ພໍ່​ແມ່​ປະຊາຊົນ ຊາວ​ກະສິກອນ ແຂວງ​ສາລະ​ວັນ ປະສົບ​ບັນຫາ​ຜະລິດ​ແລ້ວ ຂາຍ​ບໍ່​ໄດ້, ຂາດຕະຫຼາດ​ຮອງ​ຮັບ ໂດຍ​ສະເພາະ​ແມ່ນ​ຊາວ​ກະສິກອນ ບ້ານ​ນາ​ໄຊ​ໃຫຍ່ ເມືອງ​ສາລະ​ວັນ ແຂວງ​ສາລະ​ວັນ ທີ່​ເຄີຍ​ປູກ​ໝາກແຕງ​ຫວານຂາຍ​ທຸກໆ​ປີ ໃນ​ໄລຍະ​ລະດູຝົນ ເປັນ​ທ່າແຮງ​ຂອງ​ພໍ່​ແມ່​ປະຊາຊົນ​ໃນ​ເຂດ​ນັ້ນ, ສ້າງ​ລາຍ​ໄດ້​ໃຫ້​ກັບ​ຫຼາຍ​ຄອບຄົວ ທັງ​ກຸ້ມ​ກິນ ແລະ ຂາຍ​ສິນ​ຄ້າ. ສຳລັບ​ປີ​ນີ້ ຊາວ​ກະສິກອນອຸກ​ໃຈ ຍ້ອນ​ໝາກແຕງ​ອັ່ງຂາຍ​ບໍ່​ໄດ້, ສາເຫດ​ຕົ້ນ​ຕໍ່​ຍ້ອນ​ຜົນ​ກະທົບ​ຈາກ​ພະຍາດ​ໂຄ​ວິດ-19 ເຮັດ​ໃຫ້​ຂະບວນ​ການ​ຊື້​-​ຂາຍ ປີ​ນີ້ ບໍ່​ຟົດຟື້ນ ແລະ ງຽບ​ເຫງົາ. ທັງ​ປະສົບ​ກັບບັນຫາ​ໄພ​ແຫ້ງແລ້ງ ຕາມ​ມາ​ອີກ​ດ້ວຍ.

ທ່ານ ອ໋ອກ​ເອ ແກ້ວ​ຊົມ​ພູ ນາຍບ້ານໆ​ນາ​ໄຊ​ໃຫຍ່ ເມືອງ ແລະ ແຂວງ​ສາລະ​ວັນ ໃຫ້​ສຳພາດ​ຕໍ່​ນັກ​ຂ່າວວ່າ: ໂດຍ​ພື້ນຖານ​ພໍ່​ແມ່​ປະຊາຊົນບ້ານ​ນາ​ໄຊ​ໃຫຍ່ ແມ່ນ​ມີ​ອາຊີບ​ເຮັດ ​ນາ​ປູກ​ເຂົ້າເປັນ​ຫຼັກ ແລະ ປູກ ​ພືດ​-​ລ້ຽງສັດ ເປັນ​ອາຊີບ​ສຳ ຮອງ ໂດຍ​ສະເພາະ​ແມ່ນ​ການ​ປູກ​ໝາກແຕງ ທີ່​ໃຫ້​ຜົນ​ຜະລິດ​ໄວ ພຽງ​ແຕ່​ໃຊ້​ໄລຍະ​ເວລາ 3-4 ເດືອນ​ເທົ່າ​ນັ້ນ ແລະ ຂາຍ​ເປັນ​ສິນຄ້າ ໄດ້​ລາຄາ​ດີ ແລະ ປູກ​ຢ່າງ​ເປັນ​ຂະບວນ​ຟົດຟື້ນ ພາຍຫຼັງ​ລົງມື​ປູກ​ໃນ​ໄລຍະ 2 ເດືືອນ ກໍ​ສາມາດ​ເກັບ​ຜົນ​ຜະລິດ​ໄດ້. ສໍາ​ລັບ​ປີ​ນີ້ ຫຼັງ​ຈາກ​ເກັບ​ກ່ຽວ​ຜົນລະປູກ​ແລ້ວແຕ່​ຂາຍ​ບໍ່​ໄດ້ ຍ້ອນ​ຜົນ​ກະທົບ​ຈາກ​ພະຍາດ​ໂຄ​ວິດ-19, ເຮັດ​ໃຫ້ການ​ຊື້​-​ຂາຍຂອງ​ແມ່​ຄ້າທັງ​ພາຍ​ໃນ ແລະ ຕ່າງ​ແຂວງ ມີຈຳນວນ​ຫຼຸດ​ລົງຍ້ອນ​ການ​ໄປ​ມາຍັງ​ມີ​ຄວາມ​ລະມັດລະວັງ​ຕໍ່​ກັບ​ພະຍາດ​ດັ່ງກ່າວ ຊຶ່ງ​ເບື້ອງ​ຕົ້ນຊາວ​ກະສິກອນ ກໍ​ໄດ້​ປະສົບກັບ​ບັນຫາ​ໄພ​ແຫ້ງແລ້ງ ເປັນຕົ້ນ ຂາດ​ນ້ຳ​ໃຊ້​ຫົດ, ບາງ​ຄອບຄົວ ກໍ​ຕ້ອງ​ໄດ້​ໂປ່ມ​ນ້ຳ​ຫົດ ແລະ ຍັງ​ມາ​ປະສົບ​ກັບ​ຜົນລະປູກ ອັ່ງ​ຫຼາຍຕື່ມ​ອີກ ຊຶ່ງ​ວ່າ​ແຕ່​ລະ​ປີ ພໍ່​ແມ່​ປະຊາຊົນ ກໍ​ໄດ້​ສຸມ​ໃສ່​ການ​ຜະລິດ​ໝາກແຕງ ຢ່າງ​ຈິງ​ຈັງ ເພາະ​ມັນ​ສ້າງ​ລາຍ​ໄດ້​ໃຫ້​ກັບ​ຄອບຄົວ​ຢ່າງ​ເປັນ​ກອບ​ເປັນ​ກຳ ແລະ ຜູ້​ທີ່​ມີ​ເງື່ອນໄຂ​ເຮັດ​ຫຼາຍກໍ​ໄດ້​ປະມານ 30 ລ້ານ​ກີບ​ຕໍ່​ປີ ແລະ ປານ​ກາງ ກໍ​ໄດ້​ປະມານ 10-15 ລ້ານ​ກີບ​ຕໍ່​ປີ. ຕໍ່​ກັບ​ບັນຫາ​ດັ່ງກ່າວ ອຳນາດ​ການ​ປົກຄອງ​ບ້ານ ກໍ​ຕີ​ລາຄາ​ໄດ້​ຍ້ອນ​ຜົນ​ທະ​ທົບ​ຫຼາຍ​ດ້ານ ໂດຍ​ສະເພາະ​ການ​ຈໍ​ລະ​ຈອນ​ສິນຄ້າ​ສົ່ງ​ອອກ​ສິນຄ້າ ໄປ​ຕ່າງ​ແຂວງຫຼຸດ​ລົງ ແລະ ການ​ສົ່ງ​ອອກ​ຕ່າງປະເທດ ແມ່ນ​ບໍ່​ມີ ເນື່ອງ​ຈາກ​ແມ່​ຄ້າຄົນ​ກາງບໍ່​ໄດ້​ມາ​ຮັບ​ຊື້ ຊຶ່ງ​ພໍ່​ແມ່​ປະຊາຊົນ ອາໄສ​ຂາຍ​ຕາມ​ແຄມ​ທາງ​ໃຫ້​ຜູ້​ເດີນທາງ​ຜ່ານ​ໄປ​ມາ​ເທົ່າ​ນັ້ນ, ຈຶ່ງ​ເຮັດ​ໃຫ້​ລາຄາ​ໝາກແຕງ ​ຕາໍ່ ແລະ ຜົນ​ຜະລິດກໍ​ອັ່ງ ເປັນ​ຈຳນວນ​ຫຼວງ​ຫຼາຍ. ຜົນ​ກະທົບ​ຄັ້ງ​ນີ້ເປັນ​ຄັ້ງ​ທຳອິດທີ່​ເກີດ​ຂຶ້ນ​ນັບ​ແຕ່​ຊາວ​ກະສິກອນ ໄດ້​ປູກ ໝາກແຕງ​ຂາຍ ມາ​ເປັນ​ເວລາ​ດົນ​ນານ. 

