ວັນທີ 14 ສິງຫາ 2020 ຜ່ານມາ, ກະຊວງຖະແຫລງຂ່າວ,ວັດທະນະທຳແລະທ່ອງທ່ຽວ(ຖວທ)ໄດ້ຈັດພິທີໂຮມຊຸມນຸມເພື່ອສະຫຼອງວັນສື່ມວນຊົນ ແລະ ການພິມຈໍາໜ່າຍ ຄົບຮອບ 70 ປີ (13/8/1950-13/8/2020) ຢູ່ທີ່ຫໍວັດທະນະທຳແຫ່ງຊາດ ໂດຍການໃຫ້ກຽດເຂົ້າຮ່ວມ ແລະ ໂອ້ລົມຂອງ ທ່ານ ທອງລຸນ ສີສຸລິດ ກໍາມະການກົມການເມືອງສູນກາງພັກ, ນາຍົກລັດຖະມົນຕີ; ມີທ່ານ ສຈ. ປອ. ກິແກ້ວ ໄຂຄໍາພິທູນເລຂາທິການສູນກາງພັກ, ລັດຖະມົນຕີກະຊວງຖວທ, ມີຄະນະນໍາກະຊວງ ຖວທ, ກົມ-ກອງວິຊາການ, ພະນັກງານສື່ມວນຊົນ-ການພິມຈໍາໜ່າຍ ທັງພາກລັດ, ເອກະຊົນ ແລະ ແຂກຖືກເຊີນເຂົ້າຮ່ວມລວມ 400 ກວ່າຄົນ.

ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງ ຖວທ

ໃນໂອກາດດັ່ງກ່າວ, ທ່ານ ສຈ. ປອ.ກິແກ້ວ ໄຂຄໍາພິທູນ ລັດຖະມົນຕີກະຊວງ ຖວທ ໄດ້ໃຫ້ກຽດຂຶ້ນກ່າວເປີດພິທີໂຮມຊຸມນຸມຢ່າງເປັນທາງການ ຊຶ່ງມີບາງຕອນວ່າ: “ໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວບັນດາເຜົ່າພວມພ້ອມກັນຕັ້ງໜ້າ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ກໍ່ຄືກອງປະຊຸມ 3 ຂັ້ນ ຢ່າງເປັນຂະບວນຟົດຟື້ນ ເວົ້າລວມ, ເວົ້າສະເພາະໃນຂົງເຂດວຽກງານຖວທ ກໍ່ພວມຂຸ້ນຂ້ຽວກະກຽມກອງປະຊຸມໃຫຍ່ ສະໄໝທີ Vຂອງອົງຄະນະພັກກະຊວງ ຖວທ ຊຶ່ງຈະໄຂຂຶ້ນໃນຕໍ່ໜ້ານີ້ ໃຫ້ບັນລຸຕາມຄາດໝາຍທີ່ວາງໄວ້. ມື້ນີ້ ກໍ່ເປັນມື້ໜຶ່ງທີ່ເຕັມໄປດ້ວຍຄວາມໝາຍຄວາມສໍາຄັນທາງດ້ານປະຫວັດສາດທີ່ໜັກແໜ້ນ ເພື່ອພ້ອມກັນລະນຶກ70 ປີວັນສື່ມວນຊົນ ແລະ ພິມຈໍາໜ່າຍ ທີ່ໄດ້ປະກອບສ່ວນໃນຂະບວນການປະຕິບັດພາລະກິດການຕໍ່ສູ້ປົດປ່ອຍປະເທດຊາດໃນແຕ່ລະໄລຍະ ນັບແຕ່ວັນທີ 13 ສິງຫາ 1950 ຈົນເຖິງປະຈຸບັນ ກໍ່ຄືໄລຍະສ້າງສາ ແລະ ພັດທະນາປະເທດຊາດ”.

ທ່ານ ສຈ. ປອ.ກິແກ້ວ ໄຂຄໍາພິທູນ ລັດຖະມົນຕີກະຊວງ ຖວທ

ໃນໂອກາດດຽວກັນ, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງ ຖວທກໍ່ໄດ້ຂຶ້ນລາຍງານຕໍ່ພິທີໂຮມຊຸມນຸມກ່ຽວກັບມູນເຊື້ອແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງສື່ມວນຊົນ ແລະ ການພິມຈໍາໜ່າຍ ຕະຫລອດໄລຍະ 70 ປີຜ່ານມາຊຶ່ງໄດ້ມີຫລາຍຜົນງານອັນພົ້ນເດັ່ນໃນປະກອບສ່ວນໃນພາລະກິດຕໍ່ສູ້ປົດປ່ອຍຊາດ; ປົກປັກຮັກສາ ແລະ ສ້າງສາພັດທະນາປະເທດຊາດ. ໃນໄລຍະໃໝ່ສື່ມວນຊົນ ແລະ ການພິມຈໍາໜ່າຍລາວຍັງສາມາດຮັກສາບົດບາດການເປັນກະບອກສຽງອັນແຫຼມຄົມຂອງພັກ-ລັດ, ເປັນຜູ້ແນະນໍາ, ນໍາພາຫາງສຽງ ແລະ ສ້າງຄວາມເຂົ້າໃຈທີ່ຖືກຕ້ອງ ໂດຍໄດ້ຮັບຄວາມເຊື່ອຖືໃນການສະໜອງຂໍ້ມູນຂ່າວສານ, ສາລະຄວາມຮູ້, ສາລະບັນເທີງໃຫ້ແກ່ເປົ້າໝາຍຂອງຕົນ ພ້ອມທັງສາມາດເຊື່ອມຕໍ່ຂໍ້ມູນຂ່າວສານໃນພາກພື້ນ ແລະ ສາກົນ.

