ທ່ານ ປ້ານ ນ້ອຍ​ມະນີ ກຳມະການ​ສູນ​ກາງ​ພັກ ປະ ທານ​ຄະນະ​ບໍລິຫານ​ງານ​ສູນ​ກາງ​ສະຫະພັນ​ກຳມະ​ບານ​ລາວ ຄະນະ​ອະນຸ​ກຳມະການ​ໂຄສະນາ ແລະ ຂະບວນ​ການ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະເທດ​ຄັ້ງ​ທີ XI ຂອງ​ພັກ, ມີ ທ່່ານ ສະຫວັນ​ຄອນ ຣາ​ຊ​ມຸນ​ຕຣີ ຮອງ​ລັດຖະມົນຕີ ກະຊວງ​ຖະແຫຼງ​ຂ່າວ, ວັດທະນະ​ທຳ ແລະ ທ່ອງ​ທ່ຽວ ພ້ອມ​ດ້ວຍ​ຄະນະ ໄດ້​ລົງ​ເຄື່ອນ​ໄຫວ​ຊີ້​ນຳ​ວຽກ​ງານ​ໂຄສະນາ ແລະ ຂະບວນ​ການ​ຢູ່ ນະຄອນ-ຫຼວງ​ພະ​ບາງ ແຂວງ​ຫຼວງ​ພະ​ບາງ ໃນ​ວັນ​ທີ 27 ກໍລະກົດ ນີ້, ທີ່​ຫ້ອງ​ປະຊຸມ​ຂອງ​ພະ​ແນ​ກ​ແຮງ​ງານ ແລະ ສະຫວັດດີ​ການ​ສັງຄົມ​ແຂວງ.

ການ​ລົງ​ຊີ້​ນຳ​ວຽກ​ງານ​ໃນ​ຄັ້ງ​ນີ້, ທ່ານ ສຸ​ລິ​ສັກ ພົມມາ​ລີ ຫົວໜ້າ​ພະ​ແນ​ກ​ແຮງ​ງານ ແລະ ສະຫວັດດີ​ການ​ສັງຄົມ, ທັງ​ເປັນ​ຫົວໜ້າ​ອະ​ນຸ​ກໍາ​ມະ​ການ​ຂະບວນ​ການ​ຂັ້ນ​ແຂວງ ໄດ້​ລາຍ​ງານ​ໂດຍ​ຫຍໍ້ ໃນ​ການ​ສ້າງ​ແລະ ຊຸກຍູ້​ຂະບວນ​ການ​ດ້ານ​ຕ່າງໆ​ວ່າ: ສໍາ​ລັບ​ແຂວງ ຫຼວງ​ພະ​ບາງ ອະ​ນຸ​ກໍາ​ມະ​ການ​ຂະບວນ​ການ​ໄດ້​ຮັບ​ການ​ແຕ່ງຕັ້ງ​ທັງ​ໝົດ 33 ທ່ານ, ໃນ​ນັ້ນ ລວມ​ທັງ​ເລຂາ​ພັກ​ເມືອງ 11 ເມືອງ 1 ນະຄອນ ໄດ້​ແບ່ງ​ໜ້າທີ່​ຮັບຜິດຊອບ​ຊີ້​ນໍາໆ​ພາ​ຊຸກຍູ້​ຂະບວນ​ການ​ແຕ່​ລະ​ຂົງເຂດ​ວຽກ​ງານ ເປັນຕົ້ນ​ແມ່ນ​ຊຸກຍູ້​ຂະບວນ​ການ​ຜະລິດ​ສະບຽງ​ອາຫານ ໂດຍ​ສະເພາະ​ຜະລິດ​ເປັນ​ສິນຄ້າ​ກະ​ສິ​ກໍາ​ໃນ​ໄລ​ຍະ​ລະດູຝົນ​ຕິດ​ພັນ​ກັບ​ການ​ແກ້​ໄຂ​ສະພາບ​ການ​ຕົກ​ງານ ໃນ​ສະພາບ​ການ​ແຜ່​ລະບາດ​ຂອງ​ໂຄ​ວິດ-19, ຂະບວນ​ການ​ແກ້​ໄຂ​ປະກົດ​ການ​ຫຍໍ້ທໍ້ ໂດຍ​ສະເພາະ​ບັນຫາ​ຢາ​ເສບ​ຕິດ ແລະ ອາຊະ​ຍາ​ກໍາ​ຕ່າງໆ, ຂະບວນ​ການ​ປ້ອງ​ກັນ, ຄວບ​ຄຸມພະ​ຍາດ​ລະບາດ​ໃນໄລ​ຍະ​ລະດູຝົນ, ຕ້ານ​ການ​ແຜ່​ລະບາດ​ຂອງ​ໄວ​ຣັດ​ໂຄ​ວິດ-19, ປ້ອງ​ກັນ ແລະ ຄວບ​ຄຸມ​ແກ້​ໄຂ​ໄພພິບັດ​ທາງ​ທໍາ​ມະ​ຊາດ, ໄດ້​ຈັດ​ພິທີ​ປາຖະກະຖາ ແລະ ຈັດ​ງານ​ສະເຫຼີມສະຫຼອງ ເນື່ອງ​ໃນ​ວັນ​ສຳຄັນ​ຕ່າງໆ​ຂອງ​ພັກ​-​ຂອງ​ຊາດ, ເອົາໃຈໃສ່​ປຸກລະດົມ​ທຶນຮອນ​ຈາກ​ພາກສ່ວນ​ຕ່າງໆ​ທັງ​ພາຍ​ໃນ ແລະ ຕ່າງ​ປະ ເທດ ເພື່ອ​ປະກອບສ່ວນ​ເຂົ້າ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ​ຂອງ​ແຂວງ,  ປັບປຸງ​ພື້ນຖານ​ໂຄງ​ລ່າງ,ພື້ນ​ທີ່​ສາທາລະນະ, ປະດັບ​ປະດາ​ອະນາ​ໄມ​ຕົວ​ເມືອງ ຊຶ່ງ​ໃນ 6 ເດືອນ​ຜ່ານ​ມາ​ນີ້, ຜົນ​ການ​ຊີ້​ນໍາໆ​ພາ​ຊຸກຍູ້​ຂະບວນ​ການ​ໄດ້​ຢຸດ​ສະ​ງັດ, ຊັກ​ຊ້າ, ບາງ​ກິດຈະການ​ຕ້ອງ​ໄດ້​ຍົກເລີກ ຍ້ອນ​ການ​ແຜ່​ລະບາດ​ຂອງ​ພະຍາດ​ໄວ​​ຣັດ​ໂຄ​ວິດ-19 ພ້ອມ​ວາງ​ແຜນ​ສືບຕໍ່​ປະຕິບັດ​ຕາມ​ແຜນ​ດໍາ​ເນີນ​ງານ​ຂອງ​ອະ​ນຸ​ກໍາ​ມະ​ການ, ມອບ​ໝາຍ​ໃຫ້​ຄະນະ​ຮັບຜິດຊອບ​ແຕ່​ລະ​ຂົງເຂດ​ວຽກ​ງານ ປຶກສາ​​ກໍາ​ນົດ​ຂະບວນ​ການ​ຈຸດ​ສຸມ ແລະ​ສົ່ງເສີມ​ຕົວ​ແບບ​ດ້ານ​ຕ່າງໆ​ໃຫ້​ມີ​ຄວາມ​ກ້າວໜ້າ​ໄປ​ເທື່ອ​ລະ​ກ້າວ.

ໃນ​ພິທີ ທ່ານ ປ້ານ ນ້ອຍ​ມະນີ ໄດ້​ໃຫ້​ກຽດ​ໂອ້​ລົມ ຊຶ່ງ​ກ່ອນ​ອື່ນ​ທ່ານ​ໄດ້​ສະແດງ​ຄວາມ​ຊົມເຊີຍ​ໃນ ຄວາມ​ພະຍາຍາມ​ຂອງ​ພະນັກງານ​ການ​ນຳ​ທຸກ​ຂະແໜງການ ທີ່​ໄດ້​ພ້ອມ​ກັນ​ບຸກ​ບືນ​ເພື່ອ​ຮັບປະກັນ​ໃຫ້​ຊີວິດ​ການ​ເປັນ​ຢູ່​ຂອງ​ປະຊາຊົນ​ພາຍ​ໃນ​ນະຄອນ-ຫຼວງ​ພະ​ບາງ ກໍ​ຄືປະຊາຊົນ​ທົ່ວ​ແຂວງ​ໄດ້​ມີ​ຊີວິດ​ການ​ເປັນ​ຢູ່​ດີ​ຂຶ້ນ​ໄປ​ເປັນ​ກ້າວໆ. ຫຼັງ​ຈາກ​ນັ້ນ, ທາງ​ຄະນະ​ໄດ້​ລົງ​ຢ້ຽມຢາມ ແລະ ຊຸກ​ຍູ້​ຄອບຄົວ​ຕົວ​ແບບ​ສວນ​ອຸ້ມ​ຮັກ (ກາເຟ​ຂີ້​ເຫງັນ), ຟາ​ມ​ຄວາຍ​ນະຄອນ-ຫຼວງ​ພະ​ບາງ ແລະ ໄດ້​ໄປ​ຢ້ຽມຢາມ​ກຸ່ມ​ຄອບຄົວ​ຕົວ​ແບບ​ຫັດ​ຖະ​ກໍາຕໍ່າ​ຫູກ ບ້ານ​ນາ​ຍາງ​ເໜືອ, ລົງພື້ນ​ທີ່​ປູກ​ໝາກກ້ຽງ​ແລະ​ນາ​ເຂົ້າ ແລະ ຢ້ຽມ​ຊົມ​ເຂື່ອນ​ນໍ້າ​ອູ 2 ຕື່ມ​ອີກ​ທີ່​ເມືອງ​ນໍ້າ​ບາກ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)