ນາງ ວັນ ຄຸນ​ຕາ​ບຸງ ຊາວ​ກະສິກອນ​ຜູ້​ໜຶຶ່ງ ທີ່​ໄດ້​ປູກ​ໝາກ ແຕງຂາຍ​ໃນ​ແຕ່​ລະ​ປີ ໃຫ້​ສຳ ພາດ​ວ່າ: ຜົນ​ກະທົບ​ຄັ້ງ​ນີ້​ແມ່ນ​ໃນ​ຮອບ​ຫຼາຍ​ປີ ນັບ​ແຕ່​ປູກ​ໝາກແຕງຂາຍ​ມາ, ຜົນ​ຜະລິດ​ກໍ​ອັ່ງ, ລາຄາ​ກໍ​ຕ່ຳ ຍ້ອນ​ບໍ່​ມີ​ແມ່​ຄ້າ​ມາ​ຮັບ​ຊື້, ປີຜ່ານມາ ໜ່ວຍ​ໃຫຍ່​ສຸດ ຂາຍ​ລາຄາ 15.000 ກີບ​ຕໍ່​ໜ່ວຍ, ຕໍ່າ​ສຸດ 5.000 ກີບ​ຕໍ່​ໜ່ວຍ, ແຕ່​ມາ​ປີ​ນີ້ ໜ່ວຍ​ໃຫຍ່​ສຸດ 3.000 ກີບ​ຕໍ່​ໜ່ວຍ ແລະ ໄດ້​ປູກ​ໃນ​ເນື້ອທີ່​ທັງ​ໝົດ 2 ເຮັກຕາ, ປະມານ 2 ພັນ​ກວ່າ​ເບ້ຍ, ຊຶ່ງ​ແຕ່​ລະ​ປີ​ຂາຍ​ໄດ້​ຢ່າງ​ຕ່ຳ 10 ລ້ານ​ກວ່າ​ກີບ​ຕໍ່​ປີ. ເຊັ່ນ​ດຽວ​ກັນ​ກັບປ້າ ເພັດ​ສະໝອນ ສຸພັນ​ທອງ ກ່າວ​ໃຫ້​ຮູ້​ວ່າ: ຜົນ​ຜະລິດປີ​ນີ້ ອັ່ງ​ຫຼາຍ ເນື່ອງ​ຈາກ​ບໍ່​ມີ​ແມ່​ຄ້າ ມາ​ຮັບ​ຊື້ ໂດຍ​ສະເພາະ​ແມ່​ຄ້າ​ທີ່​ເຄີຍ​ຊື້ ຈາກ​ແຂວງ​ສະຫວັນ​ນະ​ເຂດ, ນະຄອນຫຼວງ​ວຽງ​ຈັນ ຊຶ່ງ​ສ່ວນ​ໃຫຍ່​ແມ່ນ​ໄດ້​ຂາຍຍົກ ແລະ ຂາຍຍ່ອຍ​ຈຳນວນ​ໜຶ່ງ, ລາຄາ​ກໍ​ຕ່ຳ ແລະ ຖື​ວ່າ​ເປັນ​ທ່າແຮງ​ຫຼັກ​ຂອງ​ຄອບຄົວ ໃນ​ແຕ່​ລະ​ປີ ທີ່​ສ້າງ​ລາຍ​ຮັບ​ໄດ້​ຢ່າງ​ໝັ້ນຄົງ ຊຶ່ງ​ກໍ​ໄດ້​ແລກ​ມາ​ດ້ວຍຄວາມ​ດຸໝັ່ນ​ຂະ​ຫຍັນ​ພຽນ, ສູ້​ຊົນ ຈຶ່ງ​ເຮັດ​ໃຫ້​ຄອບຄົວ ມີ​ຢູ່​ມີ​ກິນ​ນັບ​ມື້​ດີ​ຂຶ້ນ​ເລື້ອຍໆ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)