ອາທິດແລ້ວນີ້, ທ່ານ ສູນໃຈ ຊາຕາກຸນ ຄະນະຄຸ້ມຄອງດ່ານຊາຍແດນສາກົນວັງເຕົ່າ ໄດ້ໃຫ້ສຳພາດຕໍ່ສື່ມວນຊົນ ກ່ຽວກັບການປະຕິບັດງານຂອງຄະນະສະເພາະກິດດ່ານສາກົນວັງເຕົ່າ ໃນການປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (COVID-19) ວ່າ: ເພື່ອປະຕິບັດຕາມທິດທາງແຜນການຂອງວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີປະສິດທິພາບສູງສຸດນັ້ນ ທາງຄະນະພັກພວກເຮົາໄດ້ຈັດຕັ້ງ ແລະ ແບ່ງຈຸໜ່ວຍປ້ອງກັນເວນຍາມສະຖານທີ່ພັກ ສໍານັກງານຂອງຕົນເອງໄດ້ ມີການແຕ່ງຕັ້ງຈຸໜ່ວຍເວນຍາມສໍານັກງານທີ່ຕັ້ງ ຕະຫລອດ 24 ຊົ່ວໂມງ ຢ່າງເປັນລະບົບຄົບຊຸດ.

ໂດຍໄດ້ແບ່ງອອກເປັນ 3 ຈຸ ຄື: ຈຸທີ 01 ແມ່ນຮັບຜິດຊອບເວນຍາມຫ້ອງການຈັດສັນ, ເຊິ່ງປະກອບມີເຈົ້າໜ້າທີ່ຈາລະຈອນປະຈໍາດ່ານ ສົມທົບກັບຄະນະບ້ານໃຫຍ່ພັດທະນາວັງເຕົ່າ (ປ້ອງກັນຢູ່ຄິວລົດ ແລະ ສະຖານທີ່ຄ່ຽນຖ່າຍສິນຄ້າກະສິກໍາ); ຈຸທີ 02: ຈຸດອາຄານດ່ານສາກົນວັງເຕົ່າ, ເຊິ່ງແມ່ນເຈົ້າໜ້າທີ່ ຕ.ມຮ່ວມກັບເຈົ້າໜ້າທີ່ຈາກໜ່ວຍງານອ້ອມຂ້າງດ່ານ (ປ້ອງກັນທີ່ຕັ້ງອາຄານດ່ານກວດ ກາຄົນເຂົ້າ-ອອກເມືອງ) ແລະ ຈຸທີ 03: ຈຸດຫ້ອງການພາສີປະຈໍາດ່ານ ສົມທົບກັບທະຫານກອງຕີພິ ເສດຈໍານວນ 01 ໝູ່ (ຕາມຊາຍແດນ ແລະ ຢູ່ຫລັງສາງຄ່ຽນຖ່າຍສິນຄ້ານໍາເຂົ້າ ແລະ ສົ່ງອອກ) ທຸກຈຸທຸກໜ່ວຍ ແມ່ນໄດ້ເຄື່ອນໄຫວປ້ອງກັນເວນຍາມຕາມຂອບເຂດຄວາມຮັບຜິດຊອບ, ເພື່ອບໍ່ໃຫ້ກຸ່ມຄົນທີ່ບໍ່ຫັວງດີ ມາກໍ່ຄວາມບໍ່ສະຫງົບ ແລະ ທໍາລາຍຄວາມສະຫງົບສຸກຂອງພວກເຮົາ, ເຊິ່ງມາຮອດວັນທີ 6 ເມສາ 2020 ທາງດ່ານສາກົນວັງເຕົ່າ ໄດ້ປິດການອະນຸຍາດໃຫ້ແຮງງານລາວ ເດີນທາງກັບປະເທດ ຈົນກວ່າສະພາບການລະບາດຂອງພະຍາດຈະດີຂຶ້ນ (ປະຕິບັດຕາມຄໍາສັ່ງເລກທີ 06/ນຍ). ເຖິງແມ່ນວ່າຂັ້ນເທິງມີຄໍາສັ່ງກໍ່ດີ, ແຕ່ກໍ່ຍັງມີແຮງງານລາວໄດ້ພາກັນມາອັ່ງອໍຢູ່ຝັ່ງໄທ ເປັນຈໍານວນຫລວງຫລາຍ, ເຊິ່ງເຫັນໄດ້ວ່າ ຕອນແລງເວລາປະມານ 15:00 ໂມງ, ຂອງວັນທີ 7-8 ເມສາ 2020 ມີແຮງງານລາວ ປະມານ 450 ຄົນ, ເມື່ອເຫັນສະພາບຄືແນວນັ້ນ ທາງຄະນະຄຸ້ມຄອງດ່ານ ແລະ ພາກສ່ວນທີ່ກ່ຽວຂ້ອງໄດ້ປຶກສາຫາລື ເພື່ອຫາວິທີຊ່ວຍແຮງງານລາວຈໍານວນດັ່ງກ່າວ, ໂດຍໄດ້ຈັດປະຊຸມດ່ວນ ເພື່ອວາງວິທີການຮັບມືຕໍ່ການກັບມາຂອງແຮງງານດັ່ງກ່າວ ເຊັ່ນ: ການກະກຽມແພດ-ໝໍ, ເຈົ້າໜ້າທີ່ ຕ.ມ, ພາຫະນະຂົນສົ່ງ, ສະຖານທີ່ ພັກເຊົາຊົ່ວຄາວ ພ້ອມນັ້ນກໍ່ໄດ້ລາຍງານຂັ້ນເທິງຂໍທິດຊີ້ນໍາ ເມື່ອມາຮອດເວລາປະມານ 15:00 ໂມງ ແຮງງານດັ່ງກ່າວ, ກໍ່ໄດ້ພາກັນລັກລອບລົງຕາມຊ່ອງທາງທໍາມະຊາດເຂົ້າມາ ທາງເຈົ້າໜ້າທີ່ຕ.ມ ໄດ້ສົມທົບກັບກອງຮ້ອຍ 522 ສະກັດ, ລັດຕ້ອນ ເອົາແຮງງານດັ່ງກ່າວມາລວມກັນໄວ້, ພາຍຫລັງໄດ້ກວດກາ, ຄັດກອງແຮງງານຕາມລະບຽບການລະ ອຽດແລ້ວ ຈຶ່ງນໍາໃຊ້ພາຫະນະລໍາລຽງ ແລະ ນໍາສົ່ງແຮງງານໄປພັກຢູ່ທີ່ໂຮງຮຽນປະຖົມສົມບູນ ບ້ານໜອງໄຮໂຄກ (ຈຸດກັກກັນຊົ່ວຄາວ) ເພື່ອໃຫ້ຄະນະສະເພາະກິດຂັ້ນເມືອງໂພນທອງ ເປັນຜູ້ຄັດກອງ ກວດກາ ແລະ ນໍາສົ່ງແຕ່ລະແຂວງ, ເມືອງ ເປັນຂັ້ນຕອນຕໍ່ໄປ.
ພ້ອມນີ້, ທ່ານ ສູນໃຈ ຊາຕາກຸນ ຍັງໃຫ້ຮູ້ຕື່ມວ່າ: ສຳລັບທິດທາງແຜນການ ຄະນະກໍາມະການສະເພາະກິດຂອງດ່ານສາກົນວັງເຕົ່າ ຍັງຕ້ອງໄດ້ເພີ່ມທະວີໃນການປ້ອງກັນ, ຄວບຄຸມ ແລະ ແກ້ ໄຂການລະບາດ ຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19) ຮ່ວມກັບຄະນະສະເພາະກິດຂັ້ນແຂງ, ຮ່ວມກັນປຶກສາຫາລື ວາງແຜນການ, ກໍານົດຂັ້ນຕອນການກວດກາຄົນເຂົ້າ-ອອກ ຂົນສົ່ງສິນຄ້າ ແລະ ການສະກັດກັ້ນການຮັບ-ສົ່ງແຮງງານລາວ ທີ່ເດີນທາງກັບປະເທດໃຫ້ມີຄວາມຖືກຕ້ອງ, ປອດໄພຕາມຫລັກການ ຂອງຄະນະຄວບຄຸມໂລກລະບາດວາງອອກຢ່າງເຂັ້ມງວດ.