ໃນຕອນເຊົ້າວັນທີ 5 ສິງຫາ 2020 ທີ່ສູນສື່ສານເພື່ອສຸຂະພາບ ແລະ ສຸຂະສຶກສາ ກະຊວງສາທາລະນະສຸກ ໄດ້ຈັດກອງປະຊຸມ ປຶກສາຫາລື ແລະ ແລກປ່ຽນຄວາມຄິດເຫັນ ຕໍ່ນັກຂ່າວຜູ້ທີ່ຮັບຜິດຊອບ ການເຮັດຂ່າວພະຍາດໂຄວິດ-19 ຈາກສຳນັກຂ່າວຕ່າງໆຂອງລາວ ໃນນະຄອນຫລວງວຽງຈັນ, ເພື່ອເຂົ້າຮ່ວມຟັງການບັນຍາຍ ກ່ຽວກັບສະພາບຂອງພະຍາດ ໂຄວິດ-19 ໃນ ສປປ ລາວ ແລະ ສາ ກົນໃນປັດຈຸບັນ. ການບັນຍາຍຄັ້ງນີ້, ໂດຍ ທ່ານ ດຣ. ນາງ ບຸນຖະໝອມ ແສງແກ້ວປະເສີດ ຫົວໜ້າຂະແໜງລະບາດວິທະຍາ, ສູນວິເຄາະ ແລະ ລະບາດວິທະຍາ ກະຊວງສາທາລະນະສຸກ.

ທ່ານ ວິສິດ ຄຳລືຊາ ຫົວໜ້າສູນສື່ສານສຸຂະພາບ ແລະ ສຸຂະສຶກສາ ກະຊວງສາທາລະນະສຸກ ໄດ້ກ່າວວ່າ: ກອງປະຊຸມຄັ້ງນີ້, ມີຈຸດປະສົງ ເພື່ອໃຫ້ບັນດາສື່ມວນຊົນໄດ້ເຂົ້າໃຈເພີ່ມຕື່ມ ກ່ຽວກັບສະພາບ ຂອງພະຍາດ ໂຄວິດ-19 ໃນລາວ ແລະ ສາກົນ ໃນປັດຈຸບັນ, ພ້ອມສົນທະນາ ແລະ ປຶກສາຫາລື ໃນການນຳສະເໜີຂ່າວ ໃນສະພາບປັດຈຸບັນ ເພື່ອຮັບປະກັນໃຫ້ປະຊາຊົນໄດ້ຮັບຂ່າວສານຂໍ້ມູນທີ່ຖືກຕ້ອງ, ທັນເວລາ ແລະ ເຮັດໃຫ້ສັງຄົນບໍ່ມີຄວາມແຕກຕື່ນ.

ປັດຈຸບັນໄດ້ມີການລາຍງານ ໃນວັນທີ 5 ສິງຫາ 2020 ເວລາ 12:00 ໂມງນີ້ ວ່າ:  ທົ່ວໂລກມີຜູ້ຕິດເຊື້ອພະຍາດໂຄວິດ-19 ເຖິງ 18.663.730 ຄົນ, ເສຍຊີວິດ 703.599 ຄົນ, ປົວດີ 10.742.358 ຄົນ. ໃນນີ້ອາເມລິກາຕິດອັນດັບໜຶ່ງທີ່ມີຄົນຕິດເຊື້ອພະຍາດໂຄວິດ-19 ເຖິງ 4.877.729 ຄົນ, ເສຍຊີວິດ 159.519 ຄົນ, ຮອງລົງມາແມ່ນ ເບຣຊິນ ມີຜູ້ຕິດເຊື້ອ 2.808.076 ຄົນ, ເສຍຊີວິດ 96.069 ຄົນ ແລະ ອິນເດຍ ມີຜູ້ຕິດເຊື້ອ 1.908.254 ຄົນ, ເສຍຊີວິດ 39.820 ຄົນ. ສຳລັບຢູ່ປະເທດອາຊຽນ ແມ່ນອິນໂດເນເຊຍ, ເຊິ່ງມີຜູ້ຕິດເຊື້ອຈຳນວນ 115.056 ຄົນ, ເສຍຊີວິດ 5.388 ຄົນ, ປົວດີ 72.050 ຄົນ, ຟີລິບປິນ 112.593 ຄົນ, ເສຍຊີວິດ 2.115ຄົນ, ປົວດີ 66.049 ຄົນ ແລະ ສິງກະໂປ 53.346, ເສຍຊີວິດ 27 ຄົນ, ປົວດີ 47.454 ຄົນ.

ສ່ວນປະເທດທີ່ມີຊາຍແດນ ຕິດຈອດກັບ ສປປ ລາວ ໂດຍສະເພາະ ແມ່ນປະເທດໄທ ມີຜູ້ຕິດເຊື້ອ 3.328 ຄົນ, ເສຍຊີວິດ 58 ຄົນ, ປົວດີ 3.144 ຄົນ, ຫວຽດນາມ 672 ຄົນ, ເສຍຊີວິດ 8 ຄົນ, ປົວດີ378 ຄົນ, ມຽນມາ 356 ຄົນ, ເສຍຊີວິດ 6 ຄົນ, ປົວດີ 302 ຄົນ, ກຳປູເຈຍ 243 ຄົນ, ປົວດີ 202 ຄົນ. ສຳລັບ ສປປ ລາວ ແມ່ນມີຜູ້ຕິດເຊື້ອ 20 ຄົນ, ປົວດີ 19 ຄົນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)