ວັນທີ 27/7/2020 ອະນຸກຳມະການໂຄສະນາ ແລະ ຂະບວນການ ກອງປະຊຸມໃຫຍ່ ຄັ້ງທີ XI ຂອງພັກ ນຳໂດຍ ສະຫາຍ ປ້ານ ນ້ອຍມະນີ ປະທານສູນກາງກຳມະບານລາວ, ຮອງຫົວໜ້າໜ່ວຍງານຂະບວນການ ກອງປະຊຸມໃຫຍ່ ຄັ້ງທີ XI ຂອງພັກ, ສະຫາຍ ພົຈ ສົມພອນ ແກ້ວມີໄຊ ປະທານສະຫະພັນນັກຮົບເກົ່າ, ໜ່ວຍງານຂະບວນການ, ສະຫາຍ ສະຫັວນຄອນ ລາຊມຸນຕີ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ໜ່ວຍງານໂຄສະນາພ້ອມດ້ວຍຄະນະ ໄດ້ລົງເຄື່ອນໄຫວຢູ່ແຂວງຫຼວງພະບາງ ເພື່ອຊຸກຍູ້ຂະບວນການກະກຽມໃຫ້ແກ່ກອງປະຊຸມໃຫຍ່ ຄັ້ງທີ XI ຂອງພັກ ເຕັມໄປດ້ວຍບັນຍາກາດອັນຟົດຟື້ນ ແລະ ມີເນື້ອໃນເລີກເຊີ່ງ.

ໃນໂອກາດດັ່ງກ່າວ ຄະນະກໍ່ໄດ້ພົບປະກັບຄະນະນຳ ແລະ ພະນັກງານຫຼັກແຫຼ່ງ ຂອງແຂວງຫຼວງພະບາງ ໄດ້ຮັບຟັງການລາຍງານຂອງ ທ່ານ ສຸລິສັກ ພົມມະລີ ຫົວໜ້າອະນຸກຳມະການຂະບວນການ ຂອງແຂວງຫຼວງພະບາງ ກ່ຽວກັບວຽກງານໂຄສະນາ ແລະ ຂະບວນການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ອົງຄະນະພັກແຂວງຫຼວງພະບາງ.