ຕາມການແຈ້ງເຕືອນກົມອຸຕຸນິຍົມ ແລະ ອຸທົກກະສາດພາຍຸດີເປຣຊັນໄດ້ກໍ່ຕົວຢູ່ໃກ້ເຂດ ພາກເໜືອດ້ານຕາເວັນຕົກຂອງປະເທດຟິລິປິນ ແລະ ເພີ່ມກຳລັງແຮງຂຶ້ນເປັນພາຍຸໝູນ ເຂດຮ້ອນໃນໄລຍະວັນທີ 2-6 ກັນຍາ 2019 ນີ້ ແລະ ສືບຕໍ່ເຄື່ອນທີ່ລຽບໃກ້ແຄມຝັ່ງປະເທດ ສສ ຫວຽດນາມ ລັດສະໝີຂອງພາຍຸຫົວນີ້ ກວມເອົາເຂດພາກກາງ ແລະ ພາກໃຕ້ຂອງປະ ເທດລາວສົ່ງຜົນໃຫ້ 2-3 ວັນຜ່ານມາມີລົມພັດແຮງ ແລະ ຝົນຕົກໜັກຢູ່ບັນດາແຂວງ ພາກກາງ ແລະ ພາກໃຕ້ຂອງລາວ ເຮັດໃຫ້ເກີດອຸທົກກະໄພຢ່າງຮ້າຍແຮງ, ນໍ້າປ່າ ແລະ ນໍ້າ ຈາກແມ່ນໍ້າ ສາຍຕ່າງໆ ລວມທັງແມ່ນໍ້າຂອງໄດ້ໄຫລຍື່ງເຂົ້າຖ້ວມຖະໜົນຫົນທາງ, ບ້ານ ເຮືອນ ແລະ ໄຮ່ນາຮົ້ວສວນຂອງປະຊາຊົນນັບແຕ່ແຂວງຄຳມ່ວນ ລົງຫາ ແຂວງສະຫວັນ
ນະເຂດ, ຈຳປາສັກ, ສາລະວັນ, ເຊກອງ ແລະ ອັດຕະປື.

ຢູ່ແຂວງສະຫວັນນະເຂດ ໄດ້ຮັບການລາຍງານວ່າປະຊາຊົນໃນຫລາຍເມືອງໄດ້ຮັບຜົນ ກະທົບແລ້ວຈາກພາຍຸໂດຍສະເພາະຢູ່ເຂດເມືອງນອງ, ໄຊບູລີ, ເຊໂປນ, ອາດສະພັງທອງ, ອາດສະພອນ, ອຸທຸມພອນ, ວິລະບູລີ, ໄຊພູທອງ, ນະຄອນ ໄກສອນ ພົມວິຫານ ເຮັດໃຫ້ຂົວ, ເສັ້ນທາງຫລວງ ແລະ ທ້ອງຖິ່ນຫລາຍສາຍຖືກນໍ້າເຊາະເຈື່ອນ ແລະ ຖືກຕັດຂາດ ບາງບ່ອນ
ບໍ່ສາມາດເດີນທາງໄປມາໄດ້, ເນື້ອທີ່ການຜະລິດກໍຖືກນໍ້າຖ້ວມຫລາຍພັນເຮັກຕາ.

ສ່ວນແຂວງສາລະວັນ ກໍ່ໄດ້ຮັບຜົນກະທົບຢ່າງໜັກຈາກອິດທິພົນຂອງພາຍຸເຮັດໃຫ້ເຮືອນ ຊານຂອງພໍ່ແມ່ປະຊາຊົນທີ່ຢູ່ຕາມເຂດແຄມແມ່ນ້ຳເຊໂດນ ໃນເຂດເທສະບານເມືອງສາລະ ວັນ, ວາປີ, ຄົງເຊໂດນ, ຕຸ້ມລານ, ເລົ່າງາມ ແລະ ເທສະບານແຂວງສາລະວັນ ໄດ້ຮັບຜົນກະ
ທົບຢ່າງໜັກໜ່ວງ ເຊິ່ງທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນ ໃຫ້ຮູ້ວ່າ: ສຳລັບ ເມືອງສາລະວັນ 75 ບ້ານ, ຖ້ວມໜັກຖືກຕັດຂາດ 40 ບ້ານ; ເມືອງວາປີ ຖືກນ້ຳຖ້ວມທັງ ໝົດ 55 ບ້ານ, ຖ້ວມໜັກຖືກຕັດຂາດ 21 ບ້ານ ເປັນຕົ້ນບ້ານສະພາດ, ບ້ານຫ້ວຍກອດ,
ບ້ານມ່ວງ, ບ້ານແກ້ງສຸທິ, ບ້ານຫີນໂລງ, ບ້ານໝອງໃສ, ເສັ້ນທາງຕັດຂາດເປັນ ໄລຍະ 200 ແມັດ ບໍ່ສາມາດໄປມາໄດ້; ເມືອງຄົງເຊໂດນມີ 75 ບ້ານ ຖ້ວມໜັກກວ່າໝູ່ມີ 45 ບ້ານທີ່ຢູ່ ຕາມລຽບແຄມເຊໂດນ; ສ່ວນເມືອງຕຸ້ມລານ ຖືກນ້ຳຖ້ວມ 3 ບ້ານ ແລະ ເມືອງເລົ່າງາມຈຳ ນວນໜຶ່ງ.

