ກອງປະຊຸມ ຄັ້ງທີ II ຂອງສະພາການຄ້າ ແລະ ອຸດສາຫະກຳ ແຂວງອັດຕະປື ໄດ້ໄຂຂຶ້ນຢ່າງເປັນທາງການ ວັນທີ 21 ກໍລະກົດ 2020 ທີ່ຜ່ານມານີ້, ທີ່ຫ້ອງປະຊຸມສະພາປະຊາຊົນແຂວງ. ໂດຍການເປັນປະທານຂອງທ່ານ ວົງວິໄລ ໄຊຍະສອນ ປະທານສະພາການຄ້າ ແລະ ອຸດສາຫະກຳແຂວງອັດຕະປື, ໃຫ້ກຽດເຂົ້າຮ່ວມຂອງທ່ານ ເລັດ ໄຊຍະພອນ ເລຂາພັກແຂວງ ເຈົ້າແຂວງອັດຕະປື, ທ່ານ ສຽວສະຫວາດ ສະແຫວງສຶກສາ ອາດີດຮອງລັດຖະມົນຕີກະຊວງອຸດສາຫະກຳ ແລະ ການຄ້າ ປະທານກິດຕິມະສັກສະພາການຄ້າ ແລະ ອຸດສາຫະກຳແຫ່ງຊາດ, ທ່ານ ຄຳຫວັນ ຈັນທະໂຄດ ຫົວໜ້າພະແນກອຸດສາຫະກຳ ແລະ ການຄ້າແຂວງອັດຕະປື, ມີຄະນະບໍລິຫານງານສະພາການຄ້າ ແລະ ອຸດສາຫະກຳແຂວງ ພ້ອມດ້ວຍ ພະນັກງານວິຊາການ ແລະ ແຂກຖືກເຊີນເຂົ້າຮ່ວມ.

ທ່ານ ກອງບຸນ ໄຊຍະແສງ ຮອງປະທານສະພາການຄ້າ ແລະ ອຸດສາຫະກຳແຂວງ ໃຫ້ຮູ້ວ່າ: ຕະຫຼອດໄລຍະທີ່ໄດ້ຮັບການສ້າງຕັ້ງສະພາການຄ້າ ແລະ ອຸດສາຫະກຳແຂວງ ຄັ້ງວັນທີ 17 ພະຈິກ 2014 ເປັນຕົ້ນມາ. ສະພາການຄ້າ ແລະ ອຸດສາຫະກຳ ໄດ້ເຄື່ອນໄຫວຕາມພາລະບົດບາດ ສິດ ແລະ ໜ້າທີ່ ໂດຍສະເພາະໄດ້ເປັນຂົວຕໍ່ລະຫວ່າງອົງການຂອງລັດ ກັບຫົວໜ່ວຍທຸລະກິດເປັນຕົວແທນໃຫ້ແກ່ຜູ້ໃຊ້ແຮງງານສະມາຄົມ-ກຸ່ມທຸລະກິດ, ປະເພດວິສາຫະກິດຕ່າງໆທີ່ສ້າງຕັ້ງ ແລະ ເຄື່ອນໄຫວຕາມລະບຽບກົດໝາຍຂອງ ສປປ ລາວ ທັງປຸກລະດົມ, ຂົນຂວາຍ, ສຶກສາອົບຮົມ, ນຳພາການຈັດຕັ້ງນັກທຸລະກິດເພື່ອພັດທະນາເສດຖະກິດ, ການຄ້າ-ອຸດສາຫະກຳ, ການເງິນ ແລະ ການບໍລິການປົກປ້ອງສິດ ແລະ ຜົນປະໂຫຍອັນຊອບທຳຂອງວິສາຫະກິດ ແລະ ນຳພາການເຄື່ອນໄຫວທຸລະກິດໃຫ້ຖືກຕ້ອງຕາມລະບຽບກົດໝາຍ ເປັນຕົ້ນ ວຽກງານຂະຫຍາຍສະມາຊິກ, ສະມາຄົມ, ກຸ່ມທຸລະກິດພາຍໃນແຂວງໄດ້ 19 ຫົວໜ່ວຍ, ໄດ້ເຜີຍແຜ່ບັນດານິຕິກຳ ແລະ ລະບຽບການຕ່າງໆ ເງື່ອນໄຂການເຂົ້າເປັນສະມາຊິກສະພາການຄ້າ ແລະ ອຸດສາຫະກຳແຂວງ ຈຳນວນ 1 ຄັ້ງມີຜູ້ເຂົ້າຮ່ວມຮັບຟັງ 97 ທ່ານ, ວຽກງານ CO ແລະ ມາດຕະຖານໄດ້ສົ່ງບຸກຄະລາກອນໄປຝຶກອົບຮົມ ຈຳນວນ 2 ທ່ານ ເພື່ອສ້າງຄວາມຮູ້ພື້ນຖານການອອກຟອມຕ່າງໆຢູ່ກົມນຳເຂົ້າ-ສົ່ງອອກ ໂດຍສະເພາະໃນປີ 2020 ໄດ້ປະຕິບັດການ ຟອມປະເພດສິນຄ້າໝາກກ້ວຍສິນຄ້າສົ່ງອອກໄປປະເທດຈີນ ໄດ້ 3 ຫົວໜ່ວຍທຸລະກິດ ເປັນຕົ້ນແມ່ນ ບໍລິສັດ ຮວ່າງແອງ ພັດທະນາກະສິກຳ ມີເນື້ອທີ 4.111,62 ເຮັກຕາ, ບໍລິສັດເຢຊິງ ມີເນື້ອທີ 320 ເຮັກຕາ, ບໍລິສັດ ຈຽນຕາ 283 ເຮັກຕາ ລວມເນື້ອທີ່ທັງໝົດ 4.714 ເຮັກຕາ, ໄດ້ອອກຟອມ E ມີ 232 ສະບັບມີ 2 ລ້ານກວ່າແກັດ ມີນ້ຳໜັກ 31.73 ລ້ານກິໂລ ມູນຄ່າສົ່ງອອກ 14,96 ລ້ານໂດລາສະຫະລັດ.

ປະເພດສິນຄ້າໄມ້ສຳເລັດຮູບສົ່ງໄປຈີນ ອອກຟອມ E ມີ 1 ສະບັບ, ມີ 47.850 ເສັ້ນ, ບໍລິມາດ 57.600 ກິໂລ, ມູນຄ່າສົ່ງອອກ 213.297 ໂດລາສະຫະລັດ ພ້ອມນີ້ ກໍໄດ້ຈັດກອງປະຊຸມ MOU ຮ່ວມກັບທະນາຄານພັດທະນາລາວ ສາຂາແຂວງອັດຕະປື ເພື່ອພັດທະນາທຸລະກິດຂະໜາດນ້ອຍ ແລະ ຂະໜາດກາງ SME ເລັ່ງໃສ່ການຜະລິດກະສິກຳແບບຍືນຍົງ ແລະ ໃຫ້ມີຄວາມເຂັ້ມແຂງ GRN ເພື່ອກ້າວໄປສູ່ AEC ໂດຍໄດ້ມີການສົ່ງເສີມການຕະຫຼາດ ເພື່ອໃຫ້ຜູ້ປະກອບການ, ຜູ້ຜະລິດສິນຄ້າສາມາດເຂົ້າແຂ່ງຕະຫຼາດນັບທັງພາຍໃນ ແລະ ຕ່າງປະເທດ ໄດ້ 6 ຄັ້ງ ມີ 15 ຫົວໜ່ວຍ ເປັນຕົ້ນ ຢູ່ນະຄອນຫຼວງວຽງຈັນ ມີ 2 ຄັ້ງ ມີ 2 ຫົວໜ່ວຍ, ຢູ່ປະເທດຈີນ ມີ 1 ຄັ້ງ ມີ 5 ຫົວໜ່ວຍ, ປະເທດໄທ 2 ຄັ້ງ ມີ 3 ຫົວໜ່ວຍ, ປະເທດຫວຽດນາມ ມີ 1 ຄັ້ງ 5 ຫົວໜ່ວຍ.

ໃນໂອກາດນີ້ ຄະນະບໍລິຫານງານສະພາການຄ້າ ແລະ ອຸດສາຫະກຳ ແຂວງອັດຕະປື ຊຸດທີ I ກໍໄດ້ຂຶ້ນອຳລາໜ້າທີ່ ເພື່ອໃຫ້ກອງປະຊຸມໄດ້ມີການແຕ່ງຕັ້ງຄະນະບໍລິຫານງານສະພາການຄ້າ ແລະ ອຸດສາຫະກຳແຂວງ ຊຸດໃໝ່ໂດຍແຕ່ງຕັ້ງ ທ່ານ ວົງວິໄລ ໄຊຍະສອນ ເປັນປະທານຄະນະບໍລິຫານງານຊຸດໃໝ່ ທ່ານ ນາງ ແສງອຳພອນ ພິຈິດ ເປັນຮອງປະທານ ທ່ານ ບຸນກອງ ໄຊຍະແສງ ເປັນຮອງປະທານ, ແຕ່ງຕັ້ງທ່ານ ຄຳໄພ ພິລາວົງ ເປັນປະທານ ທີ່ປຶກສາກິດຕິມະສັກ ສຄອ ແຂວງອັດຕະປື.

Medialaos MMD (ແຫຼ່ງຂໍ້ມູນຈາກ: ໜັງສືພິມ ເສດຖະກິດ-ສັງຄົມ)