ພິທີ​ມອບ​-​ຮັບ​ຕໍາ​ແໜ່​ງວິ​ທະ​ຍາ​ຖານະ​ທາງ​ວິຊາ​ການ​ສາສະດາຈານ​ພິເສດ (Vi siting Professor) ຈາກ​ມະຫາວິທະຍາໄລ​ອ໋ອກ​ຝອດ ປະເທດ​ອັງກິດ ໃຫ້​ແກ່ ທ່ານ ມາຍ​ຟອງ ມາຍ​ຊາຍ ຮອງ​ອະ ທິ​ການ​ບໍດີ​ມະຫາວິທະຍາໄລ​ວິທະຍາສາດ​ສຸຂະພາບ (ມວສ) ໄດ້​ຈັດ​ຂຶ້ນໃນ​ວັນ​ທີ 27 ກໍລະກົດ​ຜ່ານ​ມາ, ທີ່ ມວສ ໂດຍ​ການ​ເຂົ້າ​ຮ່ວມ​ຂອງ​ທ່ານ ບຸນ​ກອງ ສີ​ຫາ​ວົງ ລັດຖະມົນຕີ​ກະຊວງ​ສາທາລະນະ​ສຸກ; ທ່ານ ຈອນ ເພຍ​ຊັນ (John Pearson) ເອກ​ອັກ​ຄະ​ລັດ​ຖະ​ທູດ ປະເທດ​ອັງກິດ ປະ​ຈໍາ ສປປ ລາວ, ມີ​ຮອງ​ລັດ​ຖະມົນຕີ, ອະທິການ​ບໍດີ ມວສ, ບັນດາ​ການ​ນໍາ​ອ້ອມ​ຂ້າງ​ກະ ຊວງ​ສາທາລະນະ​ສຸກ ແລະ ແຂກ ຖືກ​ເຊີນ​ເຂົ້າ​ຮ່ວມ. 

ທ່ານ ມາຍ​ຟອງ ມາຍ​ຊາຍ  ໄດ້​ນໍາ​ສະເໜີ​ຜົນງານ​ການ​ຄົ້ນຄວ້າ​ດ້ານ​ວິຊາ​ການ​ທີ່​ພົ້ນ​ເດັ່ນ​ໃນ​ໄລຍະ​ຜ່ານມາ​ໂດຍ​ຫຍໍ້​ກ່ຽວ​ກັບ​ປະຫວັດ​ຄວາມ​ເປັນ​ມາ​ໃນ​ຊີວິດ​ແພດ​ການ​ປະກອບສ່ວນ​ເຂົ້າ​ໃນ​ການ​ກໍ່​ຕັ້ງ ຫຼື ວ່າ​ສ້າງໜ່ວຍ​ງານ​ທາງ​ດ້ານ​ວິຊາ​ການ​ທີ່​ສໍາ​ຄັນ​ຢູ່​ໃນ​ສປປ​ລາວ,ນໍາ​ສະເໜີ​ຜົນງານ​ການ​ຕີ​ພິມ​ເຜີຍແຜ່​ບົດ​ຄົ້ນຄວ້າຢ່າງ​ໜ້ອຍ 162 ບົດ​ໃນ​ວາລະສານ​ການ​ແພດ​ສາກົນ,ຜົນງານ​ໃນ​ວຽກ​ງານ​ການ​ສິດສອນ​ເຮັດ​ຄົ້ນຄວ້າ​ວິ​ທະຍາ​ສາດ​ດ້ານ​ພະຍາດ​ຊຶມ​ເຊື້ອ ແລະ ພະຍາດ​ເຂດ​ຮ້ອນ ຮ່ວມ​ກັບ ມະຫາວິທະຍາໄລ​ອ໋ອກ​ຝອດ ມາ​ຕັ້ງແຕ່ ປີ 2000 ເປັນຕົ້ນ​ມາ, ເປັນ​ທີ່​ຍອມຮັບ​ຈາກ​ສະພາ​ວິທະຍາສາດ ການ​ແພດ​ຂອງ​ມະຫາວິທະຍາໄລ​ອ໋ອກຝອດ ແລະ ຈາກ​ວົງ​ການ​ນັກວິທະຍາສາດ​ການ​ແພດ​ໃນ​ລະດັບ​ສາກົນ​ກໍ​ຄື​ໃນ​ພາກ​ພື້ນ ພ້ອມ​ນັ້ນ ຍັງ​ໄດ້​ປະກອບ​ສ່ວນ​ສໍາ​ຄັນ​ເຂົ້າ​ໃນ​ການບົ່ງມະຕິ​ປິ່ນປົວ​ພະຍາດ​ຊຶມ​ເຊື້ອ​ແລະ ພະຍາດ​ເຂດ​ຮ້ອນ​ຫຼາຍ​ຢ່າງ.

