ເນື່ອງຈາກພະຍຸໜູນເຂດຮ້ອນ ໂພດູ ແລະ ລົມພະຍຸເປຣຊັນ ທີ່ພັດເຂົ້າ ສປປລາວ ໄດ້ເຮັດໃຫ້ທຸກພາກ ຂອງ ສປປລາວ ມີຝົນຕົກຕິດຕໍ່ກັນຫຼາຍວັນ ແລະ ເກີດມີໄພນ້ຳຖ້ວມ ໃນ 6 ແຂວງຄື: ຄໍາມ່ວນ,​ ສະຫັວນນະເຂດ,​ ສາລະວັນ,​ ຈຳປາສັກ, ເຊກອງ ແລະ ອັດຕະປື ເຮັດໃຫ້ 37 ເມືອງ ມີ 788 ບ້ານ, 54.207 ຄອບຄົວໄດ້ຮັບຜົນກະທົບ. ໃນນີ້ມີຜູ້ເສຍຊີວິດ 02 ຄົນ ຢູ່ແຂວງສະຫັວນນະເຂດ ແລະ ຈຳປາສັກ ແລະ ສູນຫາຍ 02 ຄົນ ຢູ່ແຂວງຈຳປາສັກ.

ຈາກສະພາບດັ່ງກ່າວ ກົມໃຫຍ່ເສນາທິການ ກະຊວງປ້ອງກັນປະເທດ ໄດ້ຊີ້ນຳບັນດາກົມກອງ ທີ່ຕັ້ງຢູ່ແຕ່ລະທ້ອງຖີ່ນຈັດຕັ້ງກຳລັງ ແລະ ນຳໃຊ້ພາຫະນະອຸປະກອນ ຂອງບັນດາກົມກອງເຂົ້າໄປກອບກູ້ຊ່ວຍເຫຼືອຍົກຍ້າຍປະຊາຊົນອອກຈາກບ່ອນທີ່ໄດ້ຮັບຜົນກະທົບ ໄປບ່ອນທີ່ປອດໄພຢ່າງຮີບດ່ວນ ແລະ ປະກອບສ່ວນຊ່ວຍເຫຼືອປະຊາຊົນແກ້ໄຂຜົນກະທົບ.