ສຳລັບແຂວງຈໍາປາສັກ ນະຄອນປາກເຊ, ເມືອງຊະນະສົມບູນ, ເມືອງໂພນທອງ, ເມືອງປະ ທຸມພອນ, ຈຳປາສັກ, ເມືອງ ແລະ ອື່ນໆໄດ້ຮັບຜົນກະທົບຈາກໄພນ້ຳຖ້ວມຍ່າງໜັກໜ່ວງ
ແຕ່ຄືນວັນທີ 2/9/ 2019 ຈົນມາຮອດປັດຈຸບັນລະດັບນໍ້າຂອງ ແລະ ແມ່ນໍ້າເຊໂດນຍັງບໍ່ມີທີ ທ່າວ່າຈະຫລຸດລົງເນື່ອງຈາກຍັງມີຝົນຕົກລົງມາຢ່າງຕໍ່ເນື່ອງ. ສົ່ງຜົນໃຫ້ເສັ້ນທາງເລກທີ 13 ໃຕ້, ຫ່າງຈາກນະຄອນປາກເຊ, ແຂວງຈຳປາສັກ 11 ກີໂລແມັດ ເໜືອ ໃກ້ຈະຮອດທາງແບ່ງ ເຂົ້າບ້ານສະຜ່າຍ, ເມືອງຊະນະສົມບູນບໍ່ສາມາດໄປມາໄດ້ເພາະວ່າມີນ້ຳ ໄຫລຖ້ວມທາງຢ່າງ ຮຸນແຮງ, ແຈ້ງຜູ້ທີ່ເດິນທາງໄປມາເສັ້ນທາງນີ້ຢຸດການສັນຈອນຊົ່ວຄາວ. ສ່ວນຢູ່ເມືອງຈຳ
ປາສັກ ມີປະຊາຊົນ 48 ບ້ານ ອາໄສຢູ່ຕາມຂອບເຂດແຄມແມ່ນຳຂອງໄດ້ ຮັບຜົນກະທົບ, ເນື້ອທີ່ນາປີຖືກຖ້ວມ 850 ເຮັກຕາ ສັດລ້ຽງ ແລະ ອຶ່ນໆອີກ .

ແຫລ່ງຂ່າວຈາກແຂວງເຊກອງໄດ້ໃຫ້ຮູ້ວ່າ: ເຊກອງ ກໍເປັນແຂວງໜຶ່ງທີ່ໄດ້ຮັບຜົນກະທົບ ຈາກພະຍຸດີເປຣຊັນ ເຊິ່ງຝົນຕົກແຮງຕິດຕໍ່ກັນຫລາຍຊົ່ວໂມງໃນລະຫວ່າງວັນທີ 2-3 ກັນ ຍາ 2019 ໄດ້ໃຫ້ນໍ້າໃນຫ້ວຍຮ່ອງຄອງບຶງ, ຫ້ວຍຕ່າງໆທີ່ເປັນສາຂາຂອງນໍ້າເຊກອງ ເພີ່ມ
ຂຶ້ນຢ່າງໄວ ແລະ ໄຫລເຂົ້າຖ້ວມໂຮງຮຽນ, ເສັ້ນທາງຄົມມະນາຄົມ, ເນື້ອທີ່ການຜະລິດ ແລະ ບ້ານເຮືອນຂອງປະຊາຊົນເສຍຫາຍຫລາຍສົມຄວນ. ສະເພາະຜົນເສຍຫາຍຢູ່ເມືອງລະມາມ ປະກອບມີເນື້ອທີ່ນາ, ເສັ້ນທາງ, ຂົວຫ້ວຍວີບ້ານໂພນ, ບ້ານໜອງບົງ-ຫ້ວຍຂຽວ, ໂຮງຮຽນ ປະຖົມບ້ານວັດຫລວງ, ເສັ້ນທາງເຂົ້າບ້ານປາກໂທນ, ຮ້ານອາຫານຂົວເຊກອງ, ເຂດຫ້ວຍ ເຫີບບ້ານເພຍໃໝ່, ເສັ້ນທາງຫລວງ(ເຊກອງ-ອັດຕະປື), ຂົວຫ້ວຍລໍາພັນເຂດບ້ານລະວີຝັ່ງ ແດງ, ບ້ານເຊນໍ້ານ້ອຍ ແລະ ບ່ອນອື່ນໆ. ສ່ວນຢູ່ເມືອງທ່າແຕງ, ເມືອງກະລຶມ ແລະ ເມືອງ ດາກຈຶງ ເນື້ອທີ່ການຜະລິດ, ເຮືອນຊານບ້ານຊ່ອງ ແລະ ພື້ນຖານໂຄງລ່າງຂອງກໍໄດ້ຮັບຜົນ ກະທົບຈາກນໍ້າຖ້ວມເຊັ່ນດຽວກັນກັນ. ຈາກເຫດດັ່ງກ່າວ ການນໍາຂອງແຂວງ ແລະ ການ ນໍາຂອງແຕ່ລະເມືອງ ກໍໄດ້ສົ່ງກໍາລັງທະຫານລວມທັງຂະແໜງການກ່ຽວຂ້ອງລົງຊ່ວຍເຫຼືອ ປະຊາຊົນທີ່ໄດ້ຮັບຜົນກະທົບ, ສ່ວນຕົວເລກຜົນເສຍຫາຍແມ່ນຍັງຢູ່ໃນຂັ້ນຕອນການຮວບ
ຮວມຂອງພາກສ່ວນກ່ຽວຂ້ອງ.