ໃນ​ປີ 2004 ທ່ານ​ກໍ​ໄດ້​ຮັບ​ລາງວັນ​ຊະນະ​ເລີດ​ໃນ​ຖານະ​ທີ່​ມີ​ຜົນງານ​ການ​ຄົ້ນຄວ້າ​ດີເດັ່ນ​ລະດັບ​ໂລກ ຈາກ​ສະມາຄົມ​ແພດ​ເດັກ​ນາໆ​ຊາດ​ທີ່​ສະຫະລັດ​ອາ​ເມ​ຣິ​ກາ. ປັດຈຸ​ບັນ​ທ່ານ​ຍັງ​ດໍາ​ລົງ​ຕໍາ​ ແໜ່​ງ​ຫຼາຍໆ​ຢ່າງ​ທີ່ສໍາ​ຄັນ​ໃນ​ວົງ​ການ​ແພດ​ນອກຈາກ​ຮອງ​ອະທິການ​ບໍດີ​ມວສ​ເຊັ່ນ: ເປັນ​ປະທານ​ສະມາຄົມ​ແພດ​ພະຍາດ​ຊຶມ​ເຊື້ອ​ລາວ,ຮອງ​ປະທານ​ບອດ​ການ​ແພດ​ຂອງ​ສະພາ​ຄຸ້ມ​ຄອງ​ວິຊາ​ຊີບ​ປິ່ນປົວ​ຂອງ​ລາວ,ເປັນ​ຮອງ​ປະທານ​ຄະນະກໍາ​ມະ​ການ​ທີ່​ປຶກ​ສາ​ສໍາ​ລັບ​ການ​ສັກ​ຢາ​ກັນ​ພະຍາດ​ແຫ່ງ​ຊາດ​ແລະ​ຮອງ​ປະທານ​ຄະ​ນະ​ກໍາ​ມະ​ການ​ແຫ່ງ​ຊາດ​ດ້ານ​ຈັນ​ຍາທໍາ​ການຄົ້ນ ຄວ້າ​ສາທາລະນະ​ສຸກ.

ການ​ມອບ​ຕໍາ​ແໜ່​ງ​ທາງ​ວິຊາ​ການ​ດັ່ງກ່າວ​ຖື​ເປັນ​ເຫດການ​ທີ່​ມີ​ຄວາມ​ໝາຍ​ຄວາມ​ສໍາ​ຄັນ​ຄັ້ງ​ປະຫວັດ​ສາດ​ສໍາ​ລັບ​ວົງ​ການ​ນັກວິຊາການ​ລາວ ເວົ້າ​ລວມ, ເວົ້າ​ສະເພາະ ແມ່ນ​ສໍາລັບ​ຂະແໜງການ​ສາທາລະນະ​ສຸກ ເພາະ​ເປັນ​ຄັ້ງ​ທໍາ​ອິດ ທີ່​ນັກວິຊາການ​ທາງ​ການແພດ​ຂອງ​ລາວ ໄດ້​ຮັບ ນາມ​ມະ ຍົດ​ອັນ​ຊົງ​ກຽດ​ດັ່ງກ່າວ ຈາກ​ມະຫາວິທະຍາໄລ​ອ໋ອກ​ຝອດ​ປະເທດ​ອັງກິດ​ ຊຶ່ງ​ເປັນ​ໜຶ່ງ​ໃນ​ບັນດາ​ມະຫາ ວິທະຍາໄລ​ທີ່​ມີ​ຊື່​ສຽງ​ໂດ່​ງ​ດັງ 5 ອັນ​ດັບ​ຕົ້ນໆ​ຂອງ​ໂລກ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)