ເສດຖະກິດບໍ່ດີ ບວກກັບການເປັນພິດທາງເສດຖະກິດຈາກເຊື້ອໄວຣັດ Covid-19 ຜູ້ໃດສາມາດປະຢັດ ຕ້ອງເຮັດບາງຢ່າງ ຫຼື ເພີ່ງຕົນເອງແມ່ນດີທີ່ສຸດ ເລີ່ມຈາກການກິນອາຫານເປັນອັນດັບທຳ ອິດ ຫຼື ປ່ຽນຈາກການກິນຢູ່ຮ້ານອາຫານຫັນມາປຸງແຕ່ງດ້ວຍຕົນເອງ ບໍ່ວ່າຈະເປັນພື້ນທີ່ໃຫຍ່ ຫຼື ນ້ອຍກໍ່ສາມາດເຮັດໄດ້ ຫຼຸດການຊື້ວັດຖຸດິບໃຫ້ໜ້ອຍລົງໂດຍການປູກຜັກກິນເອງ ຮັບປະກັນປະ ຢັດເງິນ ແລະ ສຸຂະພາບດີພ້ອມກັນມາເບິ່ງກັນວ່າຜັກຊະນິດໃດທີ່ສາມາດປູກເອງໄດ້ໂດຍເລີ່ມຈາກ

ຜັກກາດ ເອົາຕຸກນໍ້າມາຕັດຈາກນັ້ນເອົາທາງປາກຕຸກນໍ້າຂ້ວມລົງເພື່ອໃສ່ປຸຍ ຫວ່ານເມັດບໍ່ເກີນ 2ເດືອນ ໄດ້ກິນແລ້ວ ມີຄຸນສົມບັດທີ່ສາມາດຊ່ວຍເຮັດໃຫ້ກະດູກ, ແຂ້ວແຂງແຮງ, ຊ່ວຍປ້ອງກັນໂລກກະດູກຜ່ອຍ, ຫຼຸດຄວາມສ່ຽງການເກີດມະເຮັງໃນກ້າມຊີ້ນ, ເສັ້ນເລືອດຫົວໃຈຕີບ, ຊ່ວຍປ້ອງ ກັນການເສື່ອມຂອງກ້າມຊີ້ນ ແລະ ຫຼຸດຜ່ອນອາການເຈັບປວດຕາມຂໍ້ກະດູກ.

ຖົ່ວງອກ ຕັດກະປອງແລ້ວເອົາຖົ່ວຂຽວແຊໄວ້ເປັນເວລາ 1 ຄືນໂດຍໃຊ້ຖົງດໍາປົກ ແລະ ຫົດໃສ່ນໍ້າເຊົ້າ-ແລງ ອີກປະມານ 2-3 ມື້ ກໍ່ຈະໄດ້ຕົ້ນຖົ່ວງອກທີ່ສາມາດຂົ້ວໄດ້ແລ້ວ ຊື່ງຖົ່ວງອກມີທັງວິຕາ ມິນຊີ ແລະ ສານຕ້ານອະນຸມູນອິດສະຫຼະຫຼາຍຊະນິດ ຊ່ວຍສ້າງລະບົບພູມຄຸ້ມກັນການເຮັດວຽກໃຫ້ມີປະສິດທິພາບຫຼາຍຂື້ນ ປ້ອງກັນໄຂ້ຫວັດ ນອກຈາກນີ້ວິຕາມິນຊີ ຍັງຊ່ວຍກະຕຸ້ນໃຫ້ເມັດເລືອດຂາວເກີດຄວາມຫ້າວ ຫັນ ຫຼຸດຜ່ອນການອັກເສບໃນຮ່າງກາຍ ແລະ ໂລກຫົວໃຈ ລວມທັງມະເຮັງອີກດ້ວຍ.

ສຳລັບທ່ານໃດທີ່ກຳລັງຊອກຫາຜັກແກ້ມລາບ ແລະ ແຈ່ວໝາກເຜັດ ແນະນຳໃຫ້ປູກຜັກບົ່ວ ເອົາຫົວຜັກບົ່ວປັກລົງໃສ່ພື້ນດິນ ລໍຖ້າໃຫ້ຂື້ນເປັນຕົ້ນສີຂຽວ ຫຼັງຈາກນັ້ນຈະໄດ້ຜັກບົ່ວເອົາແກ້ມລາບໄດ້ເລີຍ ໃນຂະນະດຽວກັນຍັງຊ່ວຍບັນເທົາອາການເປັນຫວັດ, ປ້ອງກັນອາການຖອກທ້ອງ, ຫຼຸດໄຂມັນໃນເສັ້ນ ເລືອດ, ຊ່ວຍຕ້ານອະນຸມູນອິດສະຫຼະ ແລະ ກະຕຸ້ນລະບົບພູມຕ້ານທານ, ຫຼຸດຜ່ອນຄວາມສ່ຽງຂອງໂລກກະດູກຜ່ອຍ ລວມທັງການປ້ອງກັນພະຍາດເລືອດຈາງ.