ກອງ​ປະຊຸມ​ຖອດ​ຖອນ ​ບົດຮຽນ​ກ່ຽວ​ກັບ​ຜົນ​ການກວດ ກາ, ການ​ສືບ​ສວນ​- ສອບສວນ ສາເຫດຄູ​ກັນ​ນ້ຳ ເຂື່ອນ ​ໄຟຟ້າເຊ​ປຽນ​-​ເຊ​ນ້ຳນ້ອຍແຕກ​ ຈັດ​ຂຶ້ນ​ໃນ​ວັນ​ທີ 27 ກໍລະກົດຜ່ານ​ມາ ທີ່​ຫ້ອງ​ວ່າການ​ປົກຄອງ​ແຂວງ​ອັດ​ຕະ​ປື ໂດຍ​ການ​ເປັນ​ປະທານ​ຂອງ​ທ່ານ ບຸນທອງ ຈິດ​ມະນີ ກຳມະການ​ກົມການ ເມືອງ​ສູນ​ກາງ​ພັກ ​ຄະ​ນະເລ ຂາທິການ​ສູນ​ກາງ​ພັກ ຮອງ ​ນາຍົກລັດຖະມົນຕີ ປະທານ ຄະນະ​ກວດກາ​ສູນ​ກາງ​ພັກ ປະທານອົງການ​ກວດກາ​ລັດ ຖະບານ ແລະ ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ, ມີ​ບັນດາ​ທ່ານ​ລັດ​ຖະ​ມົນ​ຕີ​-​ຮອງ​ລັດຖະມົນຕີ, ເຈົ້າ​ແຂວງ​-​ຮອງ​ເຈົ້າແຂວງ​ທີ່​ກ່ຽວຂ້ອງ, ຮອງ​ປະທານ​ອົງການ​ກວດກາ​ລັດຖະບານ, ພະນັກງານ​ທີ່​ກ່ຽວຂ້ອງ​ເຂົ້າ​ຮ່ວມ.

ທ່ານ ສີ​ໃນ ມຽງ​ລາ​ວັນ ຮອງ​ປະທານ​ຄະນະ​ກວດກາ​ສູນ​ກາງ​ພັກ ແລະ ອົງການ​ກວດກາ​ລັດຖະບານ ໄດ້​ລາຍ​ງານ​ກ່ຽວ​ກັບ​ຜົນ​ການ​ກວດກາ​ຄວາມ​ຮັບຜິດຊອບ​ຂອງ​ເຈົ້າ​ໜ້າທີ່​ລັດ​ທີ່​ກ່ຽວຂ້ອງ​ກັບ​ການ​ອະນຸມັດ​ກໍ່ສ້າງ ແລະ ເຕືອນ​ໄພ​ລ່ວງ​ໜ້າ​ກ່ອນ​ຄູ​ກັນ​ນໍ້າ​ເຂື່ອນ​ໄຟຟ້າ​ເຊ​ປຽນ​-​ເຊ​ນໍ້າ​ນ້ອຍ​ແຕກ​ ໂດຍ​ໄດ້​ຍົກ​ໃຫ້​ເຫັນ​ເຖິງ​ຈຸດ​ບົກ​ຜ່ອງ ໃນ​ການ​ປະສານ​ງານ​ລະຫວ່າງ​ພາກສ່ວນ​ຕ່າງໆ​ກ່ອນ​ເຫດການ​ຄູ​ກັນ​ນໍ້າ​ແຕກ​ ນັບ​ທັງບໍລິສັດ​ຜູ້​ຮັບ​ເໝົາ ອໍາ​ນາດ​ການ​ປົກຄອງ​ທ້ອງຖິ່ນ ແລະ ສູນ​ກາງ ຊຶ່ງ​ຕ້ອງ​ໄດ້​ມີ​ການ​ປັບປຸງ​ຄືນໃໝ່ ແລະ ຕິດ​ຕັ້ງ​ລະບົບ​ແຈ້ງ​ເຕືອນ​ໄພ​ທີ່​ທັນ​ສະໄໝ​ອີກ.