ຢູ່ແຂວງອັດຕະປື, ໃນວັນທີ 4 ກັນຍາ 201 ລະດັບນໍ້າເຊ ກອງຍັງສືບຕໍ່ສູງຂຶ້ນ ເຊິ່ງໃນເວລາ 9 ໂມງເຊົ້າ ສະຖານີບ້ານເວີນແຄນລະດັບນໍ້າແທກໄດ້ 16,62 ແມັດ ຄາດຄະເນ ນ້ຳຈະຮອດ 17 ແມັດ ໃນຕອນບ່າຍຈິ່ງຈະຢຸດ ແລະ ຕອນຄ່ຳຈະ ຄ່ອຍລົດລົງ. ສ່ວນສະພາບນ້ຳຖ້ວມຢູ່ ເມືອງໄຊເສດຖາ ມີຢູ່ 6 ບ້ານແລ້ວຄື: ບ້ານ ສະປວນ, ບ້ານນຳຫຽງ, ບ້ານສະແຄະ, ບ້ານແກ້ງ ໄຊ, ບ້ານທ່າລານ ແລະ ບ້ານຫາດສະຕີ. ຜົນເສຍຫາຍຍັງບໍ່ໄດ້ມີການປະເມີນ ແລະ ກໍໄດ້ມີ ທີມງານເມືອງເອົາເຮືອໄປຊ່ວຍແລ້ວ, ລະດັບນ້ຳຕາມລຳເຊກະໝານ ແລະ ເຊຊູ້ຍັງຢູ່ໃນເຂດ ເຕືອນໄພ; ເມືອງສະໜາມໄຊປະຊາຊົນທີ່ ຕັ້ງຢູ່ລຽບສາຍນ້ຳເຊກອງ ແລະແຄມຝັ່ງແມ່ນ້ຳ ເຊປຽນ-ຫ້ວຍປິນ ຖືກນ້ຳຖ້ວມແລ້ວຄື: ບ້ານມິດສຳພັນ, ບ້ານທ່າແສງຈັນ, ຄຸ້ມໂຄກກ່ອງ, ຄຸ້ມທ່າອວນ, ບ້ານໂພນສະອາດ, ບ້ານໄຊດອນໂຂງ, ບ້ານໜອງແຂ້, ບ້ານປາກບໍ່, ບ້ານດອນ ເສືອ ແລະ ຖ້ວມເສັ້ນທາງອື່ນໆອີກຫຼາຍຈຸດ, ບາງບ້ານໄດ້ຍົກຍ້າຍປະຊາຊົນໄປຢູ່ຈຸດປອດໄພ ແລ້ວ ເຊ່ິງມີບາງເມືອງໄດ້ມີທີມງານ ກ່ຽວຂ້ອງເອົາເຮືອໄປຊ່ວຍແລ້ວຕາມລຳເຊກະໝານ ແລະ ເຊຊູ້ເພາະຂະນະນີ້ ຍັງຢູ່ໃນເຂດ ເຕືອນໄພ.

ແຫຼ່ງຂໍ້ມູນຈາກ: ໜັງສືພິມ ປະເທດລາວ