ໜ້າອອນລາຍພວກເຮົາໄດ້ລົງພິມ “..ແລກປ່ຽນວຽກບັນນາທິີການ..” ໃນວັນທີ 17/07/2020 ໄດ້ມີເພື່ອນຜູ້ອ່ານຕັ້ງບັນຫາວ່າ: ຄຸນທາດຂອງບັນນາທິການມີຫັຍງແດ່?

ຕອບສະໜອງຄວາມຕ້ອງການຂອງເພື່ອນຜູ້ອ່ານພວກເຮົາໄດ້ຊອກຮູ້ຈາກປື້ມວິ ຊາການກ່ຽວກັບສື່ມວນຊົນ ຈາກປະເທດເພື່ອນມິດຍຸດທະສາດໂດຍສະເພາະໃນປື້ມ: “ຊອກຮູ້ວິຊາຊີບບັນນາທິການ” ພິມໃນປີ 2013 ຂຽນໂດຍງອກເຈິນ ຊື່ງເປັນນັກຂ່າວອາວຸໂສ ຂອງ ສສ ຫວຽດນາມ ທັງເປັນອາຈານສອນຮັບເຊີນຄະນະວິຊາໜັງສືພິມ-ສື່ມວນຊົນ ຂອງມະຫາວິທະຍາໄລ “ຄວາຮອກສາໂຮ້ຍ-ເຍິນວັນ” ນະຄອນໂຮ່ຈິມິນ ໄດ້ຂຽນ ກ່ຽວກັບຄຸນທາດຂອງນັກບັນນາທິການໄວ້ວ່າ: “ນັກບັນນາທິການທີ່ດີ ທີ່ເກັ່ງຕ້ອງມີຄຸນທາດ” ດັ່ງລຸ່ມນີ້:

  1. ຕ້ອງມີຄວາມເຊື່ອໝັ້ນ: ນັກບັນນາທິການຕ້ອງເຊື່ອໝັ້ນຕໍ່ຄວາມຮູ້, ຄວາມສາມາດຂອງຕົນ; ຕ້ອງມີລະດັບຄວາມຮູ້ທາງດ້ານການເມືອງທີ່ແນ່ນອນ; ຕ້ອງມີຄວາມຮູ້ຫຼາຍຢ່າງຫຼື່ນກາຍຜູ້ອື່ນ; ມີຄວາມສາມາດໃນການຂຽນ; ມີຄວາມເຂົ້າໃຈຕໍ່ໜ້າທີ່ການ ເມືອງຂອງສື່ມວນຊົນ ກໍ່ຄືແນວທາງຂອງພັກ-ລັດຕໍ່ວຽກສື່ມວນຊົນ; ຮູ້ນໍາໃຊ້ເຕັກໂນໂລຢີດ້ານຂໍ້ມູນ-ຂ່າວສານ ຢ່າງແມ່ນຢຳເພື່ອຮັບໃຊ້ໜ້າວຽກຂອງຕົນ.
  2. ຕ້ອງເປັນຄົນພາວະວິໄສ: ນັກບັນນາທິການບໍ່ແມ່ນຄົນອັດຕະວິໄສ (ໃນຕົວ); ບໍ່ເຂົ້າຂ້າງອອກຂາຄົນຂຽນຜູ້ໃດໜື່ງ; ໃຈກວ້າງບໍ່ຄັບແຄບ… ເປັນຜູ້ໃຫ້.
  3. ລະມັດລະວັງ: ນັກບັນນາທິການຄວນເອົາໃຈໃສ່ຕໍ່ເພື່ອນຜູ້ອ່ານ ແລະ ຈຸດພິເສດຂອງແຕ່ລະສື່; ການຈັດໜ້າອອກແບບ; ເລືອກເຟັ້ນຮູບພາບ ແລະ ຫົວຂໍ້ບົດ-ຂ່າວ ຕ້ອງປະສົມກົມກືນກັນເພື່ອເຮັດໃຫ້ສື່ນັ້ນພົ້ນເດັ່ນຂື້ນ.
  4. ຕ້ອງເປັນຄົນສະຫຼາດ ຫຼັກແຫຼມນັກບັນນາທິການ ຕ້ອງເປັນຄົນທີ່ມີຄວາມຮູ້ກ້ວາງຂວາງເພື່ອຈະຮູ້ວ່າບົດ-ຂ່າວ ທີ່ເຂົາຂຽນມານັ້ນຖືກ ຫຼື ຜິດຕໍ່ແນວທາງ; ຕໍ່ໜ້າກົດ  ໝາຍ.
  5. ຕ້ອງຕັ້ງຄຳຖາມຢູ່ສະເໝີ: ນັກບັນນາທິການຕ້ອງເປັນຄົນມັກສໍ້ຖາມໃນທຸກສະຖານະການ; ຕ້ອງຮັບຮູ້ວ່າຫາກນັກບັນນາທິການສົງໄສບັນຫາໃດໜື່ງ; ເພື່ອນຜູ້ອ່ານເດ? ເຂົາຈະສົງໄສຫັຍງ?
  6. ຕ້ອງມີມະນຸດສຳພັນທີ່ດີ: ອາຊີບນັກບັນນາທິການເປັນອາຊີບທີ່ແຕະພຸ້ນຊູນພີ້… ມັກມີຂໍ້ຂັດແຍ່ງກັບນັກຂຽນ ສະນັ້ນຕ້ອງມີມະນຸດສຳພັນທີ່ດີຕໍ່ນັກຂຽນ.
  7. ຕ້ອງຂຽນເກັ່ງ: ນັກບັນນາທິການຕ້ອງເປັນນັກຂຽນທີ່ວ່ອງໄວ ແລະ ເກັ່ງ ກ້າວໄປເຖີງຂັ້ນຊ່ຽວຊານ; ອັນນີ້ບໍ່ມີສອນໃນໂຮງຮຽນມັນຂື້ນກັບປະສົບການໃນພຶດຕິກຳຕົວຈີງ.
  8. ຮູ້ປ່ອຍວາງ: ນັກບັນນາທິການຕ້ອງຮູ້ປ່ອຍວາງ ແລະ ຍີ້ມສູ້ໃນສີ່ງທີ່ຂາດເຫດຜົນໃນວິຊາຊີບເຊັ່ນວ່າ: ບົດຂຽນຂີ້ຮ້າຍແຕ່ຕ້ອງກວດແກ້ໃຫ້ໄດ້ລົງພິມ.

