ໂຮງໝໍຈຳປາສັກ ແຂວງຈຳປາສັກ ເປັນໂຮງໝໍທີ່ສ້າງຂຶ້ນເພື່ອເບິ່ງແຍງປິ່ນປົວສຸຂະພາບຂອງປະຊາຊົນທຸກຊັ້ນຄົນ ຜ່ານມາໄດ້ເພີ່ມມາດຕະການປ້ອງກັນ, ສະກັດກັ້ນການເຝົ້າລະວັງພະຍາດໂຄວິດ -19 ເພື່ອຕັດວົງຈອນການແຜ່ລະບາດ ໂດຍສະເພາະປະຊາຊົນ 4 ແຂວງພາກໃຕ້ ປັດຈຸບັນໂຮງໝໍໄດ້ມີຄວາມພ້ອມທາງດ້ານບຸກຄະລາກອນ ແລະ ມີເຄື່ອງມືທີ່ທັນສະໄໝໄດ້ມາດຕະຖານສາກົນ ເພື່ອຮອງຮັບການບໍລິການແກ່ຄົນເຈັບທີ່ເຂົ້າມາປິ່ນປົວ.

   ທ່ານ ຄຳສິງ ແກ້ວທອງກຸ ຜູ້ອຳນວຍການໂຮງໝໍຈຳປາສັກ ແຂວງຈຳປາສັກ ໄດ້ໃຫ້ສຳພາດຜ່ານສື່ມວນຊົນຫວ່າງບໍ່ດົນນີ້ວ່າ:ໂຮງໝໍຈຳປາສັກໄດ້ເຮັດພາລະບົດບາດໜ້າທີ່ຂອງຕົນໃນການເບິ່ງແຍງປິ່ນປົວສຸຂະພາບຂອງປະຊາຊົນທຸກຊັ້ນຄົນໂດຍສະເພາະແມ່ນປະຊາຊົນ 4 ແຂວງພາກໃຕ້ໃຫ້ໄດ້ຮັບການບໍລິການທີ່ດີມີຄຸນນະພາບ ແລະ ໄດ້ຮັບຄວາມໄວ້ວາງໃຈຈາກຜູ້ມາໃຊ້ບໍລິການ ຊຶ່ງທາງໂຮງໝໍໄດ້ມີການພັດທະນາລະບົບບໍລິການສຸຂະພາບຕາມນະໂຍບາຍ 5 ດີ 1 ພໍໃຈ ທັງເປັນບ່ອນສິດສອນໃຫ້ຄວາມຮູ້ແກ່ນັກສຶກສາແພດ ໂດຍມີແພດຜູ້ຊ່ຽວຊານໃນຫຼາຍສາຂາອາຊີບ ມີເຄື່ອງມືອຸປະກອນຮັບໃຊ້ທີ່ທັນສະໄໝໄດ້ມາດຕະຖານສາກົນຮອງຮັບ ສິ່ງສຳຄັນໄປກວ່ານັ້ນຍັງມີເຄື່ອງມືທີ່ສາມາດກວດວິເຄາະຫາເຊື້ອພະຍາດໂຄວິດ -19

