ສື່ມວນຊົນ ເມືອງປາກລາຍ ປັບປຸງ ແລະ ພັດທະນາ ທາງດ້ານປະລິມານ ແລະ ຄຸນນະພາບຢ່າງບໍ່ຢຸດຢັ້ງ

0
122

ພາຍຫລັງປະເທດຊາດ ໄດ້ຮັບການປົດປ່ອຍຢ່າງສົມບູນ ແລະ ໄດ້ສືບຕໍ່ປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ, ພັກ-ລັດ ໄດ້ຖືວຽກງານສື່ມວນຊົນເປັນວຽກງານທີ່ສໍາຄັນ ເປັນກະບອກສຽງອັນແຫລມຄົມຂອງຕົນ ເພື່ອໂຄສະນາປຸກລະດົມ ປະຊາຊົນບັນດາເຜົ່າ ຮ່ວມແຮງຮ່ວມໃຈກັນສຸມໃສ່ ປົວແປງບາດແຜສົງຄາມ, ລົບລ້າງແບບແຜນການ ດໍາລົງຊີວິດທີ່ຫລ້າຫລັງ. ໃນນັ້ນ, ສື່ມວນຊົນ ແລະ ພິມຈໍາໜ່າຍ ເມືອງປາກລາຍ ແຂວງໄຊຍະບູລີ ກໍໄດ້ຮັບການສ້າງຕັ້ງ, ເຄື່ືອນໄຫວ ແລະ ມີການປັບປຸງພັດທະນາ ເທື່ອລະກ້າວຢ່າງບໍ່ຢຸດຢັ້ງ.

ທ່ານ ບຸນມີ ສີອາທອນ ຮອງຫົວໜ້າຫ້ອງການຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເມືອງປາກລາຍ ຜູ້ຊີ້ນຳວຽກງານຖະແຫລ່ງຂ່າວ ໄດ້ໃຫ້ສຳພາດໃນໂອກາດ ການກະກຽມການສະເຫລີມ ສະຫລອງ ວັນສ້າງຕັ້ງ ສື່ມວນຊົນ ແລະ ການພິມຈຳໜ່າຍ ຄົບຮອບ 70 ປີ (13/08/1950-13/08/2020) ນີ້ວ່າ: ກ່ອນປີ 1990 ການເຄື່ອນໄຫວວຽກງານ ສື່ມວນຊົນ ແລະ ການພິມຈໍາໜ່າຍ ເມືອງປາກລາຍແຂວງໄຊຍະບູລີ ແມ່ນຍັງ ປະຖົມປະຖານ, ການເຄື່ອນໄຫວເກັບກຳຂ່າວ-ຂຽນຂ່າວ ຍັງຈໍາກັດຫລາຍດ້ານ, ການສົ່ງຂ່າວໃຫ້ສື່ ຂອງສູນກາງແມ່ນລາຍງານ ຜ່ານໂທລະສັບ ແລະ ສົ່ງທາງໂທລະສານ (ແຟັກ), ການຕອບສະໜອງຂໍ້ມູນຂ່າວສານ ຍັງບໍ່ທັນກວ້າງຂວາງ. ພາຍຫລັງປີ 2017 ເປັນຕົ້ນມາ ວຽກງານສື່ມວນຊົນ ໄດ້ຮັບການປັບປຸງ ນັບທັງທາງດ້ານການຈັດຕັ້ງ, ດ້ານປະລິມານ ແລະ ຄຸນນະພາບ, ສ້າງສະຖານີ ວິທະຍຸກະຈາຍສຽງຊຸມຊົນຂຶ້ນ ເປັນແຫ່ງທໍາອິດ ຢູ່ເມືອງປາກລາຍ, ມີລະບົບໂທລະໂຄ່ງ ຢູ່ແຕ່ລະບ້ານ, ໄດ້ມີໜ່ວຍງານຂ່າວວິທະຍຸ, ໂທລະພາບ ໂດຍສົ່ງອອກຂ່າວ ຢູ່ສື່ສູນກາງເປັນຕົ້ນຕໍ, ໄລຍະນີ້ໜ່ວຍງານໂຄສະນາ ຂ່າວສານພວກເຮົາ ໄດ້ເຄື່ອນໄຫວຢ່າງແຂງແຮງ ລົງເກັບກໍາຂ່າວ ແລະ ການເຄື່ອນໄຫວ ຂອງການນຳແຂວງ, ເມືອງ ແລະ ສູນກາງ ທີ່ລົງເຄື່ອນໄຫວ ຕາມບ້ານຕ່າງໆ ຕິດພັນກັບຂະບວນຫັນພະນັກງານ ລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ສຸມໃສ່ແກ້ໄຂປະກົດການຫຍໍ້ທໍ້ ຢູ່ຮາກຖານ ເຂດຫຍຸ້ງຍາກທຸລະກັນດານ ມີຜົນສໍາເລັດເປັນກ້າວໆ.

