ວັນທີ 12 ສິງຫາ 2020, ທີ່ໂຮງແຮມ ຫູນານ ວຽງຈັນ ໄດ້ມີພິທີ ເຊັນບົດບັນທຶກຄວາມເຂົ້າໃຈ ວ່າດ້ວຍໂຄງການປັບປຸງ ແລະ ການພັດທະນາລະບົບຖານຂໍ້ມູນ ວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.

ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບ ບໍລິສັດລາວເພ້ວຽງຈັນ ຈຳກັດຜູ້ດຽວ ໄດ້ເຊັນບົດບັນທຶກຄວາມເຂົ້າໃຈ (MOU) ກ່ຽວກັບໂຄງການດັ່ງກ່າວ, ໄດ້ຈັດຂຶ້ນລະຫວ່າງ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ ກັບ ທ່ານ ພູໄຊສະນະ ໄຊສົມບັດ ປະທານບໍລິສັດລາວເພ້ວຽງຈັນ ຈຳກັດຜູ້ດຽວ, ໂດຍມີ ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍພາກສ່ວນກ່ຽວຂ້ອງ ຂອງທັງສອງຝ່າຍ ເຂົ້າຮ່ວມເປັນສັກຂີພິຍານ.

ໃນບົດບັນທຶກສະບັບດັ່ງກ່າວ, ບໍລິສັດລາວເພ້ວຽງຈັນ ຈຳກັດຜູ້ດຽວ ຈະໄດ້ສຶກສາ ສຳຫລວດ, ອອກແບບຄວາມເປັນໄປໄດ້ ໃນການສ້າງໂຄງການປັບປຸງ ແລະ ພັດທະນາລະບົບຖານຂໍ້ມູນຂອງວຽກງານ ຖວທ ໃຫ້ສຳເລັດໂດຍໄວ ແລະ ສອດຄ່ອງກັບສະພາບແວດລ້ອມຕົວຈິງ, ຮັບຜິດຊອບຄ່າໃຊ້ຈ່າຍທັງໝົດທີ່ເກີດຂຶ້ນໃນການສຶກສາ, ສຳຫລວດ, ອອກແບບລະບົບ ຈົນສາມາດພັດທະນາລະບົບ ແລະ ໃຊ້ງານໄດ້, ປະສານສົມທົບກັບພາກສ່ວນທີ່ກ່ຽວຂ້ອງ ແລະ ເຮັດບົດລາຍງານຄວາມຄືບໜ້າໃຫ້ແກ່ກົມສື່ມວນຊົນ ເປັນແຕ່ລະໄລຍະ ເພື່ອລາຍງານຕໍ່ການນຳກະຊວງ.

ບົດບັນທຶກຄວາມເຂົ້າໃຈສະບັບນີ້, ມີກຳນົດເລີ່ມໃຊ້ໄດ້ແຕ່ວັນທີ 12 ສິງຫາ 2020 ເຖິງວັນທີ 12 ສິງຫາ 2021, ຖ້າການຈັດຕັ້ງປະຕິບັດໂຄງການບໍ່ມີຄວາມຄືບໜ້າ ບົດບັນທຶກສະບັບດັ່ງກ່າວ ຈະຖືກຍົກເລີກໂດຍອັດຕະໂນມັດ.

Medialaos MMD