   ໃນໄລຍະທີ່ຜ່ານມາທາງໂຮງໝໍໄດ້ເອົາໃຈໃສ່ປະຕິບັດຕາມຄຳສັ່ງແນະນໍາຂອງຂັ້ນເທິງກ່ຽວກັບການປ້ອງກັນສະກັດກັ້ນພະຍາດໂຄວິດ- 19 ທາງໂຮງໝໍໄດ້ມີຄວາມເປັນຫ່ວງເປັນໄຍ ແລະ ໄດ້ມີຄວາມພ້ອມໃນກັນປະຕິບັດໜ້າທີ່ເພື່ອຮັບປະກັນໃຫ້ທຸກຄົນມີຄວາມປອດໄພຈາກເຊື້ອພະຍາດໂຄວິດ -19, ໄດ້ດຳເນີນຫຼາຍມາດຕະການໂດຍເລັ່ງໃສ່ພະນັກງານແພດຕ້ອງມີຄວາມຮູ້ຢ່າງເລິກເຊິ່ງກ່ຽວກັບພະຍາດໂຄວິດ -19 ກໍຄືເສັ້ນທາງໃນການຕິດຕໍ່ ລວມເຖິງວິທີປ້ອງກັນ ຊຶ່ງໃນໄລຍະທີ່ຜ່ານມາພວກເຮົາໄດ້ກຳນົດໃຫ້ມີເສັ້ນທາງເຂົ້າ-ອອກຂອງໂຮງໝໍຢ່າງຊັດເຈນ, ຜູ້ມາຮັບບໍລິການທຸກຄົນລວມທັງພະນັກງານແພດໝໍຕ້ອງໄດ້ຮັບການບໍລິການຄັດກອງ, ມີການເວັ້ນໄລຍະຫ່າງ, ວັດແທກອຸນຫະພູມ, ຖາມປະຫວັດການເດີນທາງ, ຄວາມຜິດປົກກະຕິຂອງລະບົບຫາຍໃຈ, ຈຸດລ້າງມືດ້ວຍນໍ້າ, ດ້ວຍເຈວລ້າງມື, ນອກຈາກນັ້ນຍັງໄດ້ກະກຽມຫ້ອງແຍກປ່ຽວສຳລັບຄົນເຈັບໂຄວິດ- 19 ມີທັງໝົດ 4 ຫ້ອງ, ມີຫ້ອງຮອງຮັບສຳລັບຄົນເຈັບໂຄວິດ -19 ເບື້ອງຕົ້ນ ມີ 18 ຕຽງ, ມີເຄື່ອງກວດວິເຄາະຊອກຫາເຊື້ອໂຄວິດ- 19 ຈຳນວນ 2 ເຄື່ອງ , ເຄື່ອງດັ່ງກ່າວສາມາດກວດໄດ້ 90 ຕົວຢ່າງຕໍ່ວັນແຕ່ຂະບວນການກວດ ແມ່ນໃຊ້ເວລາ 6 ຊົ່ວໂມງ ຜ່ານມາກວດ 2 ຮອບຕໍ່ວັນ, ຈາກບົດຮຽນທີ່ໄດ້ປະຕິບັດໃນໄລຍະຜ່ານມາພວກເຮົາໄດ້ພົບສິ່ງທ້າທາຍຫຼາຍບັນຫາຊຶ່ງໂຄວິດ-19 ເປັນເລື່ອງໃໝ່ສຳລັບພວກເຮົາ ມັນໄດ້ນາບຂູ່ຈິດໃຈຂອງພະນັກງານແພດໝໍທີ່ເຮັດໜ້າທີ່ໃນການບໍລິການປິ່ນປົວຄົນເຈັບ ໃນຂະນະດຽວກັນຢາປົວພະຍາດດັ່ງກ່າວຍັງບໍ່ທັນຊັດເຈນ ເລັງໃສ່ປິ່ນປົວຕາມອາການ, ແພດໝໍມີຄວາມກັງວົນຕໍການປິ່ນປົວຄົນເຈັບ.

ທ່ານ ຄຳສິງ ແກ້ວທອງກຸ ໃຫ້ຮູ້ອີກວ່າ: ນອກຈາກມາດຕະການທີ່ໄດ້ກ່າວມານັ້ນທາງໂຮງໝໍຍັງໄດ້ເອົາໃຈໃສ່ເປັນຕົ້ນການອະນາໄມສະຖານທີ່ໂຮງໝໍທຸກ 2 ຊົ່ວໂມງ ພ້ອມນັ້ນຍັງໄດ້ເອົາໃຈໃສ່ປະຕິບັດນະໂຍບາຍຕໍ່ພະນັກງານແພດໝໍທີ່ໄດ້ອຸທິດຕົນສຳຜັດກັບກຸ່ມສ່ຽງ ລວມທັງພະນັກງານແພດລົງປະຈຳເພື່ອປະຕິບັດໜ້າທີ່ຢູ່ພາກສະໜາມ, ພະນັກງານປະຈຳຢູ່ຫ້ອງວິເຄາະ ຊຶ່ງມາຮອດປັດຈຸບັນທາງໂຮງໝໍພວກເຮົາຍັງສືບຕໍ່ເອົາໃຈໃສ່ປ້ອງກັນພະຍາດໂຄວິດ -19 ຄວບຄູ່ກັບການປ້ອງກັນພະຍາດໄຂ້ຍຸງລາຍຕາມລະດູການຊຶ່ງເປັນວຽກທີ່ທາງໂຮງໝໍໄດ້ມີຄວາມເອົາໃຈໃສ່ເຮັດເປັນປະຈຳ.