ຈາກ​ນັ້ນ ທ່ານ ສິງ​ເພັດ ບຸນ​ສະ​ຫວັດ​ທິ​ພັນ ໄດ້​ລາຍ​ງານ​ຜົນ​ການ​ສືບ​ສວນ​-​ສອບ​ສວນ​ສາເຫດ​ທີ່​ພາໃຫ້​ຄູ​ກັນ​ນໍ້າ​ເຂື່ອນ​ໄຟຟ້າ ເຊ​ປຽນ​ເຊ​ນໍ້າ​ນ້ອຍ​ແຕກ​ ຊຶ່ງ​ໄດ້​ຍົກ​ໃຫ້​ເຫັນ​ເຖິງ​ຂະບວນ​ການ, ຂັ້ນ​ຕອນ, ການ​ທົດ​ລອງ ຂອງ​ການ​ກວດກາ, ສືບ​ສວນ​-​ສອບ​ສວນ ສາເຫດ​ຂອງ​ການ​ແຕກ​ ໂດຍ​ໄດ້​ເຊື້ອ​ເຊີນ​ເອົາ​ຊ່ຽວຊານ​ຈາກ​ອົງການ​ຈັດ​ຕັ້ງ​ສາກົນ, ບັນດາ​ປະເທດ​ອ້ອມ​ຂ້າງ ແລະ ຜູ້​ສັງເກດ​ການ​ຈາກ​ປະເທດ​ຕ່າງໆ ເພື່ອ​ມາ​ຊ່ວຍ​ໃນ​ການ​ກວດກາ, ສືບ​ສວນ​-​ສອບ​ສວນ​ຫາ​ສາເຫດ​ການ​ແຕກ​​ຄັ້ງ​ນີ້ ຈົນ​ສາມາດ​ຮູ້​ສາເຫດ​ທີ່ແທ້​ຈິງ ແລະ ສາມາດ​ປະກາດ​ໃຫ້​ປະຊາຊົນ​ລາວ ກໍ​ຄື​ຊາວ​ໂລກ​ຮັບ​ຮູ້ ໃນ​ກາງ​ປີ 2019 ທີ່​ຜ່ານ​ມາ.

ຈາກ​ນັ້ນ​ຜູ້​ເຂົ້າ​ຮ່ວມ​ກອງ​ປະຊຸມ​ໄດ້​ພັດ​ປ່ຽນ​ກັນ​ປະ​ກອບ​ຄໍາ​ຄິດ​ຄໍາ​ເຫັນ​ຕື່ມ​ເພື່ອ​ເຮັດ​ໃຫ້​ວຽກ​ງານ​ຄຸ້ມ​ຄອງ​ເຂື່ອນ​ໄຟຟ້າ ແລະ ການ​ແກ້​ໄຂ​ເຫດ​ສຸກ​ເສີນ, ການ​ເຕືອນ​ໄພ​ລ່ວງ​ໜ້າ ໃຫ້​ມີ​ປະສິດ​ທິ​ຜົນ ເພື່ອ​ບໍ່​ໃຫ້​ມີ​ເຫດການ​ດັ່ງ​ກໍລະນີ​ຄູ​ກັນ​ນ້ຳ D ຂອງ​ໂຄງ​ການກໍ່​ສ້າງ​ເຂື່ອນ​ໄຟ​ຟ້າ​ເຊ​ປຽນ-ເຊ​ນ້ຳ​ນ້ອຍ ເກີດ​ຂຶ້ນ​ອີກ​ໃນ​ອະ​ນາ​ຄົດ.

ໂອກາດ​ນີ້​ທ່ານ​ຮອງ​ນາຍົກລັດຖະມົນຕີ​ໄດ້​ໃຫ້​ກຽດ​ໂອ້​ລົມ​ຕໍ່​ກອງ​ປະຊຸມ​ໂດຍ​ທ່ານ​ໄດ້​ເນັ້ນ​ໜັກ​ໃຫ້​ເພີ່ມ​ທະວີ​ວຽກ​ງານ​ສຶກສາ​ອົບຮົມ​ການ​ເມືອງ​-​ແນວ​ຄິດ​ໃຫ້​ເລິກເຊິ່ງ, ຄະນະ​ພັກ, ອົງການ​ປົກຄອງ, ກະຊວງ ແລະ ທ້ອງຖິ່ນ ຕ້ອງ​ຖື​ເອົາ​ວຽກ​ງານ​ນີ້​ເປັນ​ກົກ ເພື່ອ​ສຶກສາ​ອົບຮົມ​ພະນັກງານ, ສະມາຊິກ​ພັກ ແລະ ລັດຖະກອນ​ເປັນ​ປະຈຳ;  ກະຊວງ​ທີ່​ກ່ຽວຂ້ອງ ຕ້ອງ​ເພີ່ມ​ທະວີ​ການ​ປະຕິບັດ​ພາລະ​ບົດບາດ​ຄຸ້ມ​ຄອງ​ມະຫາ​ພາກ​ໃຫ້​ເຂັ້ມແຂງ​ກວ່າ​ເກົ່າ, ເປັນຕົ້ນ ​ການ​ປັບປຸງ ແລະ ສ້າງ​ນິຕິ​ກໍາ​ຕ່າງໆ​ໃຫ້​ຄົບ​ຊຸດ, ຮັດກຸມ​ຕື່ມ ໂດຍ​ສະເພາະ​ນິຕິ​ກໍາ​ດ້ານ​ການ​ຄຸ້ມ​ຄອງ​ພະລັງງານ ແລະ ສິ່ງແວດລ້ອມ​ທີ່​ລະອຽດ ພ້ອມ​ທັງ​ນໍາ​ພາ​-​ຊີ້​ນໍາ​ປະຕິບັດ​ໃຫ້​ຖືກ​ຕ້ອງ​-​ເຂັ້ມ​ງວດ; ກະຊວງ​ພະລັງງານ ແລະ ບໍ່​ແຮ່ ເພີ່ມ​ທະວີ​ການ​ຕິດຕາມ, ກວດກາ​ຄືນ​ບັນດາ​ໂຄງການ​ໄຟຟ້າ​ທີ່​ກຳລັງ​ກໍ່ສ້າງ ແລະ ກໍ່ສ້າງ​ສຳເລັດ​ແລ້ວ​ໃນ​ຂອບ​ເຂດ​ທົ່ວ​ປະເທດ​ວ່າ​ກໍ່ສ້າງ​ໄດ້​ມາດຕະຖານ ຕາມ​ການ​ອອກ​ແບບ​ທີ່​ກົມ​ວິຊາ​ການ​ຮັບຮອງ ແລະ ຕາມ​ສັນ​ຍາ​ສໍາ​ປະທານ​ຫຼື​ບໍ່ ເພື່ອ​ຮັບປະກັນ​ຄວາມ​ປອດ​ໄພ​ຂອງ​ໂຄງການ ແລະ ບໍ່​ສ້າງ​ຜົນ​ກະທົບ​ຕໍ່​ສິ່ງແວດລ້ອມ ຖ້າ​ກໍລະນີ​ພົບ​ເຫັນ​ບັນຫາ​ທີ່​ບໍ່​ຖືກຕ້ອງ​ສອດຄ່ອງ ຕ້ອງ​ສົມທົບ​ກັບ​ບໍລິສັດ​ທີ່​ກ່ຽວຂ້ອງ​ເພື່ອ​ແກ້​ໄຂ​ໃຫ້​ທັນ​ເວລາ;  ກະຊວງ​ຊັບ​ພະຍາ​ກອນ​ທໍາ​ມະ​ຊາດ ແລະ ສິ່ງ​ແວດ​ລ້ອມ ຕ້ອງ​ເພີ່ມ​ທະວີ​ການ​ຕິດຕາມ, ກວດກາ​ຄືນແຜນການ​ຄຸ້ມ​ຄອງ ແລະ ຕິດຕາມ​ກວດກາ​ດ້ານ​ສິ່ງແວດລ້ອມ​ສັງຄົມ ແລະ ທຳ​ມະ​ຊາດ ທີ່​ກະຊວງ​ຮັບຮອງໄປ​ແລ້ວ​ນັ້ນ ລວມ​ທັງ​ບັນດາ​ໂຄງການ​ທີ່​ກໍາ​ລັງ​ກໍ່ສ້າງ ແລະ ກໍ່​ສ້າງ​ສໍາ​ເລັດ​ແລ້ວໃນ​ຂອບ​ເຂດ​ທົ່ວ​ປະເທດ ເພື່ອ​ເບິ່ງ​ວ່າ​ສອດຄ່ອງກັບ​ສະພາບ​ຄວາມ​ເປັນ​ຈິງ​ແລ້ວ​ບໍ ຄວນ​ມີ​ການ​ລົງ​ກວດກາ​ເກັບ​ກໍາ​ຂໍ້​ມູນ​ຢູ່​ສະຖານທີ່​ພາກ​ສະໜາມ​ຕົວ​ຈິງ ຕໍ່​ກັບ​ບັນຫາ​ທີ່​ເຫັນ​ວ່າ​ບໍ່​ທັນ​ຈະແຈ້ງ​ສອດຄ່ອງ​ຊັດ​ເຈນ ເພື່ອ​ຮັບປະກັນ​ຄວາມ​ຖືກຕ້ອງ​ຕາມ​ຕົວ​ຈິງ;  ຕ້ອງ​ມີ​ແຜນ​ຕອບ​ໂຕ້​ກໍລະນີ​ສຸກ​ເສີນໃນ​ທຸກ​ໂຄງການ ແລະ ຮັບປະກັນ​ໃຫ້​ມີ​ລະບົບ​ເຕືອນ​ໄພ​ທີ່​ທັນ​ສະໄໝມີ​ປະສິດ​ທິ​ຜົນ ເພື່ອ​ຮັບປະກັນ​ເຮັດ​ໃຫ້​ປະຊາຊົນ​ທີ່ຢູ່​ເຂດ​ລຸ່ມ​ໂຄງການ​ມີ​ຄວາມ​ປອດ​ໄພ​ໃນ​ເມື່ອ​ມີ​ເຫດການ​ສຸກ​ເສີນ; ກະຊວງ ແລະ ອົງການ​ປົກຄອງ​ທ້ອງຖິ່ນ​ທີ່​ກ່ຽວຂ້ອງຕ້ອງ​ເອົາໃຈໃສ່ ແລະ ມີ​ຄວາມຮັບຜິດຊອບ​ສູງ​ໃນ​ການອະນຸມັດ, ຮັບຮອງການ​ກໍ່ສ້າງ​ໂຄງການ​ພັດທະນາ​ໄຟຟ້າ ໃນຕໍ່ໜ້າ ຕ້ອງ​ໃຫ້​ເປັນ​ໄປ​ຕາມ​ຂັ້ນ​ຕອນ​ຂອງ​ລະບຽບ​ກົດໝາຍ​ຢ່າງ​ເຂັ້ມ​ງວດ ແລະ ເຕັກນິກ ໂດຍ​ໃຊ້​ໄລຍະ​ເວລາທີ່​ເໝາະ​ສົມ, ຫຼີກ​ລ່ຽງ​ການ​ເຮັດ​ແບບ​ຟ້າວ​ຟັ່ງ ຫຼື ເອື່ອຍ​ອີງໃສ່​ແຕ່​ການ​ສະໜອງ​ຂໍ້​ມູນ​ຈາກ​ເຈົ້າ​ຂອງໂຄງການ ແລະ ບໍລິສັດ​ພຽງ​ແຕ່​ຝ່າຍ​ດຽວ; ເພີ່ມ​ທະວີ​ວຽກ​ງານ​ຄຸ້ມ​ຄອງ​ບັນດາໂຄງການ​ໄຟຟ້າ, ປຸກລະດົມ​ທົ່ວ​ສັງຄົມເຂົ້າ​ຮ່ວມ​ໃນ​ການ​ຄຸ້ມ​ຄອງ ແລະ ປົກ​ປັກ​ຮັກສາ​ດ້ວຍ​ຄວາມ​ເປັນ​ເຈົ້າ​ການ, ບ່ອນ​ໃດ​ທີ່ໄດ້​ມີ​ການ​ອະນຸຍາດ​ໃຫ້​ພັດທະນາ ກໍ​ຕ້ອງ​ມີ​ການ​ຄຸ້ມ​ຄອງ, ຕິດ​ຕາມ​-​ກວດກາ​ໃຫ້​ເປັນ​ປົກກະຕິ ແລະ ຖືກຕ້ອງ​ຕາມ​ກົດໝາຍ, ຕ້ອງ​ມີ​ລະບຽບ​ການ ແລະ ມາດ​ຕະການ​ລະອຽດ​ຈະແຈ້ງ ເພື່ອ​ຄຸ້ມ​ຄອງ​ໃຫ້​ແທດ​ເຖິງ ແລະ ເຂັ້ມ​ງວດ;  ຄະນະ​ຮັບຜິດຊອບ ແລະ ກະຊວງ​ທີ່​ກ່ຽວຂ້ອງ​ຕ້ອງ​ເອົາໃຈໃສ່ ປະສານ​ສົມທົບ​ກັບ​ແຂວງ​ອັດ​ຕະ​ປື ກໍ​ຄື​ເມືອງ​ສະໜາມ​ໄຊ ກວດກາ​ຄືນ​ການ​ຈັດ​ສັນ​ທີ່ຢູ່​ອາໄສ ແລະ ບ່ອນ​ທໍາ​ການ​ຜະລິດ​ຂອງ​ປະຊາຊົນ ຜູ້​ທີ່​ຖືກ​ຜົນ​ກະທົບ​ຈາກ​ການ​ແຕກ​​ຂອງ​ເຂື່ອນ​ໃຫ້​ໄວ​ຂຶ້ນ​ຕື່ມ ເຮັດ​ໃຫ້​ປະຊາຊົນ​ມີ​ຄວາມ​ອຸ່ນ​ອ່ຽນ ແລະ ໄດ້​ດໍາ​ລົງ​ຊີ​ວິດ​ທໍາ​ມາ​ຫາ​ກິນ​ເປັນ​ປົກກະຕິ​ໂດຍ​ໄວ; ຄະນະ​ພັກ, ອົງການ​ປົກຄອງ ແຂວງ​ອັດ​ຕະ​ປື ແລະ ເມືອງ​ສະໜາມ​ໄຊ ຕ້ອງ​ເພີ່ມ​ທະວີ​ຄວາມຮັບຜິດຊອບ ໃນ​ການ​ຟື້ນ​ຟູ​ຊີວິດ​ການ​ເປັນ​ຢູ່ ຂອງ​ປະຊາຊົນ​ທີ່​ຖືກ​ຜົນ​ກະທົບ​ຈາກ​ຄູ​ກັນ​ນ້ຳ​ຂອງເຂື່ອນ​ແຕກ ໃຫ້​ກັບ​ຄືນ​ສູ່​ສະພາບ​ປົກກະຕິ​ໄວ​ເທົ່າໃດ​ຍິ່ງ​ເປັນ​ການ​ດີ, ໃນ​ນີ້ ໃຫ້​ເອົາໃຈໃສ່​ຕິດຕາມ, ກວດກາ​ດ້ານ​ຄວາມ​ໂປ່​ງ​ໃສ​ຂອງ​ພາກສ່ວນ​ຕ່າງໆ​ໃນ​ການ​ຄຸ້ມ​ຄອງ​ທຶນຮອນ, ຊັບ​ສິນ, ງົບປະມານ​ຊົດ​ເຊີຍ, ຊ່ວຍເຫຼືອ​ຜູ້​ຖືກ​ຜົນ​ກະທົບ ບໍ່​ໃຫ້​ເກີດ​ມີ​ຊ່ອງ​ວ່າງ​ສວຍໂອກາດ​ຕ່າງໆ. 

ໃນ​ໂອກາດ​ນີ້ ທ່ານ ບຸນ​ທອງ ຈິດ​ມະນີ ຍັງ​ໄດ້​ມອບ​ລົດ​ຈັກ​ຈໍາ​ນວນ 4 ຄັນ, ຄອມ​ພິວ​ເຕີ ແລະ ປິ່ນ​ເຕີ 2 ຊຸດ ລວມ​ມູນ​ຄ່າ 72 ລ້ານ​ກວ່າ​ກີບ ໃຫ້​ແກ່​ຄະນະ​ກວດກາ​ພັກ ແລະ ອົງການ​ກວດກາ​ແຂວງ​ອັດ​ຕະ​ປື ເພື່ອ​ນໍາ​ໃຊ້​ເຂົ້າ​ໃນ​ການ​ເຄື່ຶອນ​ໄຫວ​ວຽກ​ງານ​ກວດກາ ຂອງ​ແຂວງ​ຕື່ມ​ອີກ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)