ຢາກເນັ້ນວ່າ: ນັກບັນນາທິການ ແມ່ນຜູ້ທີ່ມີຄວາມຮັບຜິດຊອບຕໍ່ຄວາມຜິດພາດທີ່ເກີດຂື້ນໃນສື່ທີ່ຕົນຮັບຜິດຊອບ ໂດຍສະເພາະແມ່ນຜູ້ເປັນຫົວໜ້າຮັບເຕັມຮ້ອຍເປີເຊັນ ສະນັ້ນໃນການບໍລິຫານງານຂອງສຳນັກສື່ບໍ່ວ່າພາກລັດ ຫຼື ເອກະຊົນ ຜູ້ເປັນຫົວໜ້າຈະບັນຊາວຽກແບບຜູ້ບັນຊາການຢ່າງເຂັ້ມງວດ… ເຖີງຈະມີການແບ່ງງານໃນໝູ່ຄະນະກໍ່ຕາມ… ແຕ່ກ່ອນຈະເຂົ້າໂຮງພິມ, ກ່ອນຈະກະຈາຍສຽງ ຫຼື ກະຈາຍພາບຫົວໜ້າບັນນາ ທິການຕ້ອງເປັນຜູ້ລົງລາຍເຊັນສາກ່ອນ… ອັນນີ້ບໍ່ແມ່ນການບໍລິຫານແບບອາດຍາສິດ ເພາະແມ່ນຄວາມຮັບຜິດຊອບຕໍ່ໜ້າກົດໝາຍຕໍ່ໜ້າການແຕ່ງຕັ້ງຈາກຜູ້ຄຸ້ມຄອງວຽກງານສື່ມວນຊົນ ດັ່ງນັ້ນ ຜູ້ທີ່ມາຢືນຢູ່ໃນຕໍາແໜ່ງບັນນາທິການຈີ່ງບໍ່ແມ່ນຜູ້ໃດກໍ່ໄດ້… ຕ້ອງແມ່ນຜູ້ມີພອນສະຫັວນ; ມີຄວາມສາມາດມີຄວາມຮູ້ລະດັບກ້ວາງຂວາງ; ມີປະສົບການໃນວຽກງານຂີດຂຽນຫຼາຍປີ; ມີຊື່ສຽງ ແລະ ບົດບາດໃນວົງການສື່ມວນຊົນ, ຖືກສັງຄົມ ແລະ ການຈັດຕັ້ງຍອມຮັບ.. ຫາກບໍ່ແມ່ນຮຽນຈົບຂະແໜງກ່ຽວຂ້ອງສື່ກໍ່ສາມາດເປັນບັນ ນາທິການໄດ້ໂລດ; ຢ່າງຕໍ່າສຸດບັນນາທິການກໍ່ຕ້ອງໄດ້ຜ່ານການຮຽນທິດສະດີການ ເມືອງ-ການປົກຄອງຊັ້ນກາງຂື້ນໄປ; ມີທັດສະນະການເມືອງຈະແຈ້ງ ຮູ້ຈໍາແນກມິດ-ສັດ ຕູ ມີຄວາມເຊື່ອໝັ້ນສູງຕໍ່ການນຳພາຂອງພັກ-ລັດ ແລະ ສຸດທ້າຍແມ່ນຜູ້ທີ່ມີຄວາມຮັກໃນອາຊີບ.

ໂດຍ: ທິດດີ