ພະຍາດເກີດກັບຜູ້ເຖົ້າ ແລະ ບໍ່ສາມາດໜີພົ້ນໄດ້ແມ່ນ “ໂລກກະດູກຜ່ອຍ” ແລະ “ຂໍ້ເຂົ່າເສື່ອມ” ເຊິ່ງກະດູກຈະເລີ່ມເສື່ອມສະມັດຖະພາບ ແລະ ບາງລົງຍ້ອນການສູນເສຍແຄວຊ້ຽມທີ່ສະສົມໃນກະດູກ ເຊິ່ງ ພະຍາດທີ່ກ່າວມານັ້ນຈະບໍ່ເຮັດໃຫ້ເກີດຄວາມເຈັບປວດ ແຕ່ກົງກັນຂ້າມພັດເຮັດໃຫ້ກະດູກແຕກ ຫຼື ຫັກແທນໄດ້ ເຖິງຢ່າງໃດກໍ່ຕາມທ່ານຮູ້ບໍ່ວ່າອາຫານບາງຊະນິດສາມາດຊ່ວຍປ້ອງກັນການເກີດ ຂອງພະ ຍາດດັ່ງກ່າວໄດ້ ພວກເຮົາຄວນເບິ່ງອາຫານໃກ້ຕົວທີ່ມີສັບພະຄຸນຊ່ວຍເສີມສ້າງກະດູກ ແລະ ບຳລຸງກະດູກໃຫ້ແຂງແຮງ ຊື່ງມີ 10 ອາຫານທີ່ຊ່ວຍບຳລຸງໃຫ້ກະດູກແຂງແຮງດັ່ງນີ້:

1. ປາ

ປາແມ່ນໜຶ່ງໃນແຫຼ່ງທີ່ດີທີ່ສຸດຂອງແຄວຊ້ຽມ ໂດຍສະເພາະແມ່ນປາຊາດີນ ແລະ ປາແຊວມອນແບບກະປອງ ເນື່ອງຈາກວ່າກະດູກຂະໜາດນ້ອຍ ແລະ ໄດ້ຜ່ານຂະບວນການວິທີຜະລິດ ຈີ່ງເຮັດໃຫ້ກະດູກອ່ອນ ແລະ ສາມາດຢໍ້າໄດ້ທັງໝົດ ຊື່ງໄດ້ຮັບແຄວຊ້ຽມໄດ້ເປັນຢ່າງດີ.

2. ໂຍເກີດ

ອາຫານຫວານທີ່ໄດ້ຮັບຄວາມນິຍົມໃນບັນດາສາວໆ ຄົງຈະໜີບໍ່ພົ້ນນົມສົ້ມ ເພາະມັນບໍ່ພຽງແຕ່ມີລົດຊາດແຊບເທົ່ານັ້ນ ການກິນນົມສົ້ມສາມາດຊ່ວຍປ້ອງກັນການເປັນ “ໂລກກະດູກເສື່ອມ” ໄດ້ເຊັ່ນກັນເພາະມັນອຸດົມໄປດ້ວຍວິຕາມິນ B2, B12, ແຄວຊ້ຽມ, ແມກນີຊຽມ ເປັນຕົ້ນ.

3. ນົມ

ເຄື່ອງດື່ມທີ່ຄຸ້ນເຄີຍຕັ້ງແຕ່ເດັກນ້ອຍນັ້ນກໍ່ແມ່ນນົມ ເພາະວ່າມັນບໍ່ພຽງແຕ່ເປັນແຫຼ່ງໂປຕີນ ນົມຍັງອຸດົມໄປດ້ວຍແຮ່ທາດທີ່ສຳຄັນເຊັ່ນ: ແຄວຊ້ຽມ ແລະ ວິຕາມິນອື່ນໆ ອີກດ້ວຍ.

4. ໄຂ່

ອາຫານໃນເຮືອນຄົວທົ່ວໄປເຕັມໄປດ້ວຍຄຸນປະໂຫຍດ ເຊັ່ນ: ແຄວຊ້ຽມ, ຟົດສະຟໍຣັດ, ໂຟເລດ, ເຊເລນຽມ, ວິຕາມິນດີ ແລະ ອື່ນໆ… ພ້ອມນີ້ຍັງເປັນໂປຼຕີນຊ່ວຍປົກປ້ອງກະດູກ, ເຮັດໃຫ້ຜົມງາມ ແລະ ເລັບມີສຸຂະພາບດີ.

5. ດອກກະລໍ່າ

ດອກກະລໍ່າແມ່ນອຸດົມໄປດ້ວຍເສັ້ນໄຍ, ວິຕາມິນ B6, ທາດໂຟເລດ, ທາດເຫຼັກ, ແມງການີສ ແລະ ທາດທີ່ຈຳເປັນໃນການເສີມສ້າງກະດູກ ເຊັ່ນ: ແມກນີຊຽມ, ຟົດສະຟໍຣັດ ແລະ ແຄວຊ້ຽມ.

