ໃນວັນທີ 2 ກັນຍາ 2019 ທີ່ໂຮງແຮມດອນຈັນພາເລດ ນະຄອນຫລວງວຽງຈັນ ໄດ້ມີກອງ
ປະຊຸມວຽກງານກໍ່ສ້າງໂຄງການທາງລົດໄຟ ລາວ-ຈີນ ໃຫ້ເປັນໂຄງການໂປ່ງໃສ-ຂາວສະອາດ ຄັ້ງທີ IV ໂດຍການເປັນປະທານຮ່ວມຂອງ ທ່ານ ຄໍາສຸກ ບຸນຍະວົງ ຮອງປະທານຄະນະກວດ ກາສູນກາງພັກ ແລະ ອົງການກວດກາລັດຖະບານ, ຮອງຫົວໜ້າອົງການຕ້ານການສໍ້ລາດ ບັງຫລວງຂຶ້ນສູນກາງ, ຫົວໜ້າຄະນະສະເພາະກິດຕິດຕາມ, ກວດກາການປະຕິບັດສັນຍາ ໂຄງການກໍ່ສ້າງທາງລົດໄຟ ລາວ-ຈີນ ແລະ ທ່ານ ລາ ຢີ ຟານ ຫົວໜ້າກົມຮ່ວມມືສາກົນຄະ
ນະກວດກາລະບຽບວິໄນສູນກາງພັກກອມມູນິດຈີນ, ມີບໍລິສັດທາງລົດໄຟ ລາວ-ຈີນ, ບໍລິ ສັດຮັບເໝົາສັນຍາຕ່າງໆ ແລະ ພາກສ່ວນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ. ກອງ ປະຊຸມໄດ້ຮັບຟັງການລາຍງານສະພາບຄວາມຄືບໜ້າໃນການກໍ່ສ້າງທາງລົດໄຟ ລາວ-ຈີນ ຈາກ ທ່ານ ຈຸຍ ໂກ ຈຽງ ປະທານສະພາບໍລິຫານບໍລິສັດທາງລົດໄຟ ລາວ-ຈີນ.

ຈາກນັ້ນ ຄະນະຕິດຕາມ, ກວດກາຂອງທັງສອງຝ່າຍໄດ້ຮ່ວມກັນປຶກສາຫາລືແລກປ່ຽນຄໍາ ຄິດຄໍາເຫັນໃນວຽກງານຕິດຕາມ, ກວດກາ ແນໃສ່ແກ້ໄຂບັນຫາທີ່ຍັງຄົງຄ້າງ ແລະ ຊຸກຍູ້ ການປະຕິບັດໂຄງການໃຫ້ມີຜົນສໍາເລັດຕາມແຜນທີ່ກໍານົດໄວ້. ເປັນຕົ້ນແມ່ນ ການຕິດ ຕາມ, ກວດກາການປະຕິບັດວຽກງານພົ້ນເດັ່ນຕາມການຊີ້ນຳຂອງລັດຖະບານ ເຊັ່ນ: ການ ກໍ່ສ້າງສະຖານີລົດໄຟໄລຍະທີ 1, ທິດຊີ້ນຳໃນຄວາມຄືບໜ້າໃນການກໍ່ສ້ງໂຄງການ ແລະ
ການຊົດເຊີຍຜົນກະທົບ, ຕິດຕາມການນໍາໃຊ້ງົບປະມານຂອງບໍລິສັດທາງລົດໄຟ ລາວ-ຈີນ, ການບໍລິຫານຄຸ້ມຄອງບໍລິສັດລູກ ໄລຍະທາງໃນຄວາມຮັບຜິດຊອບຂອງລາວ 6 ບໍລິສັດ; ການມອບຄືນວຽກງານຕ່າງໆທີ່ບັນດາບໍລິສັດຈັດຕັ້ງປະຕິບັດສໍາເລັດເປັນຕົ້ນວຽກຂົວ ແລະ ອຸໂມງ ແລະ ບັນຫາອ່ືນໆ.

ທັງນີ້ ກໍເພື່ອເອື້ອອໍານວຍຄວາມສະດວກໃຫ້ແກ່ການກໍ່ສ້າງທາງລົດໄຟ ລາວ-ຈີນ ສາມາດ ດຳເນີນການກໍ່ສ້າງຢ່າງມີປະສິດທິຜົນ, ຮັບປະກັນຄຸນນະພາບ, ສໍາເລັດຕາມແຜນການທີ່ ວາງໄວ້ ແລະ ທີ່ສໍາຄັນແມ່ນ ເພື່ອເຮັດໃຫ້ໂຄງການນີ້ ກາຍເປັນໂຄງການໂປ່ງໃສ-ຂາວສະ ອາດຢ່າງແທ້ຈິງ.

ແຫຼ່ງຂໍ້ມູນຈາກ: ໜັງສືພິມ ປະເທດລາວ