ຜະລິດຕະພັນ ຊາໂສມ ກາດອກຮັກ ເມືອງລະມາມ ກາຍເປັນສິນຄ້າໂອດັອບ (ODOP)

0
205

ພິທີ ມອບ-ຮັບ ໃບອະນຸຍາດນຳໃຊ້ກາໝາຍໜຶ່ງເມືອງໜຶ່ງຜະລິດຕະພັນ (ODOP) ແຫ່ງຊາດໃຫ້ແກ່ເຈົ້າຂອງໂຮງງານຜະລິດຕະພັນ ຊາໂສມ ກາດອກຮັກ ເມືອງລະມາມ ແຂວງເຊກອງ ໄດ້ຈັດຂຶ້ນ ໃນວັນທີ 22 ກໍລະກົດ 2020 ທີ່ພະແນກອຸດສາຫະກຳ ແລະ ການຄ້າແຂວງ ໂດຍມີ ທ່ານ ເຫຼັກໄຫຼ ສີວິໄລ ຮອງເຈົ້າແຂວງ ແຂວງເຊກອງ ພ້ອມດ້ວຍ ຫົວໜ້າພະແນກອຸດສາຫະກຳ ແລະ ການຄ້າແຂວງ-ເມືອງ, ກຸ່ມຜະລິດ ແລະ ວິຊາການກ່ຽວຂ້ອງເຂົ້າຮ່ວມ.

ໃນພິທີດັ່ງກ່າວ ທ່ານ ຄຳມ້າວ ສິງສະຫວັດ ຫົວໜ້າຫ້ອງການອຸດສາຫະກຳ ແລະ ການຄ້າເມືອງລະມາມ ໄດ້ລາຍງານຫຍໍ້ກ່ຽວກັບການເຄື່ອນໄຫວຊຸກຍູ້ສົ່ງເສີມສິນຄ້າໂອດັອບ (ODOP) ແມ່ນປະຕິບັດຕາມບົດແນະນຳ ເລກທີ 3559/ສພຄ, ລົງວັນທີ 25 ພະຈິກ 2012 ກ່ຽວກັບເງຶ່ອນໄຂ ແລະ ຂັ້ນຕອນໃນການຄັດເລືອກສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ ໂດຍຜ່ານການລົງເຄື່ອນໄຫວຕົວຈິງຢູ່ເມືອງລະມາມ ເຫັນວ່າຜະລິດຕະພັນສິນຄ້າທີ່ພົ້ນເດັ່ນ ແລະ ມີເງື່ອນໄຂທີ່ຈະກາຍເປັນສິນຄ້າໂອດັອບ ໄດ້ນັ້ນມີໜຶ່ງຜະລິດຕະພັນ ຄື: ຜະລິດຕະພັນ ຊາໂສມ ກາດອກຮັກ ຂອງທ່ານ ນາງ ສີສຸພັນ ບຸດດາວຽງ ຢູ່ບ້ານໃໝ່ຫົວເມືອງ.

ຫຼັງຈາກນັ້ນ, ທ່ານ ຄຳໄຊ ໃສໄພແກ້ວ ວິຊາການໜ່ວຍງານສົ່ງເສີມຫັດຖະກຳ, ຫ້ອງການອຸດສາຫະກຳ ແລະ ການຄ້າເມືອງລະມາມ ໄດ້ລາຍງານປະຫັວດຄວາມເປັນມາ ແລະ ການນຳໃຊ້ກາໝາຍໂອດັອບ (ODOP) ແຫ່ງຊາດວ່າ: ຊາໂສມ ເປັນຊາບຳລຸງຮ່າງກາຍ ທີ່ຜະລິດຈາກໂສມທຳມະຊາດຂອງເມືອງດາກຈຶງ ໂດຍມີສ່ວນປະສົມຂອງນ້ຳເຜິ້ງທຳມະຊາດທີ່ມີພາຍໃນທ້ອງຖິ່ນແຂວງເຊກອງ ຊຶ່ງຜ່ານຂະບວນການຜະລິດຕາມຂັ້ນຕອນ ແລະ ຖືກຫຼັກອະນາໄມ ກາຍມາເປັນຜະລິດຕະພັນສຳເລັດຮູບບັນຈຸຊອງຂະໜາດນ້ອຍ 2 ກຣາມ ໂດຍໃນ 1 ກັບມີ 30 ຊອງ ຂາຍໃນລາຄາ 80 ພັນກີບ, ຜະລິດຕະພັນຊາໂສມ ກາດອກຮັກ ໄດ້ມີການຈຳໜ່າຍອອກສູ່ຕະຫຼາດທັງພາຍໃນ ແລະ ຕ່າງປະເທດ ເຊັ່ນ: ຂາຍສົ່ງໄປນະຄອນຫຼວງວຽງຈັນ ແລະ ຂາຍສົ່ງໃຫ້ນັກທຸລະກິດຊາວຈີນຈຳນວນໜຶ່ງ.

ທ່ານ ເຫຼັກໄຫຼ ສີວິໄລ ຮອງເຈົ້າແຂວງ ແຂວງເຊກອງ ໄດ້ກ່າວວ່າ: ແຂວງເຊກອງມີ 8 ຜະລິດຕະພັນທີ່ໄດ້ຮັບກາໝາຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ ຫຼື ໂອດັອບ (ODOP) ແລ້ວ 8 ຜະລິດຕະພັນ ຄື: ຜະລິດຕະພັນເຫຼົ້າໝາກຈັນ, ຜະລິດຕະພັນເຫຼົ້າໝາກກ້ວຍ, ຜະລິດຕະພັນເຫຼົ້າໝາກຂາມປ້ອມ, ຜະລິດຕະພັນເຫຼົ້າໝາກນັອດ, ຜະລິດຕະພັນຕ່ຳແຜ່ນແພ, ຜະລິດຕະພັນກາເຟສົດດາກຈຶງ, ຜະລິດຕະພັນກາເຟສົດທ່າແຕງ ແລະ ໄດ້ຮັບກາໝາຍໂອດັອບລ້າສຸດ ໃນວັນທີ 22 ກໍລະກົດນີ້ ເປັນຜະລິດຕະພັນທີ 8 ຄື: ຜະລິດຕະພັນ ຊາໂສມ ກາດອກຮັກ ຂອງທ່ານ ນາງ ສີສຸພັນ ບຸດດາວຽງ.

ໂດຍໃຫ້ກຽດມອບໃບຢັ້ງຢືນນຳໃຊ້ກາໝາຍໂອດັອບຄັ້ງນີ້ແມ່ນທ່ານ ເຫຼັກໄຫຼ ສີວິໄລ ຮອງເຈົ້າແຂວງ ແຂວງເຊກອງ ແລະ ຮັບໂດຍທ່ານ ນາງ ສີສຸພັນ ບຸດດາວຽງ ເຈົ້າຂອງໂຮງງານຜະລິດຕະພັນ ຊາໂສມ ກາດອກຮັກ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ເສດຖະກິດ-ສັງຄົມ)