ຄະນະ​ຜູ້​ແທນ​ສະພາ​ແຫ່ງ​ຊາດ​ລາວ ນຳ​ໂດຍ ທ່ານ ນາງ ພອນ​ເພັດ ບຸບຜາ ຮອງ​ປະທານ​ກຳມາ​ທິ​ການ​ວັດທະນະ​ທຳ​-​ສັງຄົມ ໄດ້​ເຂົ້າ​ຮ່ວມກອງ​ປະຊຸມ​ທາງໄກ​ພາຍ​ໃຕ້​ຫົວຂໍ້ “ຄູ່​ຮ່ວມ​ມື​ລັດ​ຖະ​ສະພາ ລະຫວ່າງ ຊາດ​ອາ​ຊຽນ ກ່ຽວ​ກັບ​ການ​ຮ່ວມ​ມື​ດ້ານ​ການ​ສຶກສາ ແລະ ວັດທະນະທຳ ເພື່ອ​ການ​ພັດທະນາ​ແບບ​ຍືນ​ຍົງ”, ເມື່ອບໍ່​ດົນ​ມານີ້ ພາຍ​ໃຕ້​ການ​ເປັນ​ປະທານ​ຂອງ ທ່ານ  ຫວຽນ ຕ໋ອງ ເວີນ ຮອງ​ປະທານ​ສະພາ​ແຫ່ງ​ຊາດ ສສ ຫວຽດນາມ ເລຂາທິການ​ໃຫຍ່ AIPA, ມີ​ເລຂາທິການ​ໃຫຍ່​ຂອງ IPU,  ບັນດາ​ສະມາຊິກ​ສະພາ​ແຫ່ງ​ຊາດ​ຂອງ​ບັນດາ​ປະເທດ​ສະມາຊິກ AIPA ຈາກ ໃນ 10 ປະເທດ​ອາ​ຊຽນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ. 

ທ່ານ  ຫວຽນ ຕ໋ອງ ເວີນ ໄດ້​ກ່າວ​ວ່າ: ​ປັດຈຸບັນ​ໂລກ​ໄດ້​ມີ​ການ​ປະ​ເຊີນ​ກັບ​ບັນຫາ​ທີ່​ໜັກ ໜ່ວງ ແລະ ຮີບ​ດ່ວນເຊັ່ນ: ມົນ​ລະ​ພິດ​ທາງ​ສິ່ງແວດລ້ອມ, ຊັບພະຍາກອນ​ບົກ​ແຫ້ງ, ຄວາມ​ບໍ່​ສົມ​ດູ​ນ​ທາງ​ລະບົບ​ນິເວດ, ຂໍ້​ຂັດ​ແຍ້ງ​ລະຫວ່າງ​ຊາດ ແລະ ຜິວ​ພັນ ຊຶ່ງ​ເປັນ​ຜົນ​ມາ​ຈາກ ການ​ພັດທະນາ ແລະ ການ​ຂະຫຍາຍຕົວ​ຂອງ​ຕົວ​ເມືອງ. ອັນ​ທີ່​ໜັກໜ່ວງ​ໄປ​ກວ່າ​ນັ້ນ​ແມ່ນ​ການ​ແຜ່​ລະບາດ​ຂອງ​ພະຍາດ COVID-19. ສິ່ງ​ເຫຼົ່າ​ນີ້​ໄດ້​ເປັນ​ອຸປະສັກ​ໃຫ້​ແກ່​ການຈັດຕັ້ງ​ປະຕິບັດ​ວາລະ​ການ​ພັດທະນາ​ແບບ​ຍືນ​ຍົງ ຮອດ​ປີ 2030 ຊຶ່ງ​ມີ 17 ເປົ້າ​ໝາຍ ເພື່ອ​ລຶບລ້າງ​ຄວາມທຸກ​ຍາກ, ປົກ​ປັກ​ຮັກສາ​ໂລກ ແລະ ຮັບປະກັນ​ຄວາມ​ຈະເລີນ​ຮຸ່ງເຮືອງ​ຂອງ​ທຸກ​ພາກ​ສ່ວນ.