ໃນພິທີ, ທ່ານ ສຈ.ປອ. ກິແກ້ວ ໄຂຄໍາພິທູນ ລັດຖະມົນຕີກະຊວງ ຖວທຍັງໄດ້ໃຫ້ກຽດຂຶ້ນມອບລາງວັນແກ່ບັນດາອົງການສື່ມວນຊົນ ແລະ ການພິມຈໍາໜ່າຍ ທີ່ມີຜົນງານດີເດັ່ນໃນການປະກອບສ່ວນເຂົ້າໃນໂຄສະນາ ຕ້ານໄພພິບັດລະດັບຊາດ ໃນໄລຍະຜ່ານມາ ຊຶ່ງມີທັງໝົດ 40ກວ່າພາກສ່ວນ.

ໃນໂອກາດພິທີໂຮມຊຸມນຸມໃຫຍ່ ເພື່ອສະຫລອງຄົບຮອບ 70 ປີວັນສື່ມວນ ແລະ ການພິມຈໍາໜ່າຍ, ຍັງໄດ້ຮັບຟັງການໂອ້ລົມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ໂດຍທ່ານໄດ້ກ່າວສະແດງຄວາມຍ້ອງຍໍຊົມເຊີຍບັນດານັກຮົບສື່ມວນຊົນ-ການພິມຈຳໜ່າຍທຸກພາກສ່ວນທີ່ໄດ້ອຸທິດເຫື່ອແຮງສະຕິປັນຍາເຮັດສຳເລັດພາລະກິດທີ່ມີກຽດສະຫງ່າຂອງຕົນ ແລະ ເພື່ອເປັນການເສີມຂະຫຍາຍມູນເຊື້ອຜົນງານແລະແກ້ໄຂຈຸດອ່ອນຂໍ້ຄົງຄ້າງ ໃນການເຄື່ອນໄຫວວຽກງານ,ທ່ານນາຍົກລັດຖະມົນຕີ ຍັງໄດ້ເນັ້ນໜັກໃຫ້ສື່ມວນຊົນແລະ ການພິມຈໍາໜ່າຍ ສືບຕໍ່ເອົາໃຈໃສ່ວຽກງານທີ່ສຳຄັນຈໍານວນໜຶ່ງເພື່ອພ້ອມກັນເຮັດສໍາເລັດໜ້າທີ່ການເມືອງ ກໍ່ຄືຄວາມຮຽກຮ້ອງຕ້ອງການຂອງການພັດທະນາໃນໄລຍະໃໝ່, ດ້ວຍຄຸນນະພາບໃໝ່.

ໃນໂອກາດດຽວກັນກໍ່ໄດ້ມີການຈັດງານວາງສະແດງຜົນງານການເຄື່ອນໄຫວຂອງສື່ມວນຊົນ ແລະ ການພິມຈໍາໜ່າຍຢູ່ທີ່ຫໍວັດທະນະທໍາແຫ່ງຊາດ ຊຶ່ງມີ 20 ກວ່າພາກສ່ວນເຂົ້າຮ່ວມເພື່ອເປັນການທົບທວນຫວນຄືນມູນເຊື້ອ,ເຕົ້າໂຮມຄວາມສາມັກຄີພາຍໃນ, ເພີ່ມຄວາມຮັບຮູ້ ແລະ ເຂົ້າໃຈທີ່ຖືກຕ້ອງຕໍ່ບົດບາດ, ໜ້າທີ່, ມູນເຊື້ອ ແລະ ຜົນງານຂອງສື່ມວນຊົນ ແລະ ການພິມຈໍາໜ່າຍ, ທັງເປັນການປຸກລະດົມທົ່ວສັງຄົມປະກອບສ່ວນຮ່ວມສ້າງຄວາມເຂັ້ມແຂງໃນວຽກງານສື່ມວນຊົນ ແລະ ການພິມຈໍາໜ່າຍລາວ ກ້າວໜ້າໄປເລື້ອຍໆ.

ກ່ອນໜ້ານີ້ 70 ປີຄືໃນວັນທີ 13 ສິງຫາ 1950, ກອງປະຊຸມໃຫຍ່ຜູ້ແທນທົ່ວປະເທດໄດ້ຕົກລົງສ້າງຕັ້ງ “ແນວລາວອິດສະລະ” ແລະ “ລັດຖະບານລາວຕໍ່ຕ້ານ”; ກອງປະຊຸມຄັ້ງນັ້ນໄດ້ຕົກລົງສ້າງຕັ້ງໜັງສືພິມ ແລະ ໂຮງພິມ“ລາວອິດສະລະ”ຂຶ້ນເປັນທາງການຊຶ່ງແມ່ນທີ່ມາຂອງວັນສື່ມວນຊົນ ແລະ ການພິມຈຳໜ່າຍ.