ການຫັນເປັນທັນສະໄໝໃນການຊຳລະສະສາງ ແລະ ການເກັບລາຍຮັບເຂົ້າງົບປະມານ ຜ່ານລະບົບໂທລະສັບມືຖື

0
133

ໃນຕອນບ່າຍຂອງວັນທີ 03 ສິງຫາ 2020, ໄດ້ມີກອງປະຊຸມ ເພື່ອຕິດຕາມຄວາມຄືບໜ້າການຈັດຕັ້ງປະຕິບັດວຽກງານຂອງ ຄະນະສະເພາະກິດ ການຫັນເປັນທັນສະໄໝໃນການຊຳລະສະສາງ ແລະ ການເກັບລາຍຮັບເຂົ້າງົບປະມານ ຜ່ານລະບົບໂທລະສັບມືຖື ທີ່ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ, ໂດຍການເປັນປະທານຂອງທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ພ້ອມທັງເປັນຫົວໜ້າຄະນະສະເພາະກິດດັ່ງກ່າວ. ເຂົ້າຮ່ວມກອງປະຊຸມດັ່ງກ່າວປະກອບມີ ທ່ານ ປອ. ທັນສະໄໝ ກົມມະສິດ, ລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ, ບັນດາທ່ານຮອງລັດຖະມົນຕີ ແລະ ຄະນະກົມຈາກພາກສ່ວນຕ່າງໆ ທີ່ຕິດພັນກັບວຽກງານຂອງຄະນະສະເພາະກິດດັ່ງກ່າວ ເຂົ້າຮ່ວມນຳອີກດ້ວຍ.

ກອງປະຊຸມ ໄດ້ມີການລາຍງານຄວາມຄືບໜ້າຕໍ່ກັບວຽກງານການສ້າງແຜນແມ່ບົດເສດຖະກິດດິຈິຕອນຂອງ ສປປ ລາວ, ແຜນແມ່ບົດການຫັນໄປສູ່ການຊຳລະສະສາງແບບດິຈິຕອນ ເຊິ່ງບັນດາແຜນເຫຼົ່ານີ້ຈະເປັນບ່ອນອີງທີ່ສຳຄັນ ໃນການຈັດຕັ້ງປະຕິບັດ ການຫັນເປັນທັນສະໄໝໃນການຊຳລະສະສາງ ແລະ ເກັບລາຍຮັບເຂົ້າງົບປະມານ ຜ່ານລະບົບໂທລະສັບມືຖື. ພ້ອມນີ້, ຍັງໄດ້ມີການລາຍງານຄວາມພ້ອມ ທາງດ້ານເຕັກນິກ ເພື່ອເຊື່ອມຕໍ່ພື້ນຖານໂຄງລ່າງຂອງ ທະນາຄານ, ກະຊວງການເງິນ ແລະ ກະຊວງ ປທສ ເພື່ອຫັນການຊຳລະສະສາງ ໃຫ້ເປັນທັນສະໄໝ ຫຼື ເອີ້ນໄດ້ວ່າເປັນການຊຳລະສະສາງແບບດິຈິຕອນ ຜ່ານລະບົບໂທລະສັບມືຖື ເປັນປັດໄຈໜຶ່ງທີ່ສຳຄັນໃນການສົ່ງເສີມ ແລະ ອຳນວຍຄວາມສະດວກໃຫ້ແກ່ ພໍ່ແມ່ປະຊາຊົນ ໂດຍສະເພາະໃນສະພາບການລະບາດຂອງພະຍາດ Covid-19 ແລະ ການນຳໃຊ້ຊີວິດໃນຍຸກ New Normal ນີ້. ນອກຈາກນັ້ນ, ມັນຍັງຈະເປັນເຄື່ອງມືໜຶ່ງ ທີ່ສາມາດຊ່ວຍໃຫ້ ລັດຖະບານເກັບລາຍຮັບເຂົ້າງົບປະມານ ໄດ້ຢ່າງມີປະສິດຕິພາບ ອີກດ້ວຍ.

ໃນຕອນທ້າຍ ທ່ານ ສົມດີ ດວງດີ ໄດ້ສະແດງຄວາມຊົມເຊີຍຕໍ່ຄະນະສະເພາະກິດ, ຄະນະຊ່ວຍວຽກ ກໍ່ຄືແຕ່ລະອະນຸກຳມະການທີ່ໄດ້ເອົາໃຈໃສ່ໃນການຈັດຕັ້ງປະຕິບັດວຽກງານ ຈົນສາມາດນຳມາໄດ້ເຊິ່ງຜົນສຳເລັດເບື້ອງຕົ້ນ, ຢ່າງໃດກໍ່ດີ ທ່ານປະທານໄດ້ໃຫ້ທິດຊີ້ນຳ ແນວທາງປະຕິບັດ ໃນຕໍ່ໜ້າ ແລະ ມອບໃຫ້ຄະນະຮັບຜິດຊອບສືບຕໍ່ຜັນຂະຫຍາຍບັນດາວຽກງານຢ່າງຕັ້ງໜ້າ ເພື່ອໃຫ້ໄດ້ຮັບໝາກຜົນສູງສຸດ.

ຂ່າວ: ຄະນະສະເພາະກິດ, ກະຊວງ ປທສ.