ກອງ​ປະຊຸມ​ໄດ້​ຮັບ​ຟັງ, ແລກປ່ຽນ ແລະ ສົນທະນາ​ກ່ຽວ ກັບພາລະ​ບົດບາດ​ຂອງ​ລັດ​ຖະ​ສະພາ​ໃນ​ການ​ສ້າງ​ຂອບ​ນິຕິ​ກຳ ເພື່ອ​ການ​ສຶກສາ​ທາງໄກ, ການ​ສຶກສາ​ຜ່ານ​ສື່​ອອນ​ລາຍ; ການ​ສ້າງ​ຂອບ​ນິຕິ​ກຳ​ເພື່ອ​ອະນຸລັກ​ຮັກສາ ແລະ ເຊື່ອມ​ຈອດ​ມໍລະ ດົກ​ດ້ານ​ວັດທະນະທຳ​ໃນ​ອາ​ຊຽນ ເພື່ອ​ຮັບ​ໃຊ້​ໃຫ້​ແກ່​ການ​ພັດທະນາ​ການທ່ອງທ່ຽວ​ແບບ​ຍືນ​ຍົງ ແລະ ການ​ລະດົມ​ແຫຼ່ງ​ທຶນ​ເພື່ອ​ພັດທະນາ​ການ​ສຶກສາ ແລະ ວັດທະນະທຳ ເພື່ອ​ຮັບ​ໃຊ້​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ຂອງ​ແຕ່​ລະ​ປະ​ເທດ.

ທ່ານນາງ ພອນ​ເພັດ ບຸບຜາ ໄດ້​ລາຍ​ງານ​ກ່ຽວ​ກັບ​ຄວາມ​ຄືບ​ໜ້າ​ໃນ​ການ ຈັດຕັ້ງ​ປະຕິບັດ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ (SDGs) ຊຶ່ງ​ບໍ່​ພຽງ​ເປັນ​ການ​ປະກອບສ່ວນ​ການຈັດຕັ້ງ​ວາລະ​ສາກົນ​ໃນ​ປີ 2030 ເທົ່າ​ນັ້ນ​ແຕ່​ຍັງ​ຈະ​ສ້າງ​ຜົນ​ປະໂຫຍດ​ໃຫ້ ສປປ ລາວ ເພື່ອ​ກ້າວ​ໄປ​ສູ່​ຜົນສຳເລັດ, ລັດຖະບານ​ຂອງ ສປປ ລາວ ໄດ້​ສຸມ​ໃສ່​ການຈັດຕັ້ງ​ປະຕິບັດ​ຄາດໝາຍ​ແຜນ​ພັດທະນາ​ແຫ່ງ​ຊາດ, ຍຸດທະສາດ​ຮອດ​ປີ 2025 ແລະ ວິໄສ​ທັດ​ຮອດ​ປີ 2030 ຂອງ​ຕົນ​ໃຫ້​ບັນລຸ ລວມ​ທັງການ​ພັດທະນາ​ແບບ​ສີຂຽວ ແລະ ຍືນ​ຍົງ, ການ​ຮັກສາ​ອັດຕາ​ເຕີບ​ໂຕ​ຂອງ​ເສດຖະກິດ, ຫຼຸດຜ່ອນ​ຄວາມທຸກ​ຍາກ ແລະ ກ້າວ​ໄປ​ສູ່​ການ​ຫຼຸດ​ພົ້ນຈາກ​ສະຖານະ​ພາບ​ດ້ອຍ​ພັດ​ທະ​ນາ. 

ໃນ​ການຈັດຕັ້ງ​ປະຕິບັດ​ການ​ເຊື່ອມ​ສານ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ໃນ​ຂົງເຂດ​ສຶກສາ​ຢ່າງ​ມີ​ປະສິດ​ທິ​ພາບ, ລັດຖະບານ​ໄດ້​ອອກ​ນະໂຍບາຍ​ການ​ຮຽນ​ຮູ້​ຕະຫຼອດ​ຊີວິດ ເພື່ອ​ສົ່ງເສີມ​ການ​ເຂົ້າ​ເຖິງ​ການ​ສຶກສາ​ໃນ​ທຸກ​ລະດັບ, ກຳນົດ​ຍຸດທະສາດ​ຄວາມ​ສະເໝີພາບ​ຍິງ​-​ຊາຍ ເພື່ອ​ດຶງ​ດູດ ໃຫ້​ຜູ້​ທີ່​ຮຽນ​ດີ​-​ຮຽນ​ເກັ່ງ​ສະໝັກ​ເຂົ້າ​ຮຽນ​ອາຊີບ​ຄູ​ເພື່ອ​ຮັບປະກັນ​ຄຸນ​ນະ​ພາບ​ການ​ສຶກສາ. ເຖິງ​ຢ່າງໃດ​ກໍຕາມ, ຍັງ​ມີ​ອຸປະສັກ ແລະ ສິ່ງ​ທ້າ​ທາຍ  ຊຶ່ງ​ຈຳເປັນ​ຕ້ອງ​ມີ​ການ​ແກ້​ໄຂ ແລະ ມີ​ມາດ​ຕະການ​ສະເພາະ​ຕໍ່​ການ​ຂາດ ສິ່ງ​ດຶງ​ດູດ​ການ​ເຂົ້າ​ຮຽນ​ຂອງ​ນັກຮຽນ​ຊັ້ນ​ປະຖົມ ແລະ ມັດທະຍົມ, ປັບປຸງ​ໂຄງ​ລ່າງ​ພື້ນຖານ ແລະ ຄູ​ສອນ​ໃຫ້​ພຽງພໍ, ການ​ຕັ້ງ​ຖິ່ນ​ຖານ​ຂອງ​ພົນລະເມືອງ​ແບບ​ກະ​ແຈກ​ກະຈາຍ, ການ​ຂາດ​ອຸປະກອນ​ການ​ສຶກສາ​ທີ່​ທັນ​ສະໄໝ​ເຂົ້າ​ໃນ​ການ​ຮຽນ​ທາງໄກ ຫຼື ການ​ຮຽນ​ຜ່ານ​ລະບົບ​ອອນ​ລາຍ ແລະ ອື່ນໆ ໂດຍ​ສະເພາະ​ການ​ນຳ​ໃຊ້​ການ​ຖ່າຍ​ທອດ​ດ້ານ​ເຕັກ​ໂນ​ໂລ​ຊີ ເພື່ອ​ປັບ​ຕົວ​ເຂົ້າ​ກັບ​ສະຖານະ​ການ ການ​ປະຕິບັດ​ມາດ​ຕະການ​ປ້ອງ​ກັນ ແລະ ຄວບ​ຄຸມ​ການ​ແຜ່​ລະບາດ​ຂອງ​ໂຄ​ໂຣ​ນາ​ໄວ​ຣັດ. 

ລັດຖະບານ​ຂອງ ສປປ ລາວ ໄດ້​ມີ​ການ​ປະ​ເມີນຄວາມ​ຄືບ​ໜ້າ​ໃນ​ການຈັດຕັ້ງ​ປະຕິບັດ ເປົ້າ​ໝາຍ​ການ​ພັດທະນາ​ແບບ​ຍືນ​ຍົງຢ່າງ​ເປັນ​ປົກກະຕິ ແລະ ມີ​ກົນ​ໄກ​ລະດົມ​ທຶນ​ເພື່ອ​ຈັດ​ຕັ້ງ​ປະຕິບັດ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ດ້ວຍ​ການ​ນຳ​ໃຊ້​ກອງ​ປະຊຸມ​ໂຕະມົນ​ຮ່ວມ​ກັບ​ຄູ່​ພັດທະນາ​ທຸກໆ​ປີ ແລະ ຮ່ວມ​ມື​ກັບ​ອົງການ​ສະຫະ​ປະຊາຊາດ ເພື່ອ​ລາຍ​ງານ​ກ່ຽວ​ກັບ​ສະພາບ​ການ​ພັດທະນາ ແລະ ຄວາມ​ຕ້ອງການ ຂອງ​ບັນດາ​ຂະແໜງການ​ຕ່າງໆ​ໃນ​ການ​ປະຕິບັດ​ໂຄງການ ຊຶ່ງ​ຕິດ​ພັນ​ກັບ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ​ໂດຍ​ສະເພາະ​ເປົ້າ​ໝາຍ​ທີ 4.

ກອງ​ປະຊຸມ​ໄດ້ ມີ​ການ​ຄົ້ນຄວ້າ, ພິຈາລະນາ ແລະ ຮັບຮອງ​ເອົາ​ຮ່າງ​ມະຕິ​ວ່າ​ດ້ວຍ​ການ​ຍົກ​ລະດັບ​ການ​ເປັນ​ຄູ່​ຮ່ວມ​ມື​ທາງ​ລັດ​ຖະ​ສະພາ ກ່ຽວ​ກັບ​ການ​ຮ່ວມ​ມື​ທາງ​ດ້ານ​ການ​ສຶກສາ ແລະ ວັດທະນະທຳ ເພື່ອ​ການ​ພັດທະນາ​ແບບ​ຍືນ​ຍົງ ໂດຍ​ຮຽກຮ້ອງ​ໃຫ້ ສະມາຊິກ​ລັດ​ຖະ​ສະພາ AIPA ​ທຸກ​ຄົນ ເພີ່ມ​ທະວີ​ການ​ຮ່ວມ​ມື ແລະ ສ້າງ​ຂອບ​ນິຕິ​ກຳ ເພື່ອ​ເຊື່ອມ​ຕໍ່​ລະບົບ​ການ​ສຶກສາ​ທຸກ​ຮູບ​ແບບ ໃນ​ຂອບ​ເຂດ​ການ​ສຶກສາ​ທາງໄກ ແລະ ຜ່ານ​ລະບົບ​ອອນ​ລາຍ;  ດຳເນີນ​ການ​ສຶກສາ​ຄວາມ​ເປັນ​ໄປ​ໄດ້​ໃນ​ການ​ສ້າງ​ຄວາມ​ກົມກຽວ​ດ້ານ​ກົດໝາຍ, ບັງຄັບ​ໃຊ້​ນະໂຍບາຍ​ທີ່​ຮັບ​ຮູ້​ນຳ​ກັນ; ເສີມ​ຂະຫຍາຍ​ການ​ແລກປ່ຽນ​ຂໍ້​ມູນ​-​ຂ່າວສານ ແລະ ການ​ສື່ສານ ໃນ​ການ​ເປັນ​ຕົວ​ແບບ ແລະ ບົດຮຽນ​ທີ່​ຖອດ​ຖອນ​ໄດ້​ຂອງ​ບັນດາ​ປະເທດ​ສະມາຊິກ​ອາ​ຊຽນ ໃນ​ການ​ລະດົມ​ທຶນ​ເພື່ອ​ການ​ພັດທະນາ​ການ​ສຶກສາ ແລະ ວັດທະນະທຳ; ຍົກ​ລະດັບ​ການ​ເຊື່ອມ​ຈອດ ລະຫວ່າງ ສະມາຊິກ​ລັດ​ຖະ​ສະພາ AIPA ແລະ ກົນ​ໄກ​ເດີມ​ທີ່​ມີ​ຢູ່​ແລ້ວ ຂອງ​ພາກ​ພື້ນ​ກ່ຽວ​ກັບ​ການ​ຮ່ວມ​ມື​ທາງ​ດ້ານ​ການ​ສຶກສາ ແລະ ວັດທະນະທຳ ເປັນຕົ້ນ ອົງການ​ຮ່ວມ​ມື​ຂອງ​ບັນດາ​ລັດຖະມົນຕີ​ສຶກສາ​ປະເທດ​ອາຊີ​ຕາເວັນ​ອອກສ່ຽງ​ໃຕ້ (SEAMEO) ແລະ ປະຊາ​ຄົມ​ວັດທະນະ​ທຳ​-​ສັງຄົມ ອາ​ຊຽນ (ASCC), ລັດຖະມົນຕີ​ວັດ​ທະ​ນະ​ທໍາ ແລະ ສິລະ​ປະ (AMCA); ຊຸກຍູ້​ໃຫ້​ມີ​ການ​ຮ່ວມ​ມື​ເພື່ອ​ຈັດ​ຕັ້ງ​ປະຕິບັດ​ພັນທະ​ສາກົນ ກ່ຽວ​ກັບ​ວັດທະນະທຳ ແລະ ສຶກສາ ໂດຍ​ສ້າງ​ກອບ​ນິຕິ​ກຳ​ພາຍ​ໃນ​ປະເທດ; ສ້າງ​ກົນ​ໄກ​ການ​ຮ່ວມ​ມື ລະຫວ່າງ ສະມາຊິກ​ລັດ​ຖະ​ສະພາ AIPA  ແລະ ພາກ​ພື້ນ​ອື່ນໆ ເພື່ອ​ເສີມ​ຂະຫຍາຍ​ຄວາມ​ເຂົ້າໃຈ​ຂອງ​ສັງຄົມ, ອະນຸລັກ​ຮັກສາ ມໍລະດົກ​ວັດ​ທະ​ນະ​ທໍາ​ຂອງ​ອາ​ຊຽນ ແລະ ການ​ເຊື່ອມ​ຈອດ ວຽກ​ງານ​ທ່ອງ​ທ່ຽວ ແລະ ການ​ພັດທະນາ​ແບບ​ຍືນ​ຍົງ; ແນະນຳ ສະມາຊິກ​ລັດ​ຖະ​ສະພາ AIPA ໃນ​ໄ​ລຍະ​ທີ່​ຖືກ​ຜຽນ​ທີ່​ເປັນ​ປະທານ​ຕາມ​ຮອບ​ວຽນ​ໃຫ້​ຈັດ​ກອງ​ປະຊຸມ​ປະຈຳ​ປີ​ກ່ຽວ​ກັບ​ການຮ່ວມ​ມື​ລັດ​ຖະ​ສະພາ ເພື່ອ​ການ​ພັດທະນາ​ແບບ​ຍືນ​ຍົງ ແນໃສ່​ສ້າງ​ກົນ​ໄກ​ການ​ຮ່ວມ​ມື ລະຫວ່າງ ອົງການ​ນິຕິບັນຍັດ ແລະ ອົງການ​ບໍລິຫານ ເພື່ອ​ໃຫ້​ສາມາດ​ບັນລຸ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ, ເພື່ອ​ການ​ພັດທະນາ​ທີ່​ຍືນ​ຍົງ​ຂອງ​ທຸກ​ປະເທດ​ສະມາຊິກ​ອາ​ຊຽນ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)