ອັນທີ່ພົ້ນເດັ່ນ ວຽກງານຖະແຫລ່ງຂ່າວ ຢູ່ເມືອງປາກລາຍ ພວກເຮົາແມ່ນຜະລິດຂ່າວ ໂທລະພາບ-ວິທະຍຸສົ່ງ ໃຫ້ວິທະຍຸ-ໂທລະພາບແຂວງ ແລະ ສູນກາງທຸກວັນ ເປັນການເຄື່ອນໄຫວ ຮັບໃຊ້ໜ້າທີ່ການເມືອງ ຂອງພັກ-ລັດ ເປັນປົກກະຕິຕໍ່ເນື່ອງ ມາເຖິງປັດຈຸບັນ. ພ້ອມກັນນີ້, ສື່ມວນຊົນ ແລະ ການພິມຈໍາໜ່າຍ ເມືອງປາກລາຍ ຍັງໄດ້ຄົ້ນຄວ້າ ຊອກຫາວິທີທາງເພື່ອເຮັດແນວໃດ ໃຫ້ສາມາດນໍາເອົາຂໍ້ມູນຂ່າວສານ ເຂົ້າເຖິງເປົ້າໝາຍຢ່າງກວ້າງຂວາງ ແລະ ເຂົ້າເຖິງທຸກສະຖານທີ່ທຸກເວລາ ຈຶ່ງໄດ້ຫັນມານໍາໃຊ້ ເຄືອຂ່າຍອິນເຕີເນັດ ໄດ້ສ້າງເປັນເຟສບຸກຂອງວິທະຍຸ, ໂທລະ ພາບ, ໜັງສືພິມ, ເວບໄຊ ມີທັງໂພດຂໍ້ຄວາມ, ບົດຂ່າວ-ຮູບພາບ ແລະ ມີທັງຖ່າຍທອດສົດລາຍການວິທະຍຸ. ພ້ອມນີ້, ສື່ມວນຊົນ ແຕ່ລະເມືອງກໍໄດ້ນໍາໃຊ້ ສື່ສັງຄົນອອນລາຍ ເຂົ້າໃນວຽກງານຂອງຕົນ ສາ ມາດຕອບສະໜອງ ຄວາມຮຽກຮ້ອງຕ້ອງງການ ໜ້າທີ່ການເມືອງຂອງພັກ-ລັດ ແລະ ຄວາມຮຽກຮ້ອງຕ້ອງການຂອງສັງຄົມ, ເຜີຍແຜ່ແນວທາງການ ເມືອງຂອງພັກ, ລະບຽບກົດໝາຍຂອງລັດ, ຂໍ້ມູນຂ່າວ ສານ-ສາລະໜ້າຮູ້, ການບັນເທີງ ແລະ ອື່ນໆໄດ້ເປັນຢ່າງດີ.

