ໃນວັນທີ 13 ກໍລະກົດ 2020 ອົງການກາແດງລາວ ໄດ້ຈັດຝຶກອົບຮົມການປ້ອງກັນພະຍາດ COVID-19 ໃຫ້ກັບພະນັກງານ ແລະ ອາສາສະໝັກກາແດງແຂວງ ເຊັ່ນ: ແຂວງບໍລິຄຳໄຊ, ແຂວງຫົວພັນ ແລະ ແຂວງຊຽງຂວາງ. ຊຸດອົບຮົມດັ່ງກ່າວ, ໄດ້ຈັດຂຶ້ນທີ່ອົງການກາແດງ ແຂວງຊຽງຂວາງ ໂດຍການເຂົ້າຮ່ວມຂອງ ທ່ານ ສີມີໄຊ ພິມມະຈັກ ຫົວໜ້າອົງການ ກາແດງແຂວງຊຽງຂວາງ, ທ່ານ ຄອນສະຫວັນ ຈັນທະຄາມ ຫົວໜ້າຫ້ອງການ ອົງການກາແດງລາວ, ສຳມະນາກອນທັງສາມແຂວງ ແລະ ວິທະຍາກອນ ຈາກອົງການ ກາແດງລາວ ເຂົ້າຮ່ວມທັງໝົດ.

ການຝຶກອົບຮົມໃນຄັ້ງນີ້, ແມ່ນແນໃສ່ພະນັກງານ ແລະ ອາສາສະໝັກຂອງກາແດງແຂວງ ທີ່ຍັງບໍ່ທັນເຂົ້າໃຈ ກ່ຽວກັບຜົນຮ້າຍຂອງພະຍາດ ໂຄວິດ-19 ແລະ ວິທີການປ້ອງກັນ ການຄວບຄຸມ ພະຍາດລະບາດ, ເພື່ອໃຫ້ພະນັກງານ ແລະ ອາສາສະໝັກກາແດງ ໄດ້ຮັບຮູ້ ນຳໄປເຜີຍແຜ່ໃຫ້ປະຊາຊົນ ໃນທ້ອງຖິ່ນເຂົາເຈົ້າ ໃນການປະຕິບັດຢ່າງຖືກຕ້ອງ ຕາມຫລັກການ ຂອງຄະນະສະເພາະກິດ ໂດຍການສະໜັບສະໜູນທຶນ ຂອງສະຫະພັນກາແດງ ແລະ ຊີກວົງເດືອນແດງສາກົນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)