ໃນວັນທີ 27 ກໍລະກົດ 2020 ທີ່ກະຊວງການຕ່າງປະເທດ, ສະຫະພັນແມ່ຍິງ ກະຊວງ ການຕ່າງປະເທດ ໄດ້ຈັດປາຖະກະຖາ ເພື່ອສະເຫລີມສະຫລອງ ວັນສ້າງຕັ້ງສະຫະພັນແມ່ຍິງລາວ ຄົບຮອບ 65 ປີ (20/7/1955-20/72020) ທັງເປັນການສະເຫລີມສະຫລອງ ຍ້ອນຫລັງ ວັນແມ່ຍິງສາກົນ ຄົບຮອບ 110 ປີ ແລະ ເປັນກິດຈະກໍາໜຶ່ງ ເພື່ອສ້າງຂະບວນການ ຂໍ່ານັບຮັບຕ້ອນ ກອງປະຊຸມໃຫຍ່ຄັ້ງທີ 6 ຂອງອົງຄະນະພັກກະຊວງ ການຕ່າງປະເທດ ໂດຍໄດ້ເຜີຍແຜ່ເອກະສານ ສຳຄັນ ຄື: ປະຫວັດຄວາມເປັນມາ ຂອງຂະບວນການກຳເນີດ ວັນທີ 20 ກໍລະກົດ ແລະ ການກໍ່ສ້າງພະນັກງານນຳພາ-ຄຸ້ມຄອງເພດຍິງ. ໃຫ້ກຽດເຂົ້າຮ່ວມປາຖະກະຖາຄັ້ງນີ້ໂດຍ ທ່ານ ທອງສະຫວັນ ພົມວິຫານ ຮອງລັດຖະມົນຕີ ກະຊວງການຕ່າງປະເທດ ແລະ ທ່ານ ນາງ ອາລຸນນີ ກົມມະສິດ ປະທານກິດຕິມະສັກ ສະຫະພັນແມ່ຍິງ ກະຊວງການຕ່າງປະເທດ.

ປາຖະກະຖາຄັ້ງນີ້, ໂດຍທ່ານ ນາງ ບັນດິດ ປະທຸມວັນ ຮອງປະທານສູນກາງ ສະຫະພັນແມ່ຍິງລາວ ເຊິ່ງທ່ານໄດ້ໃຫ້ກຽດເລົ່າ ມູນເຊື້ອການກຳເນີດ, ເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວ ຂອງອົງການຈັດຕັ້ງ ສະຫະພັນແມ່ຍິງລາວ ແລະ ແມ່ຍິງລາວ ບັນດາເຜົ່າ ທີ່ໄດ້ອຸທິດຕົນເພື່ອພາລະ ກິດຕໍ່ສູ້ປົດປ່ອຍຊາດ ແລະ ປົກປັກຮັກສາສ້າງສາ ພັດທະນາປະເທດຊາດ ຕະຫລອດໄລຍະ 65 ປີ. ພ້ອມດຽວກັນນັ້ນ, ກໍໄດ້ຍົກໃຫ້ເຫັນ ບົດບາດຄວາມສຳຄັນ ຂອງພາລະກິດການພັດ ທະນາ ແມ່ຍິງລາວ ໃນຂອບເຂດທົ່ວປະເທດ ໂດຍສະເພາະ ການສະຫລຸບຕີລາຄາ ກ່ຽວກັບວຽກງານ ການກໍ່ສ້າງພັກ ພະນັກງານນຳພາ-ຄຸ້ມຄອງເພດຍິງ ແລະ ການກຳນົດທິດທາງ ວຽກງານຈຸດສຸມ ໃນໄລຍະ 2018-2020 ເພື່ອສືບຕໍ່ປົກປ້ອງສິດຜົນ ປະໂຫຍດອັນຊອບທໍາຂອງແມ່ຍິງ, ສົ່ງເສີມຄວາມກ້າວໜ້າຂອງແມ່ຍິງ ແລະ ຮັບປະກັນການປະຕິບັດ ຄວາມສະເໝີພາບຍິງ-ຊາຍ ທາງດ້ານການເມືອງ, ເສດຖະກິດ ແລະ ຊີວິດການເປັນຢູ່ໃນສັງຄົມ.

ໂອກາດດຽວກັນນີ້, ທ່ານ ທອງສະຫວັນ ກໍໄດ້ໃຫ້ກຽດໂອ້ລົມ ຕໍ່ແມ່ຍິງກະຊວງດັ່ງກ່າວ ໂດຍໄດ້ ເນັ້ນໜັກເຖິງຄວາມເອົາໃຈໃສ່ ແລະ ໃຫ້ຄວາມສຳຄັນ ຂອງພັກ-ລັດຖະບານ ຕໍ່ວຽກງານສົ່ງເສີມ ຄວາມກ້າວໜ້າຂອງແມ່ຍິງ ໂດຍສະເພາະ ຄະນະພັກ-ຄະນະນຳ ກະຊວງການ ຕ່າງປະເທດ ຍາມໃດກໍໄດ້ຖືສຳຄັນ ການຍົກສູງບົດບາດ ຂອງພະນັກງານເພດຍິງ ໃຫ້ສູງເດັ່ນຂຶ້ນ ໃນການປະກອບສ່ວນ ເປັນກຳລັງແຮງ ທີ່ສຳຄັນ ເຂົ້າໃນການເຄື່ອນໄຫວ ວຽກງານການເມືອງ-ການທູດ ໃນໄລຍະໃໝ່, ເຊິ່ງໄດ້ຊີ້ນຳໃຫ້ທຸກພາກສ່ວນທີ່ກ່ຽວຂ້ອງ ເອົາໃຈໃສ່ສືບຕໍ່ກໍ່ສ້າງ ພະນັກງານເພດຍິງ ທາງດ້ານຄຸນທາດການ ເມືອງ, ຄຸນສົມບັດສິນທຳປະຕິວັດ, ມີຄວາມຮູ້ຄສາມສາມາດ ໃນລະດັບທີ່ແນ່ນອນ ແລະ ມີແບບແຜນ ວິທີ ການນຳພາທີ່ໜັກແໜ້ນ ແລະ ຮອບດ້ານ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)