6. ກ້ວຍ

ກ້ວຍແມ່ນໜຶ່ງໃນບັນດາອາຫານທີ່ສາມາດຊ່ວຍປ້ອງກັນໂລກກະດູກຜ່ອຍ ຖ້າຫາກກິນກ້ວຍເປັນປະຈຳ ຈະຊ່ວຍໃຫ້ຮ່າງກາຍດູດຊຶມດ້ວຍທາດແຄວຊ້ຽມ ແລະ ສານອາຫານອື່ນໆ ທີ່ມີສ່ວນຊ່ວຍໃຫ້ກະດູກແຂງແຮງ ມັນຍັງຊ່ວຍຫຼຸດຜ່ອນຄວາມດັນເລືອດ ປ້ອງກັນໂລກຫົວໃຈ ແລະ ເສັ້ນເລືອດອຸດຕັນໄດ້ເຊັ່ນກັນ.

7. ຖົ່ວຍາວ

ຖົ່ວຍາວບໍ່ໄດ້ມີແຕ່ເສັ້ນໃຍ ແລະ ສານຕ້ານອະນຸມູນອິດສະລະເທົ່ານັ້ນ ແຕ່ຍັງມີແຄວຊ້ຽມສູງເຊັ່ນກັນ ສະນັ້ນຈຶ່ງບໍ່ແປກດອກໝາກຖົ່ວຈະຊ່ວຍໃນການປ້ອງກັນໂລກກະດູກຜ່ອຍ.

8. ຜັກ ແລະ ໝາກໄມ້ບາງຊະນິດ

ຜັກ ແລະ ໝາກໄມ້ບາງຊະນິດ ເຊັ່ນ: ໝາກແອບເປີ້ນ, ໝາກກ້ຽງ, ໝາກເຊີຣີ, ໝາກສະຕໍເບີຣີ ແລະອື່ນໆ ແມ່ນອຸດົມໄປດ້ວຍວິຕາມິນຊີ, ວິຕາມິນດີ, ແມກນີຊຽມ ແລະ ຟົດສະຟໍຣັດ ເຊິ່ງຈະຊ່ວຍຫຼຸດການສູນເສຍຂອງກະດູກໄດ້ ພ້ອມທັງຊ່ວຍເພີ່ມກະດູກ ແລະ ຫຼຸດຜ່ອນຄວາມສ່ຽງຂອງກະດູກແຕກຫັກໄດ້ເຊັ່ນກັນ.

9. ແກ່ນໝາກມ່ວງຫິມະພານ

ແກ່ນໝາກມ່ວງຫິມະພານເປັນທີ່ນິຍົມທົ່ວໄປ ແລະ ເປັນສ່ວນໜຶ່ງຂອງສັບພະຄຸນເຊັ່ນ: ແກ່ນໝາກມ່ວງຫິມະພານໄດ້ຖືກຈັດເປັນແຫຼ່ງຂອງແມງການີສ, ວິຕາມິນອີ, ໄບໂອຕີນ, ຄອບເປີ ແລະ ໄບໂອຟາວິນ ເຊິ່ງເປັນສານອາຫານທີ່ຊ່ວຍເສີມສ້າງກະດູກໃຫ້ແຂງແຮງ.

10. ຖົ່ວງອກ

ເປັນອາຫານທີ່ດີຕໍ່ສຸຂະພາບຫຼາຍບໍ່ວ່າຈະເປັນໄຟເບີ, thiamine, ຄອບເປີ, ທາດເຫຼັກ, manganese, phosphorus, ວິຕາມິນດີ ນອກຈາກຈະຊ່ວຍປ້ອງກັນໂລກກະດູກຜ່ອຍແລ້ວ ຍັງຊ່ວຍຫຼຸດຜ່ອນຄວາມສ່ຽງເປັນມະເຮັງ, ພະຍາດເບົາຫວານ ແລະ ພະຍາດຫົວໃຈນຳອີກ.

ຈາກຂ້າງເທິງນັ້ນສາມາດເຫັນໄດ້ວ່າ ອາຫານບາງຢ່າງມີສັບພະຄຸນທີ່ຊ່ວຍປ້ອງກັນການເກີດຂອງພະ ຍາດກະດູກ ສະນັ້ນຖ້າທ່ານບໍ່ຕ້ອງການໃຫ້ພະຍາດດັ່ງກ່າວຄວນກິນອາຫານທີ່ກ່າວມາຂ້າງເທິງນັ້ນຢ່າງສະໝໍ່າສະເໝີ ຫຼື ທົດລອງຊອກກິນອາຫານເສີມສຳລັບການບຳລຸງ ແລະ ຮັກສາກະດູກ ເພື່ອຫຼຸດຜ່ອນຄວາມສ່ຽງ ຫຼື ປັບປຸງອາການໃຫ້ດີຂື້ນແທນ.