ໃນວັນທີ 20 ກໍລະກົດ 2020, ອະນຸກຳມະການໂຄສະນາ ແລະ ຂະບວນການ ກອງປະຊຸມໃຫຍ່ຄັ້ງທີ XI ຂອງພັກ, ນຳພາໂດຍ ທ່ານ ປ້ານ ນ້ອຍມະນີ ກຳມະການສູນກາງພັກ, ປະທານສູນກາງສະຫະພັນກຳມະບານລາວ, ຮອງຫົວໜ້າໜ່ວຍງານຂະບວນການ ກອງປະຊຸມໃຫຍ່ ຄັ້ງທີ XI ຂອງພັກ ພ້ອມດ້ວຍ ທ່ານ ພົຈ. ສົມພອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງຊາດ, ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມຄະນະລົງເຄື່ອນໄຫວເຮັັດວຽກງານ ຢູ່ແຂວງບໍລິຄຳໄຊ ໃນລະຫວ່າງວັນທີ 19-22 ກໍລະກົດ 2020 ນີ້.

ຕອນເຊົ້າຂອງວັນທີ 20 ກໍລະກົດ 2020, ອະນຸກຳມະການໂຄສະນາ ແລະ ຂະບວນການ ກອງປະຊຸມໃຫຍ່ ຄັ້ງທີ XI ຂອງພັກ ໄດ້ພົບປະໂອ້ລົມແລກປ່ຽນບົດຮຽນໃນການປະຕິບັດວຽກງານກັບບັນດາ ການນຳຂັ້ນແຂວງ ແລະ ພະນັກງານຫຼັກແຫຼ່ງ ພ້ອມທັງ ໄດ້ຮັບຟັງບົດລາຍງານການເຄື່ອນໄຫວວຽກງານການໂຄສະນາ ແລະ ຂະບວນການ ຂອງແຂວງບໍລິຄຳໄຊ ເຊິ່ງລາຍງານໂດຍທ່ານ ວັນວິໄລ ແດນພູຫຼວງ, ຄະນະປະຈຳພັກແຂວງ, ປະທານແນວລາວສ້າງຊາດແຂວງ, ຫົວໜ້າອະນຸກຳມະການໂຄສະນາ ແລະ ຂະບວນການ ກອງປະຊຸມໃຫຍ່ 3 ຂັ້ນ ທົ່ວອົງຄະນະພັກແຂວງ ທີ່ຫ້ອງປະຊຸມ ສະໂມສອນໃຫຍ່.

ຕອນບ່າຍ, ຄະນະດັ່ງກ່າວ ໄດ້ສືບຕໍ່ເດິນທາງເຄື່ອນໄຫວເຮັດວຽກຢູ່ທີ່ສຳນັກງານປົກຄອງເມືອງປາກກະດິງ ແລະ ໄດ້ພົບປະໂອ້ລົມກັບບັນດາພະນັກງານຫຼັກແຫຼ່ງຂອງເມືອງ ພ້ອມທັງໄດ້ຮັບຟັງບົດລາຍງານການເຄື່ອນໄຫວວຽກງານຂອງເມືອງປາກກະດິງ.

ຫຼັງຈາກນັ້ນ, ຄະນະກໍໄດ້ເດິນທາງຢ້ຽມຢາມ ພ້ອມທັງໃຫ້ທິດຊີ້ນຳ ຄອບຄົວຕົວແບບ ການລ້ຽງປາກະຊັງ-ລ້ຽງປາໃນໜອງ-ສະນ້ຳ ເປັນສິນຄ້າ ແລະ ຄອບຄົວຕົວແບບ ການປູກໝາກນັດຫວານ ເປັນສິນຄ້າ ສ້າງລາຍຮັບໃຫ້ຄອບຄົວ ເຮັດຄອບຄົວຫຼຸດພົ້ນອອກຈາກຄວາມທຸກຍາກ.

Medialaos MMD