ທ່ານ ບຸນມີ ສີອາທອນ ຍັງໃຫ້ຮູ້ຕື່ມວ່າ: ເພື່ອເປັນການຂໍ່ານັບຮັບຕ້ອນ ແລະ ສະເຫລີມສະຫລອງວັນສຳຄັນດັ່ງກ່າວ, ສື່ມວນຊົນເມືອງປາກລາຍ ພວກເຮົາໄດ້ສຸມໃສ່ ສືບຕໍ່ຈັດຕັ້ງປະຕິບັດ ວຽກງານວິຊາສະເພາະຂອງຕົນ ໃນການເຄື່ອນໄຫວສໍາພາດ ຕໍ່ກັບທັດສະນະຊີ້ນໍາ ຂອງການນໍາເມືອງ, ພະນັກງານອາວຸໂສບໍານານ ທີ່ເຄີຍນໍາພາວຽກງານສື່ມວນຊົນ, ຄວາມຮູ້ສຶກຂອງການນໍາ ຂະແໜງການ ແລະ ຊັ້ນຄົນຕ່າງໆ ໃນສັງຄົມ ຕໍ່ກັບວຽກງານສື່ມວນຊົນ ແລະ ການພິມຈໍາໜ່າຍ ໃນໄລຍະຜ່ານມາ, ໂຄສະນາຄວາມໝາຍຄວາມສໍາຄັນ ວັນຄົບຮອບ 70 ປີ ສື່ມວນຊົນ ແລະ ການພິມຈໍາໜ່າຍ ຢ່າງຟົດຟື້ນ, ໂດຍນໍາໃຊ້ສື່ວິທະຍຸ-ໂທລະພາບ, ໜັງສືພິມ, ເຟສຂອງສະຖານີວິຖະຍຸ ແລະ ສື່ສັງຄົມອອນລາຍ ຢ່າງແຂງແຮງຖືກ ຕ້ອງຊັດເຈນ ແລະ ອື່ນໆ.

ຂະນະດຽວກັນ ກໍມີການປະກົດຕົວຂອງສື່ແບບໃໝ່ເກີດຂຶ້ນ, ເຊິ່ງໄດ້ສ້າງຄວາມຫຍຸ້ງຍາກ ໃຫ້ແກ່ສື່ມວນຊົນ, ເຊິ່ງໃນເມື່ອກ່ອນ ແມ່ນມີແຕ່ສື່ຫລັກເປັນ ຜູ້ນຳສະເໜີຂ່າວຕ່າງໆ ສື່ແບບໃໝ່ ໄດ້ເຜີຍແຜ່ຂໍ້ມູນ ຂ່າວສານ ບິດບຽນຄວາມຈິງ ສ້າງຄວາມສັບສົນ ໃຫ້ແກ່ຜູ້ບໍລິໂພກຂ່າວ. ຕໍ່ສະພາບການດັ່ງກ່າວ, ສື່ແບບເກົ່າ ຕ້ອງໄດ້ປັບຕົວ ເພື່ອປັບປຸງຄຸນນະພາບ ໃນການສົ່ງຂໍ້ມູນຂ່າວສານຕ່າງໆ ຕ້ອງໃຫ້ມີຄວາມຊັດເຈັນ, ທັນເຫດການ ເພື່ອຕອບໂຕ້ ຊີ້ແຈງໃຫ້ປະຊາຊົນ ມີຄວາມເຂົ້າໃຈຫລາຍຂຶ້ນ. ສະນັ້ນ, ສື່ມວນຊົນລາວ ຕ້ອງໄດ້ເອົາໃຈໃສ່ໃນການປ່ຽນຖ່າຍ ເຕັກນິກວິທະຍາການແບບເກົ່າ, ອຸປະກອນແບບເກົ່າ ມາສູ່ແບບໃໝ່, ປ່ຽນແປງແບບແຜນວິທີເຮັດວຽກ ໂດຍການ ຫລຸດກຳລັງຊັບ ພະຍາກອນມະນຸດລົງ ຫັນປ່ຽນການແບ່ງວຽກ ພາຍໃນສື່ມວນຊົນ ໃຫ້ແຕ່ລະຄົນມີຄວາມ ສາມາດຫລາຍຂຶ້ນ ເຊັ່ນ: ເປັນທັງນັກຂ່າວ, ຊ່າງພາບ, ນັກຕັດຕໍ່ ແລະ ຜູ້ສົ່ງຂ່າວ. ທັງນີ້ແນ່ໃສ່ຮັບປະກັນ ການເປັນກະບອກສຽງ ອັນແຫລມຄົມ ແລະ ນໍາເອົາສື່ມວນຊົນລາວ ກ້າວສູ່ຄຸນນະພາບໃໝ່ ແລະ ສາມາດເຊື່ອມໂຍງໄດ້ກັບສາກົນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)