ນັບແຕ່ມີການລະບາດຂອງເຊື້ອພະຍາດໂຄວິດ-19 ເປັນຕົ້ນມາ ລັດຖະບານກໍ່ໄດ້ອອກແຈ້ງການເລກທີ 06/ນຍ ລົງວັນທີ 23 ມີນາ 2020 ວ່າດ້ວຍການເພີ່ມທະວີ ແລະ ມາດຕະການສະກັດກັ້ນພະຍາດໂຄວິດ-19 ໃນນັ້ນເພີ່ນໄດ້ສັ່ງໂຈະບາງກິດຈະການໃນການຂົນສົ່ງ ໂດຍສະເພາະແມ່ນການຂົນສົ່ງໂດຍສານຜ່ານດ່ານສາກົນ, ດ່ານທ້ອງຖິ່ນ ແລະ ດ່ານປະເພນີຕ່າງໆ.

ທ່ານ ເສັງຄຳ ສິດທິອຸດົມ ຮອງຫົວໜ້າພະແນກໂຍທາທິການ ແລະ ຂົນສົ່ງ ແຂວງອັດຕະປື ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 8 ກໍລະກົດ 2020 ວ່າ: ສຳລັບແຂວງອັດຕະປື ກໍ່ໄດ້ມີການຜັນຂະຫຍາຍຈັດຕັ້ງປະຕິບັດ ເປັນແຕ່ລະໄລຍະ. ມີການອະນຸຍາດໃຫ້ຂົນສົ່ງສະເພາະສິນຄ້າຜ່ານດ່ານຊາຍແດນ ສາກົນພູເກືອ ສ່ວນຄົນຂັບລົດຂົນສົ່ງສິນຄ້າແມ່ນຜັດປ່ຽນກັນຢູ່ຊາຍແດນ, ການຂົນສົ່ງຜ່ານດ່ານປະເພນີ ແລະ ດ່ານທ້ອງຖິ່ນແມ່ນຍັງສືບຕໍ່ປິດ.

ທ່ານຍັງໃຫ້ຮູ້ອີກວ່າ ປະຈຸບັນແມ່ນໄດ້ປະຕິບັດຕາມມາດຕະການຜ່ອນຜັນໃນແຕ່ລະໄລຍະທີ່ວາງອອກ ໂດຍມີການອະນຸຍາດໃຫ້ເປີດການຂົນສົ່ງໂດຍສານພາຍໃນ ແລະ ຕ່າງແຂວງ. ໂດຍການປັບປຸງສະຖານີຂົນສົ່ງໂດຍສານໃຫ້ມີລົດຮອງຮັບຜູ້ໂດຍສານ, ມີອ່າງລ້າງມື, ເຄື່ອງວັດແທກອຸນຫະພູມ ພ້ອມທັງແນະນຳໃຫ້ຜູ້ໂດຍສານ ແລະ ຜູ້ປະກອບການ ໃສ່ຜ້າອັດປາກ-ດັງ ແລະ ຮັກສາໄລຍະຫ່າງ, ຕາມການຊີ້ນຳຂອງຂັ້ນເທິງວາງອອກ. ຜ່ານການລົງຕິດຕາມຕົວຈິງສັງເກດເຫັນວ່າຍັງມີບາງບຸກຄົນທີ່ຍັງຖືເບົາ ແລະ ບໍ່ເອົາໃຈໃສ່ຕໍ່ການການປະຕິບັດເທົ່າທີ່ຄວນ ເຊິ່ງຈະຕ້ອງໄດ້ສືບຕໍ່ເອົາໃຈໃສ່ຢ່າງເຄັ່ງຄັດ.

ນອກຈາກນີ້ສື່ມວນຊົນຍັງໄດ້ ສຳພາດ ທ່ານ ຄຳຜອງ ສອນທະວົງ ວິຊາການສະຖານີຄິວລົດໂດຍສານຫຼັກ 4 ແຂວງອັດຕະປື ກໍ່ໄດ້ຮັບຄຳຕອບວ່າ ປະຈຸບັນຄິວລົດແມ່ນໄດ້ມີການເປີດເປັນປົກກະຕິແລ້ວ ເຊິ່ງມີລົດໂດຍສານທັງໝົດ 28 ຄັນ, ມີການຂົນສົ່ງລະຫວ່າງແຂວງເຊັ່ນ: ແຂວງຈຳປາສັກ, ແຂວງສະຫວັນນະເຂດ ແລະ ນະຄອນຫຼວງວຽງຈັນ, ມີການທຳຄວາມສະອາດລົດ ແລະ ເບາະນັ່ງຜູ້ໂດຍສານດ້ວຍແອວກໍຮໍ ທຸກຄັ້ງ ກ່ອນເປີດໃຫ້ຜູ້ໂດຍສານຂຶ້ນໃຊ້ບໍລິການ ສ່ວນຜູ້ໂດຍສານທີ່ຈະເດີນທາງແມ່ນຕ້ອງໄດ້ກວດວັດແທກອຸນຫະພູມ, ລ້າງມືດ້ວຍເຈວໃຫ້ສະອາດ, ໃສ່ຜ້າອັດປາກ-ດັງ ພ້ອມທັງຮັກສາໄລຍະຫ່າງ. ເຊິ່ງປະຈຸບັນເຖິງຈະມີການເປີດໃຫ້ໃຊ້ບໍລິການແລ້ວ ແຕ່ຜູ້ໂດຍສານທີ່ຈະເດີນທາງໄປ-ມາຫາສູ່ກັນ ແມ່ນຫຼຸດລົງຫຼາຍຈາກ ເມື່ອທຽບກັບແຕ່ກ່ອນ.

Medialaos MMD