລະ ທ່ອງທ່ຽວ ກຳນົດຈັດບຸນປະເພນີຂອງແຕ່ລະເມືອງດັ່ງນີ້:

  1. ເມືອງສາມັກຄີໄຊ ກຳນົດເອົາບຸນປະເພນີຊ່ວງເຮືອອອກພັນສາຂອງເມືອງ ໃນຕົ້ນເດືອນຕຸລາ ຂອງແຕ່ລະປີ.
  2. ເມືອງໄຊເສດຖາ ກຳນົດເອົາບຸນນະມັດສະການ ພະເຈົ້າໄຊຍະເຊດຖາທິຣາດ ໃນຕົ້ນເດືອນພະຈິກ ຂອງແຕ່ລະປີ
  3. ເມືອງພູວົງ ກຳນົດເອົາບຸນປະເພນີຂອງຊົນເຜົ່າເບຣົາ, ບຸນບຣະວຽງ ໃນຕົ້ນເດືອນມັງກອນ ຂອງແຕ່ລະປີ.
  4. ເມືອງຊານໄຊ ກຳນົດເອົາບຸນກິນເຂົ້າໃໝ່ຂອງເຜົ່າຕະຫຼຽງ  ໃນກາງເດືອນຕຸລາຂອງແຕ່ລະປີ.
  5. ເມືອງສະໜາມໄຊ ກຳນົດເອົາບຸນປະເພນີໄຂປະຕູເລົ້າຂອງເຜົ່າໂອຍ ໃນທ້າຍເດືອນມັງກອນຂອງແຕ່ລະປີ.

ພ້ອມນັ້ນກໍ່ຈະສົ່ງເສີມການທ່ອງທ່ຽວແຫຼ່ງທຳມະຊາດ ທີ່ມີໃນແຕ່ລະເມືອງອີກດ້ວຍ ເປັນການສົ່ງເສີມການ ທ່ອງທ່ຽວພາຍໃນປະເທດ ຫຼື ເວົ້າອີກຢ່າງໜຶ່ງວ່າ “ລາວທ່ຽວລາວ”.

Medialaos MMD